თეა წულუკიანი - მოვუწოდებ კლინიკებს, გამორიცხონ გაუგებარი SMS-ების გზავნა ქალებისთვის სუროგაციის შეთავაზებაზე

შოკისმომგვრელი იყო ის ხმაური, რაც მოჰყვა პატრიარქის ეპისტოლეს, - ამის შესახებ საქართველოს იუსტიციის მინისტრმა თეა წულუკიანმა "რუსთავი 2"-ის გადაცემა "პოზიციაში" განაცხადა.

მისი განმარტებით, სასულიერო ხელისუფლების ხელმძღვანელს აქვს უფლება, თავისი აზრი გამოთქვას და საკუთარ მრევლს შეაგონოს ან აუხსნას ის, რაც არის სწორი, რელიგიური დოგმებიდან გამომდინარე. თუმცა, როგორც წულუკიანი აღნიშნავს, ის იზიარებს ყველა იმ ოჯახის ტკივილს, რომელსაც ხელოვნური განაყოფიერებით ყავს შვილი და გამოხატა ტკივილი ეპისტოლეს მიმართ.

"ჩემთვის შოკისმომგვრელი იყო ის ხმაური რაც მოჰყვა პატრიარქის ეპისტოლეს. სასულიერო ხელისუფლების ხელმძღვანელს აქვს უფლება თავისი აზრი გამოთქვას და საკუთარ მრევლს შეაგონოს და აუხსნას ის, რაც არის რელიგიური დოგმებიდან გამომდინარე სწორი. თუმცა, რა თქმა უნდა მე მესმის და ვიზიარებ ყველა იმ ტკივილს, რომელიც გამოხატა ბევრმა ოჯახმა, რომელსაც სამედიცინო ჩარევის გზით, ვგულისხმობ ხელოვნურ განაყოფიერებას, შეეძინა ბავში. ჩვენ ვართ მცირე ერი. ბევრი ომის შემდეგ, ძალიან ბევრი დაუოჯახებელი ქალისა და მამაკაციდან გამომდინარე, დაგვიანებით შექმნილი ოჯახებიდან გამომდინარე, სხვადასხვა პრობლემიდან გამომდინარე, მათ აქვთ საშუალება იყოლიონ მომავალი თაობა ხელოვნური გზით. მე ამ პრინციპს ვიზიარებ და ვიზიარებ იმ სიხარულს, რომელიც განიცადეს იმით, რომ მათ ჰყავთ შვილები ამ გზით. ხელოვნური განაყოფიერება არის მისასალმებელი იმისთვის, რომ უშვილო წყვილს გაუჩნდეს შვილი", - აღნიშნა წულუკიანმა.

რაც შეეხება სუროგაციას, წულუკიანის განცხადებით, საქართველოს მთავრობა ამ მიმართულებით მუშაობს რეგულაციაზე, რათა სუროგაცია არ იყოს ბიზნესად ქცეული.

"რაც შეეხება სუროგაციას. ბევრ ქვეყანაში სუროგაცია არის აკრძალული, ჩვენ ქვეყანაში ეს აკრძალული არ არის. მაგრამ, ძალიან ბევრი ოფიციალური ვიზიტის დროს, თუნდაც ბრიტანეთში და ევროკავშირის ქვეყნებში, ჩემთვის დაუსვამთ კითხვა, თუ რატომ არ არის რეგულირებული ჩვენთან სუროგაცია. კანონპროექტი ჩვენთან მზადდება. მე ამ ეტაპზე მისი პრინციპების თქმისგან თავს შევიკავებ. ჩვენ არ ვისახავთ მიზნად ავკრძალოთ სუროგაცია, რადგან ბევრი უიმედოდ განწყობილი წყვილისთვის ეს არის ბოლო შველა. ჩვენ გვინდა საბოლოოდ გამოვრიცხოთ საქართველოში, რომ სუროგაცია იყოს ბიზნესი და ფულის კეთების წყარო. ჩვენ გვინდა დავაწესოთ რეგულაციები. ევროპელმა კოლეგებმა მოითხოვეს ამის რეგულაცია, რადგან ჩვენ ვხვდებით ევროპული სივრცის ნაწილი. ადამიანის სიცოცხლის ყიდვა უნდა იყოს გამორიცხული", - აღნიშნა წულუკიანმა.

ის ასევე მოუწოდებს სხვადასხვა კლინიკებს, გამორიცხონ გაუგებარი SMS-ების გზავნა ქალებისთვის სუროგაციის შეთავაზებაზე. "ყველა იმ კლინიკას მინდა მოვუწოდო, რომელიც ამით არის დაკავებული, გამორიცხონ გაუგებარი SMS-ების გზავნა. ამაში ვგულისხმობ იმას, რომ ქალბატონები ღებულობენ მოკლე ტექსტურ შეტყობინებებს და სთავაზობს ესა თუ ის კლინიკა, რომ გახდნენ სუროგატი დედები ამა თუ იმ ფასის ნაცვლად. ეს არ არის აკრძალული, მაგრამ სანამ აიკრძალება, მე მათ ამისკენ მოვუწოდებ", - აღნიშნა წულუკიანმა.

"ინტერპრესნიუსი"