"ჩვენ ყველანი ჩვენი ლიდერებივით რევოლუციონერები ვართ" - Ambebi.ge თეირანის ცენტრალური მოედნიდან (+ფოტორეპორტაჟი)

დღეს, 11 თებერვალს ირანი ისლამური რევოლუციის დღეს აღნიშნავს. დედაქალაქის მთავარ მოედნებზე სატრანსპორტო მოძრაობა დილიდან შეწყდა. მოსახლეობა დამოუკიდებლობის დღის აღსანიშნად თეირანის ცენტრალურ მოედანზე, აზადზე შეიკრიბა. იქ მათ სცენიდან ქვეყნის პრეზიდენტმა, ჰასან როჰანმა მიმართა.

პრეზიდენტმა თავის მიმართვაში მისი წინამორბედი, მაჰმუდ აჰმადინეჯადი გააკრიტიკა და ის კიდევ ერთხელ დაადანაშაულა კორუფციაში. ამასთან, პრეზიდენტი ახალგაზრდებს ინტერნეტის მნიშვნელობაზე ესაუბრა და აღნიშნა, რომ ის აპირებს ბევრად ხელმისაწვდომი გახადოს ინტერნეტი მოქალაქეებისთვის. პრეზიდენტის მიმართვა ყველა სატელევიზიო არხზე გადაიცემოდა. სიტყვით გამოსვლის შემდეგ მან აზადის მოედანი მალევე, ვერტმფრენით დატოვა.

ქალაქის ქუჩები აიათოლა რუჰოლა ხომეინის პოსტერებით არის მორთული. სწორედ მის სახელს უკავშირდება ირანის კონსტიტუციური მონარქიიდან სახალხო თეოკრატიულ ისლამურ რესპუბლიკად გარდაქმნა. მან 1979 წელს ქვეყნის უკანასკნელი შაჰი, მოჰამედ რეზა ფეჰლევი შეცვალა. მისი მმართველობის პერიოდში ქვეყანაში შარიათის კანონები დაბრუნდა და მკაცრად შეიცვალა ქვეყნის საგარეო პოლიტიკა.

"შურავუ ვა ანრუქა, დოშმანან ე-ხალყ ე-მა" - საბჭოთა კავშირი და ამერიკა - ორივე ჩვენი მტერია - ასეთი იყო ირანის ისლამური რევოლუციის ლოზუნგი, რომელმაც დღეისათვის ფორმირება განიცადა; დღეს რუსეთი ქვეყნის სტრატეგიული პარტნიორია, ამერიკა კი კვლავ მტრად რჩება. ეს კარგად ჩანს დედაქალაქში შეკრებილ ადამიანთა განწყობაზეც, - ისინი ანტიამერიკულ ლოზუნგებს სკანდირებენ და ანტიამერიკულ პოსტერებს აფრიალებენ.

Ambebi.ge გთავაზობთ ფოტორეპორტაჟს ირანიდან

გიორგი გიორგაშვილი, თეირანი

იხილეთ ფოტოგალერეა

Ambebi.ge