მნიშვნელოვანი ინფორმაცია
6
ივნისიდღის ზოგადი ასტროლოგიური პროგნოზი
პარასკევი, მთვარის მეთერთმეტე დღე დაიწყება 17:02-ზე, მთვარე სასწორშია – ერთ-ერთი ყველაზე ენერგიული, წარმატებული და ძლიერი დღეა. ნებისმიერი დავალების შესრულებისას საჭიროა სიფრთხილე და ყურადღება. იმოქმედეთ გადამწყვეტად, ბიზნესში თუ სამსახურში. განხორციელდეთ ის, რაც ჩაფიქრებული გქონდათ. გააფორმეთ კონტრაქტები, დაიკავეთ ახალი პოზიცია. დაასრულეთ რაც დაიწყეთ. დღის საუკეთესო საკვებად ითვლება წვენები და ხილი. გამოიჩინეთ მზრუნველობა და სიყვარული საყვარელი ადამიანის მიმართ, მიართვათ საჩუქარი.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
სტრესი, უძილობა - გარემოებები, რომლებსაც ყურადღებას არ ვაქცევთ, შეიძლება სიბრმავის მიზეზი გახდეს
23:11 / 24-01-2014
რამ შეიძლება შეუქმნას თვალს პრობლემა და რა ახდენს გავლენას მხედველობის დაქვეითებაზე. გვესაუბრება მედიცინის დოქტორი, ექიმი-ოფთალმოლოგი ლუიზა ცომაია:
- მხედველობის გაუარესებაზე ბევრი ფაქტორი მოქმედებს, მათ შორის სინათლე. არასაკმარისი ან არასწორი განათება მხედველობისთვის ერთგვარ სტრესულ ფაქტორს წარმოადგენს და იწვევს არა მარტო თვალის, არამედ ზოგადი დაავადებების პროვოცირებას. არსებობს სპეციალური ხელსაწყო - ლუქსომეტრი (მისი შეძენა შეიძლება განათების ტექნიკის მაღაზიაში), რომლის საშუალებითაც ხდება სინათლის რეჟიმის კონტროლი. საშუალოდ, აუცილებელი განათება არ უნდა იყოს 200 ლუქსზე დაბალი, კითხვისა და წერის დროს საკმარისია 400 ლუქსი, ხატვისა და კერვისთვის - 600 ლუქსი. უნდა აღინიშნოს ის ფაქტიც, რომ 60 წლის ზემოთ საჭირო სინათლის მოთხოვნილება 2-ჯერ მეტია.
- რომელი განათებაა თვალისთვის ყველაზე სასარგებლო?
- ბუნებრივი განათება, ის მაქსიმალურად უნდა გამოვიყენოთ. ამ განათებას ჩვენ ბუნება გვაძლევს, ის არა მარტო იცავს თვალს გადაღლისაგან, არამედ გამაჯანსაღებელი თვისებაც გააჩნია. ამ დროს უმჯობესდება ხასიათი, იმუნიტეტი, სინათლის ნაკლებობა კი იწვევს ჰიპოტონიას, ხშირ გაცივებას, გულ-სისხლძარღვთა დაავადებებს, ვითარდება ახლომხედველობა. საღამოს საათებში მხედველობის დატვირთვის დროს, დიდი მნიშვნელობა ენიჭება სინათლის წყაროს მდებარეობას. ამ დროს სინათლის წყარო უნდა იყოს მოთავსებული მარცხნივ. მაგიდის ნათურის განათებასთან ერთად საჭიროა ზოგადი განათება.
- ყველაზე ხშირად თვალის რა დაავადებებთან გიხდებათ შეხება?
- ყველაზე ხშირია თვალის ანთებები, მათ წარმოქმნას კი მრავალი მიზეზი განაპირობებს. მაგალითად, თვალში რაიმე ინფექციის მოხვედრა, ალერგია, ტრავმა, შემაერთებელი ქსოვილების სისტემური დაავადება, ავიტამინოზი, ულტრაიისფერი გამოსხივება და სხვა. ნებისმიერი ანთებითი პროცესის დროს დაუყოვნებლივ უნდა დაინიშნოს სათანადო მკურნალობა. რაც უფრო გვიან იწყება თერაპია, მით უფრო იზრდება ანთებითი პროცესის გართულების შანსი, რამაც შემდგომში, შესაძლოა, მხედველობის დაქვეითება ან მხედველობის დაკარგვაც კი გამოიწვიოს. ამიტომ თვალის "უმნიშვნელო" შეწითლების შემთხვევაშიც კი, რომელიც 1-2 დღეში თავისით არ გადის, ექიმს უნდა მიმართოთ. თვალის ანთებებს შორის ყველაზე ხშირია კონიუნქტივიტი, კერატიტი (რქოვანას ანთება) და სხვა.
- საკმაოდ გავრცელებულია ასტიგმატიზმი და საჭიროა თუ არა მისი კორექცია?
- ეს ის დაავადებაა, რომლის დროსაც ადამიანი ბუნებრივი, მკვეთრი გამოსახულების ნაცვლად დეფორმირებულსა და არამკვეთრ გამოსახულებას ხედავს. ასეთი ადამიანი ცუდად ხედავს საგნებს როგორც შორ, ასევე ახლო მანძილზე. ოკულისტების აზრით, მსოფლიოს მოსახლეობის 85%-ს ასტიგმატიზმის მცირე დოზები აღენიშნება, რომელიც მხედველობაზე არ მოქმედებს. მოსახლეობის 15% კი ასტიგმატიზმის კორექციას საჭიროებს. კორექცია გულისხმობს როგორც სათვალის ან კონტაქტური ლინზების ტარებას, ასევე ოპერაციას.
- რა არის ასტიგმატიზმის მიზეზი?
- ძირითადად ის მემკვიდრეობითია. შეძენილი ასტიგმატიზმი უმეტესად ბადურას ტრავმებისა ან თვალებზე გადატანილი ქირურგიული ოპერაციების შედეგია. ასტიგმატიზმის მიზეზია თვალის ოპტიკური სისტემის ლინზების არასწორი ფორმები. ყველაზე ხშირად მას ბადურას სიმრუდე იწვევს. ნორმალურ ბადურას სფეროს ფორმა გააჩნია, ანუ ბადურას გარდამტეხი ძალა ვერტიკალურ და ჰორიზონტალურ სიბრტყეებზე თანაბარია, ასტიგმატიზმის დროს კი ბადურას გარდამტეხი ძალა ამ სიბრტყეებზე არათანაბარია. ამის გამო ადამიანი საგნებს დამახინჯებულად და არამკვეთრად აღიქვამს. ასტიგმატიზმი არსებობს ახლომხედველი და შორსმხედველი, ან ორივე ერთდროულად.
- რას იტყოდით გლაუკომაზე, შესაძლოა თუ არა ამ დაავადებამ სიბრმავე გამოიწვიოს?
- სავსებით შესაძლებელია. მისთვის დამახასიათებელია თვალის შიგა წნევის მუდმივი ან პერიოდული აწევა. თუ თვალის წნევა დროულად არ დარეგულირდება (ნორმამდე არ დაიწევს), თანდათანობით იწყება მხედველობის ნერვის ატროფია, რაც სიბრმავეს იწვევს. ამიტომ, 40 წელზე უფროსი ასაკის ადამიანებმა ყურადღება უნდა მიაქციონ მხედველობას, განსაკუთრებით კი მათ, ვის გვარშიც გლაუკომით დაავადებული ადამიანები იყვნენ, რადგან ამ დაავადებას მემკვიდრეობითობა ახასიათებს. ნებისმიერი არასასიამოვნო შეგრძნების, მხედველობითი დისკომფორტის, პერიოდულად მხედველობის დაბუნდოვნების ან ლამპის შუქის ცქერისას, ცისარტყელას მსგავსი წრეების წარმოქმნის შემთხვევაში, ადამიანმა აუცილებლად ოფთალმოლოგს უნდა მიმართოს. გლაუკომის მთლიანი განკურნება შეუძლებელია, რადგან მას ქრონიკული მიმდინარეობა ახასიათებს, მაგრამ თუ მკურნალობას დროულად დაიწყებენ, დაავადების განვითარების შეჩერება შესაძლებელია.
გარდა ამისა, მინდა აღვნიშნო, რომ მხედველობის დაქვეითებაზე არასწორი განათებისა და სხვა უამრავი გარე ფაქტორის გარდა, მნიშვნელოვნად მოქმედებს სტრესი, უძილობა. ძლიერმა სტრესმა შესაძლოა მხედველობის მკვეთრი გაუარესება გამოიწვიოს.
ლიკა კერატიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები კიევიდან - რუსებმა ქალაქს დრონებით და რაკეტებით დაარტყეს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
