ჩემი მოხსნის საკითხი საყდრისის თემამ დაძრა - მარინე მიზანდარი

მარინე მიზანდარი თანამდებობიდან გათავისუფლებას კულტურულ მემკვიდრეობას, კერძოდ, საყდრისის თემას უკავშირებს. ამის შესახებ კულტურის მინისტრის ყოფილმა მოადგილემ მარინე მიზანდარმა დღეს გამართულ პრესკონფერენციაზე განაცხადა.

"კულტურული მემკვიდრეობის თემა ერთ-ერთი მაინც მნიშვნელოვანი საკითხი იყო, რამაც ძალიან გაამწვავა ბოლოს მდგომარეობა, ხოლო საყდრისის თემამ საგანგებოდ. იყო დიდი ლობი საწარმოს მხრიდან, იყო გარკვეული ზეწოლაც და ამდენად, ძირითადი უთანხმოების საგანი ის იყო, რომ ჩვენმა უწყებამ, რომელსაც პასუხისმგებლობა აქვს თავისი დარგი დაიცვას, ვერ დაიცვა სათანადოდ და დღემდე ვერ იცავს", - განაცხადა მიზანდარმა.

მისივე თქმით, კულტურის სამინისტრომ ასევე ვერ მოახერხა სათანადოდ დაეფიქსირებინა თავისი პოზიცია საყდრისის შესახებ ისე, რომ მინისტრთა კაბინეტისთვის ცხადი ყოფილიყო, რამდენად მნიშვნელოვანია საყდრისის საკითხი.

"მე ვფიქრობ, ჩემი მოხსნის საკითხი დაძრა სწორედ საყდრისის თემამ, იმიტომ, რომ იქ იყო პრინციპული უთანხმოება. მე ვერ ვიტყვი, რომ მინისტრს არ ესმოდა ამ ძეგლის მნიშვნელობა, უბრალოდ, ჩვენი უთანხმოების მიზეზი იყო ის, რომ მინისტრმა სათანადოდ ვერ დააფიქსირა თავისი პოზიცია, ვერ მოახერხა ის, რომ მონიტორინგის ჯგუფი შესულიყო ამ ობიექტზე და ჩვენ გვცოდნოდა რა ხდება დღეს იქ", - განაცხადა მარინე მიზანდარმა.

კულტურის მინისტრის ყოფილი მოადგილე აპირებს სასამართლოში გაასაჩივროს მისი გათავისუფლების შესახებ ბრძანება, რადგან მიიჩნევს, რომ ამ ბრძანებაში ბევრი ბუნდოვანი საკითხია. რაც შეეხება მომავალ საქმიანობას, მიზანდარმა აღნიშნა, რომ ჯერ არ გადაუწყვეტია, სად გააგრძელებს მუშაობას, თუმცა აღნიშნა, რომ კულტურის სფეროში დარჩება.