23
მაისიდღის ზოგადი ასტროლოგიური პროგნოზი
სტატისტიკის ეროვნული დეპარტამენტის მონაცემებით, საქართველოში რეგისტრირებული ქორწინების რაოდენობამ ბოლო ათი წლის განმავლობაში, წინა ათწლეულთან შედარებით დაახლოებით ორჯერ მოიმატა.
2001 წელს ქორწინებათა რიცხვი 13 336-ს შეადგენდა, 2012 წლის მონაცემებით კი -30 412-ს. ამავე დეპარტამენტის მონაცემებით, როგორც მდედრობითი, ისე მამრობითი სქესის ქორწინების საშუალო ასაკი საქართველოში ბოლო 20 წლის მანძილზე იმატებს. თუკი 1990 წელს ქალები საშუალოდ 23 წლის, ხოლო მამაკაცები - 27 წლის ასაკში ქმნიდნენ ოჯახს, 2012 წლის მონაცემებით ასაკობრივმა მაჩვენებელმა 2-3 წლით მოიმატა - მამაკაცები 29-30, ქალები კი 26-27 წლის ასაკში იწყებენ დაოჯახებას.
იურიდიული თვალსაზრისით, საქართველოში ქორწინების ქვედა ზღვარი ორივე სქესისთვის 18 წელია, თუმცა ასაკობრივი ნორმა ოჯახის შექმნისთვის მზადყოფნის ერთადერთი და უპირობო გარანტია არ არის. მართალია, თითოეული ადამიანი საკუთარი შეხედულებისამებრ ირჩევს მეორე ნახევარს, მაგრამ არსებობს ე.წ. პარტნიორული ნორმების კრიტერიუმები.
გარდა ბიოლოგიური მზაობისა, რა ფსიქო-სოციალური ფაქტორები განაპირობებს მყარი ოჯახის შექმნის გარანტიას, რატომ გაიზარდა ქორწინების ქვედა ზღვარი საქართველოში? ამ და სხვა საინტერესო თემებზე Ambebi.ge ფსიქოლოგ ნანა ჩაჩუას ესაუბრა:
- ადამიანი არის ბიო-ფსიქო-სოციალური არსება. მიუხედავად იმისა, რომ ადამიანთან ქორწინების ბიოლოგიური მზაობა უმეტეს შემთხვევაში, 13-14 წლის ასაკიდან იწყება, ფსიქოლოგიური და სოციალური თვალსაზრისით მაინც მოუმწიფებელია. ოჯახის ვალდებულებისა და მოვალეობის გაცნობიერება დროს საჭიროებს.
თანამედროვე ცხოვრებაში შეყვარებული წყვილის ურთიერთობის რომანტიკული პერიოდის დროში გახანგრძლივებას პრაგმატული დატვირთვაც მიეცა. წყვილები უკეთ ეცნობიან ერთმანეთს და ოჯახის მატერიალურ უსაფრთხოების პირობებსაც ერთობლივად აზუსტებენ. მით უმეტეს, რომ რომანტიკულობისა და პრაგმატულობის თანაარსებობის შესაძლებლობა დღესდღეობით უფრო მარტივია, ვიდრე 10-15 წლის წინ იყო. წყვილები "უფრთხოდნენ" ნაცნობების, ახლობლების თვალს.
ურთიერთობის თავისუფლებას ქორწინებით "შველოდნენ", მაშინ, როცა საკმარისად არც კი იცნობდნენ ერთმანეთს. დღეს უფრო გახსნილი ურთიერთობების ფსიქოლოგიური და სოციალური პირობები არსებობს. ესეც, რომ იტყვიან, დრომ მოიტანა. ამასთანავე, თანამედროვე ადამიანი საკმაოდ შეშინებულია. მას ერთნაირად ეშინია გაუგებარი ომების, სტიქიების, დაავადებებისა და, რაც მთავარია - სიღარიბის. დღეს ადამიანი ისე, როგორც არასდროს ცდილობს სოციალური სტატუსის მოპოვებას, ფინანსური საკითხების მოწესრიგებას. ოფიციალური ქორწინების ასაკობრივი გადავადების ერთ-ერთი პირობად, ვფიქრობთ, ესეც უნდა ჩაითვალოს, - ამბობს ფსიქოლოგი ნანა ჩაჩუა.
"ადამიანი იღლება ყველაფრისგან, სიყვარულისგანაც კი", - წერდა ანდრე მორუა. თუმცა რეალობა არც ისე რთულად მოგვეჩვენება, თუკი ოჯახის შექმნისას და შემდეგაც, ურთიერთობებს გულისხმიერებითა და ურთიერთპატივისცემით მოვეკიდებით.
სალომე შიხაშვილი, Ambebi.ge
