ლევან ამირიძე - 12-12 ათასი ლარი აიღეს მათ, ვინც ჩაგვცხრილა

12-12 ათასი ლარი აიღეს მათ, ვინც ჩაგვცხრილა, - ამის შესახებ მუხროვანის ამბოხისთვის გასამართლებულმა ლევან ამირიძემ "კავკასიის" ეთერში განაცხადა. მისივე თქმით, დღეს ყველა ის პირი, ვინც სპეცოპერაციის დროს მათ ჩაცხრილვაში მონაწილეობდა, ყველა წამყვან თანამდებობაზეა და ჩვეულებრივ მსახურობს შინაგან საქმეთა სამინისტროში.

"12-12 ათასი ლარი აიღო იმ სამმა კაცმა, ვინც ჩვენ ჩაგვცხრილა. ჩემი თანამებრძოლებისგან ვიცი, რომ როდესაც დაგვაკავესო, ვანო მერაბიშვილი ეუბნებოდა, რატომ არ დახოცეთ ეს ჯარისკაცები, დახვრიტეთ ადგილზე და მოაწყვეთ ისე, თითქოს გაქცევას აპირებდნენო. ერთ-ერთი სამხედრო მაღალჩინოსანი გადაეფარა ამ ჯარისკაცებს, რას აკეთებთო?!", - იხსენებს ამირიძე.

მისივე თქმით, ინტერნეტში გავრცელებული კადრები უშუალოდ 5 მაისს არის გადაღებული მუხროვანის სამხედრო ნაწილის ტერიტორიის გარეთ, გამშვებ პუნქტზე და იმ ადამიანებს, რომლებიც კადრებში ჩანან და რომლებიც განკარგულებებს გასცემენ, პირადად იცნობს და ისინი თავდაცვისა და შინაგან საქმეთა სამინისტროების ხელმძღვანელი პირები არიან.

ამირიძის განცხადებით, ეს არის პერიოდი, როდესაც ისინი სამხედრო ნაწილის ტერიტორიიდან გადიოდნენ და როდესაც ბლოკირება ხდება ტერიტორიის. მისი ინფორმაციით, იმ ვერტმფრენით, რომელიც კადრებში ჩანს, მათი ძებნა ხორციელდებოდა.

მუხროვანის ამბოხში ბრალდებულების აყვანის ოპერაცია დეტალურად გაიხსენა ასევე ამბოხის ბრალდებით გასამართლებულმა პოლკოვნიკმა კობა ოთანაძემაც. მისი თქმით, აყვანის სპეცოპერაციის დროს მათ სამარშრუტო ტაქსი მიუგზავნეს, სადაც სამი სპეცრაზმელი იჯდა. ოთანაძის განცხადებით, მათ უკნიდან ესროლეს და სასიკვდილოდ გაწირეს. ოთანაძე ყვება, რომ როცა დაჭრილები ძირს გადმოყარეს, წიხლებს ურტყამდნენ, ხოლო შემდეგ მის მიმართ საკონტროლო გასროლა განახორციელეს ხელ-ფეხისა და მკერდის არეში. თუმცა, მიუხედავად ამისა, ის ცოცხალი გადარჩა. გადარჩა მაიორი ლევან ამირიძეც, ხოლო გენერალი გია კრიალაშვილი ადგილზე დაიღუპა.

"ფაქტიურად მორგში წაგვიყვანეს და რომ გვნახეს, კიდევ ცოცხლები ვიყავით, მერე საავადმყოფოს ექიმებმა წაგვიყვანეს", - აღნიშნა ოთანაძემ.

მუხროვანის ამბოხების საქმესთან დაკავშირებით სპეცოპერაცია 20 მაისს თიანეთის გზატკეცილზე ჩატარდა, რის შედეგადაც გია კრიალაშვილი დაიღუპა.

შინაგან საქმეთა სამინისტრომ მომხდართან დაკავშირებით, მეორე დღეს განცხადება გაავრცელა. შსს-ის ცნობით, "ორმხრივი სროლის" შედეგად ადგილზე გარდაიცვალა გია კრიალაშვილი, დაიჭრა კობა ოთანაძე და ლევან ამირიძე.

"ინტერპრესნიუსი"