ქარელის მორიგი სკანდალური ბრალდებები ოქრუაშვილის მისამართით

ამ დღეებში ქართველი საზოგადოება კიდევ ერთი სკანდალის მოწმე გახდა - თავდაცვის ყოფილი მინისტრი, ირაკლი ოქრუაშვილი თავისივე ყოფილ თანაგუნდელსა და ყოფილ მეგობარს, შიდა ქართლის ყოფილ გუბერნატორს, მიხეილ ქარელს საფრანგეთში ტელეფონით "მესიჯებს" უგზავნის და ემუქრება, თუკი ათონელის #27-ში ოფისს მთლიანად არ გადმომიფორმებ, მოხუც მშობლებსა და ოჯახის წევრებს შენივე სახლში გამოვბუგავო. ახალ დეტალებზე მიხეილ ქარელი "ქრონიკას" საფრანგეთიდან ესაუბრა.

- თქვენ მიერ გახმაურებულმა "მესიჯმა", რომელიც ირაკლი ოქრუაშვილისგან მიიღეთ, დიდი დაინტერესება გამოიწვია საზოგადოებაში, ეს არის პირდაპირი მუქარა თქვენს ოჯახზე. აქამდე ვიცოდით, რომ თქვენ და ირაკლი მეგობრები იყავით, რა მოხდა? ცოტა დაუჯერებელია, რომ თქვენს შორის განხეთქილების საგანი მხოლოდ ოფისთან დაკავშირებული წლებია.

- თვითონ ცნება მეგობრობა, როგორც ეს უმრავლესობას ესმის, ოქრუაშვილისთვის არ არსებობს, მისთვის ყოველი ადამიანი წარმოადგენს ნივთს, რომელიც მას პირადი მიზნებისათვის სჭირდება. სამწუხაროდ, მე ის მიმაჩნდა მეგობრად, თანამებრძოლად და შეიძლება ამიტომაც მაქვს დაშვებული შეცდომები. არ ვაპირებ, ამ შეცდომების გამო პასუხისმგებლობას გავექცე. უკვე ხუთი წელია, რაც საფრანგეთში ვიმყოფები, ბოლო ოთხი წლის განმავლობაში ირაკლი ოქრუაშვილი საერთოდ არ მინახავს და არც არანაირი ურთიერთობა მქონია. რა თქმა უნდა, მხოლოდ ოფისის თემა არ განსაზღვრავს ჩემს მისადმი დამოკიდებულებას, ჩვენს შორის უთანხმოება თუ კონფლიქტი გაცილებით ადრე დაიწყო და ჩემს აღშფოთებას დღესაც იწვევს ბევრი რამე. საწყენია, რომ ოქრუაშვილმა საკუთარი შეცდომებისა თუ დანაშაულის სხვაზე გადაბრალება და ხელის შეწმენდა ცხოვრების წესად გაიხადა. როდესაც ხედავ, რომ ამ ადამიანისთვის პოლიტიკა ჩვეულებრივი ბიზნესია, ხოლო მეგობრები - პირადი მიზნების მისაღწევად გამოსაყენებელი საშუალებები, რასაკვირველია, ეს შენთვის უდიდესი იმედგაცრუებაა! რატომ არ ჩანან მის გვერდით ის ადამიანები, ვისთან ერთადაც გადაწყდა სააკაშვილის რეჟიმის წინააღმდეგ ბრძოლა? პასუხი მარტივია – უამრავი ადამიანი, მიუხედავად ჩვენ მიერ დაშვებული შეცდომებისა, რაც გარკვეულწილად მძიმედ აწვა ჩვენს განვლილ გზას, მის გვერდით ვიდექით გულწრფელად, სამართლიანი იდეებისა და პრინციპების დამკვიდრებისთვის. სამწუხაროდ, ეს ღირებულებები მისგანვე იქნა უგულებელყოფილი და შეურაცხყოფილი.

- როგორც გავიგე, ოქრუაშვილი ამბობს, ჩემი ტელეფონიდან ვიღაცამ პროვოკაციის მიზნით გაგზავნა "მესიჯიო", თქვენ გჯერათ, ამ ვერსიის?

- ჩემთვის აბსოლუტურად გასაგებია... ის ახლა ყველაფერს პროვოკაციად მონათლავს, ასევე, მისივე ავტორობით გამოგზავნილ "მესიჯსაც" და ამით ეცდება, თავიდან აიცილოს პასუხისმგებლობა. თუმცა, კიდევ ერთხელ მინდა გავიმეორო, მე ვერავინ ვერასდროს შემიცვლის აზრს, რომ ამ სიბინძურის ავტორი არ არის ოქრუაშვილი! გარდა ამისა, "მესიჯში" არის რამდენიმე მნიშვნელოვანი დეტალი, რომელიც მარწმუნებს, რომ ამ ტექსტის ავტორი ოქრუაშვილია, სხვამ ამდენი არ უნდა იცოდეს, ეს გამორიცხულია.

- ისე, მაინტერესებს, საქართველოში ხელისუფლება შეიცვალა, უკვე აღარაა საშიში, რომ დაბრუნდეთ. რატომ არ ჩამოდიხართ?

- ძალიან დადებითად ვაფასებ იმას, რაც საქართველოში მოხდა და რაც ხდება დემოკრატიისა და ადამიანის უფლებების დაცვის კუთხით. ერთი სული მაქვს, სამშობლოში დავბრუნდე, რადგან ძალიან მენატრება ჩემი ქვეყანა, ჩემი ოჯახი, მეგობრები და ახლობლები. თუმცა ამ ეტაპზე ვსწავლობ მაგისტრატურაში, მენეჯმენტისა და მარკეტინგის ფაკულტეტზე. პარალელურად ვმუშაობ და შესაბამისად, ჯერჯერობით წინასწარ ვერ ვგეგმავ ჩემი ჩამოსვლის ზუსტ თარიღს.

- თქვენ ახსენებთ თეო ტლაშაძეს, ის ამბობს, რომ ამ ყველაფრის შესახებ პირველად გაიგო, ცრუობს?

- არასდროს სერიოზულად არ მიმიღია იმ ადამიანებისგან შეურაცხყოფა, რომლებიც არ მიცნობენ და მაინც ფეხქვეშ თელავენ ჩემს ღირსებას. თუმცა თეო ტლაშაძის განცხადება, თითქოს მე "ნაციონალების" პროვოკაციას წამოვეგე, არის ძალიან გულდასაწყვეტი, რაც შეეხება თქვენს კითხვას, რა თქმა უნდა, ტლაშაძე ცრუობს! მინდა, მთელ საზოგადოებას მოვუყვე ერთი სკანდალური ფაქტის შესახებ, თეოსაც და მისთვის ძალიან ახლობელ ოქრუაშვილსაც, დარწმუნებული ვარ, კარგად ახსოვთ ეს ისტორია: როდესაც ატენის ხეობაში მდებარე, საზოგადოებისთვის კარგად ცნობილი "მონადირის სახლი" ჩამოგვართვეს (სადაც "შეთქმულები" ვიკრიბებოდით), გარკვეული პერიოდი უპატრონოდ იყო მიგდებული და გაჩნდა აზრი, ეს სახლი სარგებლობაში გადასცემოდა გორის ეპარქიას... ასე უფრო დაცული იქნებოდა ძარცვისგან და ნგრევისგან, "მონადირის სახლს" უკვე ძალიან სჭირდებოდა მოვლა-პატრონობა და გორის ეპარქიის სასულიერო პირებზე უკეთესად ვინ მოუვლიდა? ეს სასიხარულო ამბავიც კი იყო. როდესაც ოქრუაშვილმა ეს ამბავი შეიტყო, თეოს უყვირა: მაგათ გადაეცი, ვინც ფეხს შეადგამს, შიგნითვე ჩავწვავო! მე ძალიან კარგად მახსოვს, როგორი გაოგნებული იყო თეო ოქრუაშვილის მუქარით, როცა დედაოებს "მონადირის სახლში" გამოწვით ემუქრებოდა, თუკი შიგ შევიდოდნენ. ამასთან დაკავშირებით მაინც ეყოს გამბედაობა თეო ტლაშაძეს და თქვას სიმართლე, თუ მხოლოდ ფარისევლობა არ არის ეკლესიისადმი მისი დამოკიდებულება! სწორედ ყველა ამ ფაქტის გახსენება მარწმუნებს, რომ ჩემს ტელეფონზე გამოგზავნილი "მესიჯები", სადაც ჩემი უმწეო, მოხუცებული მშობლების სახლში გამოწვით მემუქრებიან, ირაკლი ოქრუაშვილის ავტორობითაა შესრულებული! ეს ისტორია ირაკლი ოქრუაშვილის ბინძურ საქმეებთან შედარებით არაფერია!

- როდესაც ირაკლი ოქრუაშვილისგან ასეთი "მესიჯი" მიიღეთ, ხომ არ დაგირეკავთ მისთვის, ხომ არ დალაპარაკებიხართ პირადად?

- ასეთი "მესიჯის" ავტორთან რაზე უნდა ვილაპარაკო? მით უფრო მაშინ, როდესაც დარწმუნებული ვარ, რომ მისი ავტორი ოქრუაშვილია?!

- ავი ენები ამბობენ, რომ თქვენი მხრიდან ეს არის პროვოკაცია, რათა ახალი ხელისუფლების ყურადღება მიიქციოთ.

- არანაირი ყურადღების მიქცევა არ მჭირდება, რადგან ამ მხრივ აქტივობას არ ვგეგმავ.

- "თუ როდესმე იკაზე ხმას ამოიღებ ან გაზეთით ან ტელევიზიით, შენს ოჯახს მთლიანად გავანადგურებთ". დაუკვირდით, "მესიჯი" დაწერილია მესამე პირში, მართლაც ხომ არ შეიძლებოდა, რომ სხვას გამოეგზავნა ოქრუაშვილის ტელეფონით?

- ჩემთვის მნიშვნელობა არ აქვს, ეს შეტყობინება ოქრუაშვილის თუ მისი კრიმინალური დაჯგუფების რომელიმე წევრის მიერაა გამოგზავნილი! დარწმუნებული ვარ, რომ ტექსტისა და ასეთი სიბინძურის ატვორიც და ორგანიზატორიც არის ირაკლი ოქრუაშვილი. მსგავსი ხელწერით ის ადრეც მოქმედებდა და ეს კიდევ უფრო მეტად მარწმუნებს. კარგად ვიცნობ მის მახინჯ აზროვნებასა და სიბოროტეს!

- უკვე შევიდა პროკურატურაში თქვენი განცხადება?

- რადგან ეს განცხადება უკვე გასაჯაროვდა და მედიაში გავრცელდა, პროკურატურას შეუძლია, დაიწყოს გამოძიება, რადგან სახეზე გვაქვს დანაშაული, რომელიც აუცილებლად უნდა იქნას გამოძიებული. თუმცა ჩვენ ვგეგმავთ, განცხადება მაინც შევიტანოთ.

- მოგვიყევით დეტალურად, რა მოხდა ოფისთან დაკავშირებით?

- ოფისს ჰყავს 11 თანამესაკუთრე. ოქრუაშვილის სურვილია, როგორც შემდგომში გამოჩნდა, ხელისუფლებაში ყოფნის პერიოდში კარგად აპრობირებული მეთოდებით, მუქარებითა და შანტაჟით დაგვათმობინოს ქონება თავის სასარგებლოდ!

- ეს ოფისი ვის ეკუთვნოდა ოქრუაშვილამდე, მან ხომ ვიღაცას წაართვა? თუ ვცდები, დამიზუსტეთ.

- ეს ოფისი არ არის წართმეული, ის ჩვენ ერთობლივად შევიძინეთ 2007 წელს ფიზიკური პირისგან. პირადად მე მთელი ჩემი დანაზოგი ჩავდე ჩემს წილად, მეტი არანაირი ქონება არ გამაჩნია, მამაპაპისეული სახლიც კი 2008 წლის ომის დროს რუსებმა გადამიწვეს და დღემდე ვერ დაგვისრულებია მშენებლობა. არ ვაპირებ ამ წილის დათმობას, ოქრუაშვილის მუქარების გამო. მე დღეს ცხოვრება ახლიდან მაქვს დასაწყები, ერთადერთი კაპიტალი მხოლოდ ეს წილია და ოქრუაშვილმა კი არა, სააკაშვილის ჯალათებმაც კი ვერ გამტეხეს ციხეში და ერთი უსახური და გაბოროტებული ოქრუაშვილის არა თუ არ მეშინია, არამედ ძალიან მეცოდება, რომ ეს საცოდავი აქამდე დაეცა!

"ქრონიკა" კომენტარისთვის ყოფილ პარლამენტარსა და ირაკლი ოქრუაშვილის გუნდის წევრს, თეო ტლაშაძესაც დაუკავშირდა. საინტერესოა, მართლა აპირებდა თუ არა დედაოების გამოწვას ირაკლი ოქრუაშვილი "მონადირის სახლში"?

- გელა, არც ერთ სიტყვას ამას არ დავამატებ, რაც "მაესტრომ", კერძოდ კი ია თინიკაშვილმა გადაიღო ჩემი "ფეისბუკის" გვერდიდან, სადაც ვთქვი, რომ ეს ორივე ადამიანი ჩემთვის არის ახლობელი და არანაირ კომენტარს არ ვაპირებ არავისთან. შენც შეგიძლია, ჩემი "ფეისბუკის" განცხადება დაბეჭდო ჩემი კომენტარის ადგილზე.

- აქ კონკრეტული ფაქტია, მაშინ დავწერ, რომ კომენტარს არ აკეთებ.

- ჩემი კომენტარი ყველა კითხვაზე, რაც დაისმება, იქნება ერთი და იგივე... რაც გითხარით, ესაა კომენტარი, ამ კომენტარს ვაკეთებ და არა როგორც თქვენ თქვით, არ აკეთებს კომენტარსო. ჩემი კომენტარია, რაც გამოვაქვეყნე ჩემს "ფეისბუკ-გვერდზე"!

- მე მჭირდება კომენტარი კონკრეტულ ფაქტზე, ნუ მითითებ "ფეისბუკისკენ"!

- მეტის არაფრის თქმას არ ვაპირებ, ეგაა კომენტარი ყველასთვის, ყველა კითხვაზე!

- თეო, მე არ ვარ გუშინ გამოჩეკილი სააგენტო, რომ "ფეისბუკში" დადებულ სტატუსს დავეტაკო. ქარელი ლაპარაკობს კონკრეტულ ფაქტზე. მე დავწერ, რომ ჩემთან კომენტარს არ აკეთებთ!

- მე რა პასუხიც მაქვს კითხვაზე, გეუბნებით და ეგ დაწერეთ.

- დედაოებზე არსად არაფერი წერია.

- ყველა კითხვაზე არის ეგ პასუხი, რაც გავაკეთე!

თეო ტლაშაძისა და ჩემი მიმოწერა, ალბათ, საინტერესო უნდა იყოს სხვებისთვისაც: ჯერ ერთი, ჩემთვის შეურაცხყოფაა, როცა ყოფილი პარლამენტარი "ფეისბუკის" გვერდისკენ მითითებს, მე კომენტარი უკვე დავწერე და ეგ გამოიყენეო და მეორეც - სულაც არ ვარ ვალდებული, სოციალურ ქსელში ვიძრომიალო და ის ვარკვიო, რა დაწერა სადღაც ქალაბტონმა თეომ. სხვათა შორის, კარგი გამოსავალი მოძებნა ზოგიერთმა: მე ჩემი ვთქვი და ეს კანონია შენთვის, აუცილებლად დაბეჭდეო. არა, გენაცვალოს ჩემი თავი, მე სხვა შეკითხვებიც მაქვს, თუ არ მპასუხობ, ესე იგი, კომენტარის გაკეთება არ გინდა და ამიტომ, მეყოლე ვარდივით!

გელა ზედელაშვილი

გაზეთი "ქრონიკა"

ასევე იხილეთ: "სახლს დაგიწვავ დედ-მამიანად, დანარჩენს გასვენებაში აგიხსნი" - სკანდალური მუქარის წერილი ქარელს ოქრუაშვილისგან?