მილიონები და რელიგია - ვინ როგორ მოახმარს საბიუჯეტო თანხებს რწმენას

"70 წლის განმავლობაში მიყენებულ ზიანს ეს თანხა ვერ განსაზღვრავს, ეს შეუძლებელია",  - ამის შესახებ რაბინის თანაშემწემ დიმა თაფლიაშვილმა განაცხადა, ანუ იმ რელიგიის წარმომადგენელმა, რომელსაც მალე სახელმწიფო დააფინანსებს.

საქართველოში მოქმედი რელიგური ორგანიზაციები ოთხი რელიგური აღმსარებლობის დაფინანსებასთან დაკავშირებით სახელმწიფოს ინიციატივას დადებითად აფასებენ.

ისლამური, იუდეური, რომაულ-კათოლიკური და სოხმური ეკლესიების დაფინანსებაზე Ambebi.ge თავად ამ რელიგიების წარმომადგენლებს ესაუბრა. მიუხედავად იმისა, რომ ისინი სახელმწიფოს ამ წინადადებას წინგადადგმულ ნაბიჯად აფასებენ, ნაწილს ფინანსების მიღებაზე საბოლოო გადაწყვეტილება ჯერ არ მიუღია.

ქართველ მუსლიმთა კავშირის ხელმძღვანელი ტარიელ ნაკაიძე ამბობს, რელიგური უმცირესობების დაფინანსების სახით სახელმწიფოს მხრიდან არსებული დამოკიდებულება მისასალმებელია. თუმცა მისი თქმით, ამ საკითხზე მათ რელიგიათა საბჭოში მსჯელობა აქვთ.

"ჩვენ რეკომენდაციის სახით მივაწოდეთ სახელმწიფოს, თუ რა ტიპის დაფინანსების სახე არის უფრო მისაღები ჩვენთვის და მე ვფიქრობ ჩვენს რეკომენდაციას სახელმწიფო გაითვალისწინებს. რაც შეეხება მუსლიმთა სამართველოს დაფინანსებას, ჩვენ, ზოგადად მუსლიმურ თემს გვაქვს სხვა შიდა პრობლემებიც. აღნიშნული მუსლიმთა სამმართველო არ არის დაფუძნებული მუსლიმთა მიერ და ამ სამმართველოს დაფინანსება უფრო მეტ საფრთხეს შეიცავს, ვიდრე რაიმე დადებითს. დაფინანსება დოტაციის სახით, რომელიც შემოგვთავაზეს, გარკვეულ წილად დახვეწას საჭიროებს. თუ ეს ზარალის მომტანი იქნება, მოვიქცევით ისე, როგორც სიტუაცია გვიკარნახებს. ვფიქრობთ, რომ სახელმწიფო ჩვენს დამოკიდებულებას გაითვალისწინებს", - აცხადებს ტარიელ ნაკაიძე.

მთავრობის გადაწყვეტილებას დადებითად აფასებენ იუდეურ ეკლესიაშიც. რაბინის თანაშემწე დიმა თაფლიაშვილი აცხადებს, რომ ეს სახელმწიფოს მხრიდან წინ გადაგმული ნაბიჯია, რადგან ეს რელიგიურ კონფესიებს მისცემს საშუალებას რაღაც პროექტები ჩამოაყალიბონ, დახარჯონ ეს თანხები კულტურული ნაგებობების აღდგენებზე, საგანმანათლებო პროექტებზე.

დიმა თაფლიაშვილი იმედოვნებს, რომ ის რელიგიური კონფესიები, რომლებიც ამ ინიციატივის მიღმა დარჩნენ, სახელმწიფოს არ დაავიწყდება და გააგრძელებს ამ მიმართულებით სვლას.

"რა თქმა უნდა, 70 წლის განმავლობაში ის ზიანი, რაც რელიგიას მიადგა, ვერ განისაზღვრება ამ თანხით. რა თქმა უნდა, ვფიქრობ, რომ არ იყო საკმარისი. პირველ რიგში მორალური ზიანი იყო, რეპრესიების თვალსაზრისით და იმ თვალსაზრისითაც, რომ შეუძლებელი იყო რელიგიური სწავლება, რიტუალების ჩატარება და ასე შემდეგ", - აღნიშნავს დიმა თაფლიაშვილი.

მთავრობის მიერ გამოყოფილ თანხას ყოველდღიურ საქმიანობაში გამოყენებას აპირებს სომეხთა სამოციქულო ეკლესია.

"ეს ძალიან მნიშვნელოვანი და წინგადადმული ნაბიჯია საქართველოში მოქალაქეთა ეთნიკური თუ რელიგური კუთვნილების, მოქალაქეთა თანასწორობის მიღწევის გზაზე. რა თქმა უნდა ჩვენ გვესმის, რომ ეს იმ მიყენებული ზარალის ნაწილობრივი კომპენსაციისკენ მიმართული ნაბიჯია და ძალიან მნიშვნელოვანია ის გარემოება, რომ მთავრობამ გადაწყვიტა პროპორციული მიდგომა დაემკვიდრებინა რელიგური უმცირესობებისადმი, რაც თანასწორობას ხელს უწყობს. კომპენსაციით მიღებულ თანხას გამოვიყენებთ ჩვენს ყოველდღიურ საქმიანობაში, ანუ ყველაფერ იმაში რაც შეიძლება ეკლესიას დასჭირდეს", - მიაჩნია სომხური ეკლესიის წარმომადგენელს ლევონ ისაკხანიანს.

შეფასებისგან თავს იკავებენ კათოლიკურ ეკლესიაში. ეპისკოპოსი ჟუზეპე პაზოტო ამბობს, რომ ამ თემაზე ისინი სპეციალურ შეკრებას გამართავენ.

"ჩვენ გადავწყვიტეთ შეფასება არ გავაკეთოთ ამ თემაზე. ჩვენ გვექნება ერთი შეკრება, რომელზეც შევაფასებთ, რა არის კარგი და რა – არა", - აცხადებს ჟუზეპე პაზოტო.

ოთხი რელიგიის დაფინანსებას ნეგატიურად აფასებს ევანგელისტურ-ბაპტისტური ეკლესიის ეპისკოპოსი რუსუდან გოცირიძე; ეს რელიგია დაფინანსებას სახელმწიფოს მხრიდან ჯერჯერობით ვერ მიიღებს.

"ჩემი ეკლესიის მიდგომა ასეთია - სამწუხაროდ, ამ ახალი ინიციატივით, უთანასწორობისა და იერარქიული დამოკიდებულების ახალი, პრივილეგირებულთა საფეხური შეიქმნა. პრივილეგირებულნი არიან რელიგიები, რომლებსაც სახელმწიფო მიიჩნევს ტრადიციულ რელიგიად", - განაცხადა რუსუდან გოცირიძემ.

რელიგიური კონფესიებისთვის ბიუჯეტიდან თანხების გამოყოფას დადებით მოვლენად მიიჩნევს საქართველოს საპატრიარქო. ამის შესახებ საქართველოს საპატრიარქოს მიერ გავრცელებულ განცხადებაშია ნათქვამი.

"მთავრობის დადგენილებას "საქართველოში არსებული რელიგიური გაერთიანებებისათვის საბჭოთა ტოტალიტარული რეჟიმის დროს მიყენებული ზიანის ნაწილობრივ ანაზღაურებასთან დაკავშირებული ზოგიერთი ღონისძიების განხორციელების წესის" დამტკიცების თაობაზე, საქართველოს საპატრიარქო დადებით მოვლენად მიიჩნევს. საბჭოთა რეჟიმმა საქართველოს მართლმადიდებელი ეკლესიის გარდა სხვა რელიგიებიც დააზარალა და მთავრობის ეს ნაბიჯი სამართლიანობის აღდგენის გამოხატულებაა", - ნათქვამია განცხადებაში.

შეგახსენებთ, რომ ბიუჯეტიდან დაფინანსებას ოთხი რელიგიური მიმართულება - ისლამური, იუდეური, რომაულ-კათოლიკური და სომხური ეკლესიები მიიღებენ. შერიგებისა და სამოქალაქო თანასწორობის საკითხებში საქართველოს სახელმწიფო მინისტრის პაატა ზაქარეიშვილის განცხადებით, თემა არ დახურულა და სხვა მიმართულებებზეც მიმდინარეობს მუშაობა. "ჯერჯერობით საუბარია ზოგად თანხაზე, რომელიც პროპორციულად განაწილდება. თანხის ზედა ზღვარი 4,5 მილიონი ლარით განისაზღვრება", - აღნიშნა ზაქარეიშვილმა.

გიორგი დადიანი, Ambebi.ge