საქართველოში ტექდათვალიერების შემოღების აუცილებლობაზე მსჯელობა და კამათი უკვე კარგა ხანია მიმდინარეობს. განკარგულების პროექტი, რომელიც სპეციალურად ამ საკითხის გამო შემუშავდა, მთავრობამ უკვე მოიწონა. ავტომანქანების პერიოდულ ტესტირებას, ანუ ე.წ. ტექდათვალიერებას, სავარაუდოდ, საერთაშორისო კომპანია TUV Rheiland Group განახორციელებს. ტექდათვალიერება საქართველოში 2015 წლის 1-ლი მარტიდან დაიწყება. განკარგულების თანახმად, საქართველოს ეკონომიკისა და შინაგან საქმეთა სამინისტროებს დაევალათ, მოლაპარაკებები აწარმოონ კომპანია TUV Rheiland Group-თან, საქართველოს მთავრობის სახელით გასაფორმებელი მემორანდუმი შეიმუშაონ და მთავრობის სხდომაზე განსახილველად წარადგინონ. ტესტირებას საქართველოს ტერიტორიაზე არსებული და რეგისტრირებული ყველა კატეგორიის ავტოსატრანსპორტო საშუალება გაივლის და მას 22 აკრედიტებული ცენტრი უზრუნველყოფს. გვესაუბრება ტრანსპორტის პროფკავშირის პრეზიდენტი ლავრენტი ალანია:
- საერთოდ, ტექდათვალიერება ნიშნავს, რომ ქვეყანაში გამართული ავტოსატრანსპორტო საშუალებები უნდა დადიოდეს. მით უმეტეს, როცა ამ სფეროში საგანგაშო მდგომარეობაა და ავტოავარიებიც უფრო ხშირად იმით არის გამოწვეული, რომ ჩვენს გზებზე გაუმართავი ავტომანქანების ბუმია. რაც შეეხება ტექდათვალიერების ფასს, ფასის დადგენა ხდება იქიდან გამომდინარე, თუ რა უჯდება ამა თუ იმ კომპანიას ერთი მანქანის ტექდათვალიერება. ამიტომ, ფასები ოპერატორმა კომპანიამ უნდა დაადგინოს, აქედან გამომდინარე, ჯერჯერობით ძნელია ითქვას, რა შეიძლება იყოს ტექდათვალიერების ფასი. თუმცა, რაღაც ზღვარი უნდა დაწესდეს. ეს მომსახურება ათასი ლარი რომ გახდეს, ამას ბუნებრივია, ყველა წინ აღუდგება. TUV Rheiland Group, რომელთანაც მემორანდუმი უნდა გაფორმდეს, არის ოპერატორი კომპანია, რომელიც საერთაშორისო ბაზარზე დიდი ხანია არსებობს და მასზე ბევრი რამ იქნება დამოკიდებული. თუმცა, ჯერ ყველაფერი მხოლოდ მემორანდუმის დონეზეა და მოვლენებს წინ ნუ გავუსწრებთ, ვნახოთ, რა და როგორ იქნება. ამასთან, ძალიან ბევრი კითხვა ჩნდება, რომელიც ხელისუფლებას უნდა დავუსვათ: თუ ერთი კომპანია იქნება, ხომ არ იქნება ის მონოპოლიურ მდგომარეობაში? თანაც, დღეს საქართველოს ტერიტორიაზე რეგისტრირებულია 900 ათასამდე ავტოსატრანსპორტო საშუალება და რამდენად შეძლებს 22 ობიექტი მათ მომსახურებას? ჩემი აზრით, 22 ტესტირების ცენტრი ამ საქმეს არ ეყოფა.
- საკითხავია ისიც, რამდენი მანქანა ვერ გაივლის ტექდათვალიერების პროცედურას.
- შეგახსენებთ, რომ 1-ელ მარტამდე ყველას ეძლევა საშუალება თავისი ტრანსპორტი გამართოს. სამწუხაროდ, დღეს ამის კონტროლი არ არსებობს, უამრავი მანქანის მდგომარეობა არ შეესაბამება სტანდარტებს და თუ სიტუაცია არ გამოსწორდა, რეგისტრირებული 900 ათასი ავტომანქანიდან ნახევარზე მეტი შეიძლება ტექდათვალიერების გარეშე დარჩეს. მოგეხსენებათ, რომ ავტომანქანას უნდა ჰქონდეს კატალიზატორი, რომელიც გამონაბოლქვს ფილტრავს, უამრავ მანქანაში ის ამოღებულია, იმიტომ, რომ ავტომანქანას გაწევა არა აქვს. თითქმის ყველა უცხოური ტიპის ავტომანქანას აქვს ეს პრობლემა, ზოგს ხუნდები ან მუხრუჭები არა აქვს წესრიგში, ზოგს - ფარები და ა.შ… ასე რომ, 1-ელ მარტამდე ყველა მძღოლმა მანქანა წესრიგში უნდა მოიყვანოს და ეს სასიამოვნო სიახლეა.
- ხომ არ დააზარალებს ტექდათვალიერების შემოღება მოსახლეობის იმ ფენას, რომელსაც ძირითადად ძველი ავტომანქანები ჰყავს?
- რატომ დააზარალებს, როცა შეიძლება ამ ხალხმა მანქანა გამართოს? მანქანის სიძველეს, მის წლოვანებას მნიშვნელობა არა აქვს, მთავარი მისი ტექნიკური მდგომარეობაა. ასეთ დროს ერთი მარტივი კითხვა მიჩნდება - რა აზრი აქვს ტექნიკურად გაუმართავი ავტომანქანით სიარულს, ეს მანქანა დღეს თუ ხვალ ხომ მაინც გამოვა მწყობრიდან და გაჩერდება?
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
