რა ვითარებაში გაიყინა 16 წლის გოგონა თბილისში - გარდაცვლილის ახლობლების ვერსიები

გარდაცვლილი 16 წლის მარიამ ჩავლეიშვილის ახლობლები მომხდარის რამდენიმე ვერსიაზე საუბრობენ. მათი ინფორმაციით, გოგონა კლასელებთან ერთად ერთ-ერთი მეგობრის სახლში იმყოფებოდა. როგორც პედაგოგები ყვებიან, მარიამ ჩავლეიშვილი მეგობრის სახლიდან ღამით რამდენიმე წუთით გავიდა, თუმცა უკან აღარ დაბრუნებულა. მეგობრებმა კი, რომლებთან ერთადაც იგი იმყოფებოდა, ჩათვალეს, რომ მარიამ ჩავლეიშვილი სახლში წავიდა და ძებნა აღარ დაუწყეს.

ერთ-ერთი ვერსიით, ეზოში გასულ გოგონას ყინულზე ფეხი აუცურდა და წაიქცა, რის შედეგადაც გონება დაკარგა და გაიყინა.

ოჯახის ახლობლების ინფორმაციით, გამოძიება რამდენიმე ვერსიაზე მუშაობს, მათ შორის არის თვითმკვლელობამდე მიყვანა. თუმცა, როგორც საგანგებო სიტუაციების სამსახურის წარმომადგენლები აცხადებენ, რომლებმაც გოგონა გარდაცვლილი იპოვეს, ცხედარს ძალადობის კვალი არ აღენიშნება. გარდაცვლილი პროზექტურაში გადაასვენეს. მიმდინარეობს ცხედრის ექსპერტიზა.

თბილისში 16 წლის გოგონას ცხედარი გუშინ, 31-ე ქარხნის მიმდებარე ტერიტორიაზე იპოვეს. როგორც "ინტერპრესნიუსს" საქართველოს შინაგან საქმეთა სამინისტროში განუცხადეს, მომხდარზე აღძრულია სისხლის სამართლის საქმე 115-ე მუხლით, რაც თვითმკვლელობამდე მიყვანას გულისხმობს.

"ინტერპრესნიუსი"