შვილმა მითხრა, ბიძია დამესიზმრა, წყლიდან ამოდიოდაო, მეორე დღეს ჩემი ძმა ოკეანეში დაიხრჩო - 5 ამბავი შემზარავი წინათგრძნობის შესახებ

რამდენიმე დღის წინ გამოცემა Daily Mail-მა გამოაქვეყნა ისტორიები ექთან პენი სარტორის ახალი წიგნიდან - Near Death Experiences (ე.წ. "სიკვდილის გამოცდილება" NDE).

სტატიას მკითხველთა უპრეცედენტო გამოხმაურება მოჰყვა. რედაქციაში ათასობით წერილი მივიდა, სადაც ადამიანები საკუთარ ისტორიებს ყვებოდნენ. დღეს გამოცემამ სტატია დაბეჭდა, სადაც 5 ადამიანის მონათხრობია მოყვანილი, რომელთაც წინათგრძნობა ჰქონდათ, რომ მათი ახლობლები მალე გარდაიცვლებოდნენ. ზოგიერთს ხილვა ჰქონდა, ზოგიერთმა კი სიზმარში ნახა.

კეროლ კინგსტონი, 67 წლის: 1982 წლის მაისი იყო, დღის პირველი საათი. კარზე ზარის ხმამ გაგვაღვიძა. ჩემი მეუღლე ჯონი დაბლა ჩავიდა, მაგრამ დაბრუნებისას თქვა, რომ არავინ იყო. ისეთი ძლიერი შეგრძნება მქონდა, რომ ეს ჩემი უმცროსი 25 წლის ძმა სტივი უნდა ყოფილიყო. რამდენიმე წამის შემდეგ ზარმა ისევ დარეკა. ამჯერადაც არავინ იყო. ეს კიდევ რამდენიმე წამის განმავლობაში გაგრძელდა. ბოლოს გადავწყვიტეთ, რომ ყურადღება არ მიგვექცია, ვიფიქრეთ, სახლი ეშლებოდათ. ღამე ჩემმა უფროსმა ვაჟმა, რობინმა გამაღვიძა და მითხრა, რომ დაესიზმრა ბიძია სტივი, რომელიც წყლიდან ამოდიოდა. მეორე დღეს მამამ დამირეკა და მითხრა, რომ სტივი ავარიაში მოკვდა. როგორც აგვიხსნეს, ვერტმფრენი ოკეანეში ჩავარდა და ის დაიხრჩო.

ჯულიეტ რუდკინი, 43 წლის: 2003 წლის აპრილში ულამაზესი ჯანმრთელი ბიჭი გავაჩინე, რომელსაც დევიდი დავარქვი. მე და ჩემი მეუღლე ძალიან ბედნიერები ვიყავით. მაგრამ რამდენიმე თვის შემდეგ მოულოდნელად საშინელმა შეგრძნებამ მომიცვა. არ ვიცი, ეს რა იყო, მაგრამ მქონდა საზარელი შიში, რომ ბავშვი მოკვდებოდა. ვერავის ვეუბნებოდი, ვიცოდი იტყოდნენ, რომ მშობიარობის შემდეგ დეპრესია მქონდა. რამდენიმე თვის შემდეგ დედაჩემი გერალდინი სახლში მოვიდა, რათა უფროსი ბავშვები სკოლაში წაეყვანა. დედა შემოსასვლელეში იდგა და ბავშვებს ელოდებოდა - უეცრად თითქოს მის თვალებში შევედი და სულამდე შევაღწიე. მახსოვს დედამ შენიშვნა მომცა, რომ ცუდი მზერა მქონდა და ვაშინებდი. დედა მალევე წავიდა. რამდენიმე საათში მისმა მეუღლემ დამირეკა და მითხრა, რომ დედა სახლში ცუდად გახდა და საავადმყოფოში გადაიყვანეს. დედა რამდენიმე საათში გარდაიცვალა.

რუთ შეარდი, 67 წლის: 1991 წლის ღამე იყო ჩემს სახლში ლოგინში ვიწექი. მოულოდნელად ვიგრძენი, რომ ოთახში ჩემს გარდა, კიდევ ვიღაც იყო. "დავინახე" დიდი ხნის წინ გარდაცვლილი ბებია ადელაიდი, რომელიც ჩემს ლოგინთან იდგა.

"თოფმა ამ დროს ცეცხლი გახსნა. ეს იყო შუადღეს და არა დილით. უთხარი მამაშენს", - ზუსტად ეს სიტყვები გავიგონე.

მეორე დილით გავიღვიძე და აღმოვაჩინე სააბაზანოს რადიატორიდან წყალი ჟონავდა. შემდეგ მამასთან მივედი და სიზმრის შესახებ მოვუყევი. მას სახეზე ფერი შეეცვალა. ყოველთვის ვიცოდი, რომ ბაბუაჩემი არტური 1916 წელს იუტლანდის ბრძოლაში გარდაიცვალა, მაგრამ ეს თარიღი ბევრჯერ დაგვიწყებია.

"დღეს 31 მაისია. 75 წელი გავიდა მისი სიკვდილიდან", - წამოიყვირა მამაჩემმა.

ჯუდი სმიტი, 66 წლის: 1969 წელს 22 წლის ასაკში ქალაქ ჩელმსფორდში ბანკში ვმუშაობდი. ეს ძველი შენობა იყო და სალაროების მოპირდაპირე მხარეს ბუხარი ჰქონდა. შუადღე იქნებოდა მოულოდნელად ბუხარში დეიდაჩემი ლილი დავინახე. არ შემშინებია, მახსოვს მხოლოდ ის, რომ მისი იქ ყოფნა გამიკვირდა. რამდენიმე წუთში გაუჩინარდა. ამის შემდეგ დედამ დამირეკა და მითხრა, რომ დეიდა ლილი გარდაიცვალა.

ალან გრივსი, 62 წლის: 1983 წელი იყო. ღამე კოშმარულმა სიზმარმა გამაღვიძა. დამესიზმრა, თითქოს მეზობელი ჩემი სახურავიდან გადმოვარდა და მოკვდა. ლოგინიდან წამოვდექი, სხეული ოფლიანი მქონდა და გული ძალიან მიცემდა. მოულოდნელად უცნობი მამაკაცის ხმა მომესმა. უცნობმა ხმამ მითხრა, რომ დედაჩემი რეიჩელი 3 თვეში 2-ის ნახევარზე მოკვდებოდა. შემდეგ ჩამეძინა. დედას 4 წელი პარკინსონის დაავადება ჰქონდა, მაგრამ მაინც მხნედ გამოიყურებოდა. დედაჩემი ზუსტად 3 თვეში 2-ის წუთებზე გარდაიცვალა.

მომზადებულია dailymail.co.uk-ის მიხედვით.