7
ივნისიდღის ზოგადი ასტროლოგიური პროგნოზი
მსახიობი კოტე თოლორდავა და მისი მეუღლე, მენეჯერი და კინორეჟისორი განო მელითაური ცოტა ხანში ტელეწამყვანებად მოგვევლინებიან. ყოველდღე, შაბათ-კვირის გარდა, "პალიტრა ტვ"-ზე გადაცემას წაუძღვებიან. ამ ფაქტს ორივე მოუთმენლად ელოდება და საოცარ ენთუაზიაზმს ავლენს... ასე რომ, კოტეს უამრავ სამსახურს კიდევ ერთი შეემატება, რომლისთვისაც განოსთან ერთად, გამორჩეულად ემზადება. ამბობს, რომ გადაცემაში პასუხგაუცემელი თემა და საკითხი არ დარჩება...Ambebi.ge მეუღლეებს - კოტე თოლორდავასა და განო მელითაურს შეხვდა.
- რას გვეტყვით თქვენს ახალ პროექტზე?
განო:
- კარტებს ბოლომდე არ გვახსნით, მაგრამ გეტყვით, რომ მალე, თებერვლის შუა რიცხვებში, მე და კოტე "პალიტრა ტვ"-ზე გადაცემას ვიწყებთ...
- მშვენიერი დუეტია და ამ ყველაფრისთვის, ვფიქრობ, კარგი დასაწყისია...
განო:
- მადლობა... მოკლედ, ჯერჯერობით სამუშაო პროცესია და ბევრ რამეს ვერც ვიტყვით, ესა თუ ის საკითხი და ვარიანტი განიხილება. ჩვეულებრივი სამუშაო პროცესი მიმდინარეობს...
კოტე:
- კი, გადაცემის თემატიკაზე, სტრუქტურასა და ხასიათზე კონკრეტულად ვყალიბდებით და მერე, ალბათ, სახელწოდებაც გვექნება. დავარქმევთ იმ სახელს, რასაც საჭიროება მოითხოვს.
ისე, დიდი ხანია, ორივე "გაკო" ვართ, ეს სიტყვა, ჩვენი სახელების (განო და კოტე) პირველი მარცვლების შეერთებას ქმნის და ხელზე ("გაკო") ტატუებიც ამის დასტურად გვაქვს. ადრე ამ სახელწოდების სარეკლამო კომპანიაც გვქონდა. სავარაუდოდ, შეიძლება ასეც ერქვას, თუმცა ვინ იცის...
განო:
- მთავარი ის არის, რომ გადაცემის არსი იქნება "გაკო" და ეს იქნება ჩვენთვის მთავარი. ამასთან, ერთმანეთთან სასაუბროდ ბევრი დრო გვექნება, რაც ძალიან გვიხარია, რადგანაც დღის განმავლობაში იმდენად დაკავებულები ვართ, რომ ჩვენთვის ერთმანეთთან ლანჩთაიმზე შეხვედრა, ანუ გადაცემა ეთერში ამ დროს გავა, მშვენიერია.
- თქვენს გადაცემას ქართულ სატელევიზიო სივრცეში, მგონი, ანალოგი არ აქვს...
კოტე:
- კი, ასეა. ჩვენს გადაცემას ვერაფერს შევადარებ. ეს იქნება შოუ, სადაც აბსოლუტურად თავისუფალი იქნება ყველა თემა, ყველაფერს განვიხილავთ... რეალურად კი ის იქნება ჩვენი სახლი, რომლის კარიც ღია უნდა იყოს ნებისმიერი სტუმრისთვის. განუხილველი არ დაგვრჩება არც ერთი მწვავე და საინტერესო თემა, რაც საზოგადოებას აღელვებს და აწუხებს...
განო:
- მე და კოტე საჯაროდ ვილაპარაკებთ იმ საკითხებსა და თემებზე, რომლებზეც სახლში, სამზარეულოში ვლაპარაკობთ ხოლმე.
- პოლიტიკაზეც?
- კოტე:
- დიახ, პოლიტიკაზეც, რატომაც არა, პოლიტიკურ საკითხებს ჩვენი გადასახედიდან შევაფასებთ. ვინაიდან პროფესიით ჟურნალისტები არ ვართ და ჩვენ-ჩვენი პროფესიები გვაქვს, როგორც ამ ქვეყნის ჩვეულებრივ მოქალაქეები, ადამიანები, აქედან გამომდინრე ვილაპარაკებთ. ამიტომ რაღაც ფორმით, მაყურებლისთვის ჩვენგან ამ ყველაფრის მოსმენა საინტერესო უნდა იყოს. რაც მთავარია, როგორც რიგითი მაყურებლები, ყველაფერზე გახსნილად ვილაპარაკებთ...
განო:
- ჩვენი პროექტის ინოვაციურობა ის არის, რომ ამ ფორმატის პროექტი ქართულ ტელესივრცეში არ არსებობს. მოკლედ, ეს იქნება გულახდილი გადაცემა, რაც ჩემთვის ძალიან მნიშვნელოვანია.
- ჩემი აზრით, ამ ყველაფრის ხიბლი ის არის, პროექტს მეუღლეები წაუძღვებით და ამის პრეცედენტს ჩვენში ვერც ვიხსენებ...
განო:
- დიახ და ამისთვის დიდი მადლობა "პალიტრამედიას", რომ გვენდნენ და ასეთი საშუალება მოგვცეს...
კოტე:
- განოს ვეთანხმები, ეს ერთობლივი პროექტია, ინიციატივა რაღაც ერთობლივად გამოვავლინეთ, თანხვედრა მოხდა. გაჩნდა იდეა და როგორც კი ამ იდეაზე დავილაპარაკეთ, იმ წამსვე "ავენთეთ" და ვთქვით, რომ თანახმები ვიყავით...
განო:
- ამ პროექტის პარალელურად, ვაგრძელებთ ჩვენ ჩვენს სამსახურებში საქმიანობას და იმ საქმიან "ქაოსს" კიდევ ერთი დაემატა. ოღონდ, ეს "ქაოსი" ჩვენი ოჯახისთვის ძალიან სასარგებლოა... ცხოვრებაში ურთიერთობის მეშვიდე წელი დაგვიდგა. ფსიქოლოგები ხშირად ამბობენ, რომ ეს კრიზისული პერიოდია...
განო:
- ეს კრიზისული პერიოდი ჩვენზე არ ვრცელდება...
კოტე:
- კი, მაგრამ, ნახე, როგორი დახმარებაა? შუადღისას ერთმანეთს შევხვდებით, დავსხდებით და დავილაპარაკებთ. მოკლედ, ცოტა ხანში ამის ფუფუნება გვექნება. რაც შეეხება ჩვენს პოზიციებს, იქნება სუბიექტური და ჩვენს აზრებს სხვებს თავს არ მოვახვევთ.
განო:
- ყველაფერი აბსოლუტურად რეალური უნდა იყოს. ალბათ, რაღაც ეტაპზე შეტევის მოგერიებაც მოგვიწევს, რაც გადაცემას დამატებით ხიბლს შეჰმატებს.
- ძალიან "ანთებულები" ხართ...
კოტე:
- ძალიან, რადგანაც საინტერესო ექსპერიმენტია. მიხარია და ბედნიერი ვარ, რომ პარტნიორია ჩემი მეუღლე.
- სცენაზე ან კიდევ რაიმე სხვა პროექტში თუ ყოფილხართ პარტნიორები?
კოტე:
- დვიწყოთ იმით, რომ პარტნიორები ვართ "ბავშვების კეთებაში" (იცინის). არ ვიცი, ამას როგორ დაწერთ, მაგრამ ფაქტი ჯიუტია, ჩვენს ცხოვრებაში თუ რამე კარგი გაგვიკეთებია, ჩვენი შვილებია...
განო:
- ახლა ღიმილის გარეშე რომ გიპასუხოთ, პარტნიორობის გამოცდილება მართლა გვაქს და ეს ჩვენი პირველი მცდელობა არ იარის... როგორც გითხარით, სარეკლამო კომპანია გვქონდა, რომელსაც "გაკო" ერქვა.
კოტე:
- და არაერთი საინტერესო პროექტის ავტორები ვიყავით, ბევრი რამ გავაკეთეთ. ვითანამშრომლეთ ჯგუფ "მგზავრებთან" ერთად, მათი პირველი კლიპი ჩვენი სადებიუტო ნამუშევარი აღმოჩნდა.
განო:
- იმის მერე კიდევ ბევრ რაღაცაში გამოგვიცდია თავი...
კოტე:
- მართალია, ხშირად ვკამათობთ, მაგრამ კამათში იბადება ხოლმე ჭეშმარიტება...
განო:
- უბრალოდ, კოტე ვერ ეგუება იმას, რომ რეჟისორი ვარ და ეს მსახიობი და ჩემი რეჟისორობის პირობებში, სცენაზე ჩემზე დამორჩილება მოუწევს (იღიმება)...
- როგორც რეჟისორს თუ გიმუშავია?
- კი, მაქვს ფილმები გადაღებული. ერთ-ერთი ფილმი მამუკა ხაზარაძემ დამიფინანსა. მე და ჩემი მეგობარი მასთან მივედით და ვთხოვეთ, მხარში დაგვდგომოდა, დაფინანსებაზე უარი არ უთქვამს.
ჩემი კინოკარიერა ცუდად არ დაწყებულა, უბრალოდ მერე გაჩერებამ მომიწია. ნიუ-იორკის კინოაკადემიიდან მქონდა მიწვევა და უარი ვთქვი...
- რატომ?
კოტე:
- იქიდან ან დიდი რეჟისორი დაგვიბრუნდებოდა, ან -არა (იღიმის). მე მირჩევნია, კარგი ცოლისა და დედის ამპლუაში იყოს. თანაც, მიმაჩნია, რომ ჯერ ცოტა პატარაა. ჰო, პატარა ბავშვია, ჩემი მეოთხე "შვილია"... ახლა რა უშავს, რომ მოვიყვანე, მაშინ მართლა ბავშვი იყო, მაგრამ თუკი რაიმე წარმატებას მივაღწიე, ეს ჩემი მეუღლის დამსახურებაა და ამისთვის მისი მადლობელი ვარ. ცხოვრების მეგზურად კარგი მეგობარი შემხვდა...
- რაზე კამათობთ?
- ყველაფერზე, რაზეც შეიძლება, რომ ადამიანებმა იკამათონ. ხანდახან ეს ყველაფერი ისეთ მარაზმული აზრის დაცვაში გადადის, გაოცდებით. განო ხან ბალიშს მირტყამს, ხან – რაღაც საგანს (იცინის)...
- იმედია, ასეთი გართულებები გადაცემაში არ იქნება...
კოტე:
- წინასწარ ვერაფერს ვიტყვი, მაყურებელს იმის მოლოდინი ნუ ექნება, რომ ეს არ მოხდება... ჩვენ აბსოლუტურად გულწრფელები ვიქნებით და ასეთ დროს ძნელია, რაიმე სახის ემოციის დაფარვა...
- თქვენს გადაცემას ვფიქრობ, რომ ბევრი მაყურებელი ეყოლება...
კოტე:
- დიდი იმედი მაქვს, რომ ასე იქნება იმიტომ კი არა, რომ ჩვენ ვართ, ასეთი გადაცემა ქართულ ტელესივრცეს აკლია... ვეცდები, ვიყო ის კოტე, როგორიც ცხოვრებაში ვარ, რომ მაყურებელმა შემაფასოს და ეს ყველაფერი არ აღიქვას, როგორც არტისტის ნამუშევარი. იმედიანად ვუყურებთ ხვალინდელ დღეს, რომელიც ძალიან საინტერესო იქნება.
- კოტე, უამრავი სამსახურები გაქვს: სერიალი, თეატრებში წარმოდგენები, უცხოური სერიალების გახმოვანება, რეკლამა... ახლა ტელეწამყვანის ამპლუა. ამდენი საქმის ხარისხიან შესრულებას როგორ შეძლებ?
კოტე:
- მაგარია, ეს ყველაფერი და მერწმუნეთ, ერთმანეთს ხელს არ შეუშლის... ენერგიით ვარ სავსე, ზოგჯერ ენერგია სად წავიღო, არ ვიცი. მოკლედ, არ არსებობს იმის საშიშროება, რომ ჩემს რომელიმე საქმიანობას რაღაც ხარისხი სადმე დააკლდება...
განო:
- მინდა, საკუთარ თავებს წარმატებები ვუსურვო, "პალიტრა ტვ-ის" კი - ბევრი მაყურებელი...
ლალი ფაცია
სპეციალურად Ambebi.ge-სთვის
