"ჯინსების თაობაში" მღვდლის როლს ჯეისონ ფლემინგი შეასრულებს" - რა ეტაპზეა ფილმი "თვითმფრინავის ბიჭებზე"

როგორც ცნობილია, ლოს-ანჯელესის კინოსკოლის კურსდამთავრებული, ქართველი რეჟისორი ნიკოლოზ ხომასურიძე "თვითმფრინავის ბიჭებზე" ფილმის გადაღებას გეგმავს. გადაღებები მართალია საქართველოში გაიმართება, მაგრამ როგორც პროექტის იდეის ავტორი, რეჟისორი და პროდიუსერი ნიკოლოზ ხომასურიძე ამბობს, ეს "ჰოლივუდფროდაქშენი" იქნება.

"ამბები.გე" ნიკოლოზ ხომასურიძეს დაუკავშირდა და დაინტერესდა, რა ეტაპზეა დღეს პროექტი.

- ფილმის ეკრანიზება საქართველოში მოხდება, თუმცა ის "ჰოლივუდფროდაქშენი" იქნება, რადგანაც შემოქმედები თუ ჯგუფის ძირითადი ნაწილი და მსახიობები იქიდან იქნებიან და ფილმს ცხადია, ინგლისურ ენაზე წარვადგენთ...

- ამ პროექტის იდეა უშუალოდ შენ გეკუთვნის?

- კი, ეს იდეა სამი წლის წინ გამიჩნდა. თავისთავად ეს ამბავი ვიცოდი, მერე დათო ტურაშვილის წიგნი - "ჯინსების თაობა" წავიკითხე, რომელიც ძალიან მომეწონა. კარგი დაწერილია, ტრაგიკული ამბავი საინტერესოდ იკითხება. მასში ბევრი კინოსთვის საჭირო ელემენტია და ამ მხრივაც ძალიან მიმიზიდა. შემდეგ შეხვდით დათო ტურაშვილს და მისგან უფლება შევიძინეთ, რომ ამ წიგნზე დაყრდნობით, მუშაობა დაგვეწყო. ლოს-ანჯელესიდან სცენარისტი, თომას დანიც ჩამოვიყვანეთ (მოკლედ, ამ პროექტს მე და ჩემი ბავშვობის მეგობარი, გიორგი ქავთარაძე ვაკეთებთ). დანი "თვითმფრინავის ბიჭების" ოჯახის წევრებს, კერძოდ, გეგა კობახიძის დედას, ქალბატონ ნათელა მაჭავარიანს შეხვდა, ასევე იყო ძმები ივერიელების ოჯახშიც, აეროპორტის თანამშრომლებთან, იმ თვითმფრინავში მყოფ მგზავრებთან... მოკლედ, საქმე მთლიანად შევისწვალეთ (სასამართლოს დადგენილება, დაკითხვის ოქმები). ამ ყველაფერზე დაყრდნობით კი, ტომმა სცენარი დაწერა, რომელმაც მოწონება დაიმსახურა. შეხვედრა გვქონდა ინვესტორებთან, მსახიობებთან. მოკლედ, სერიოზული მზადების პროცესში ვართ. ვინაიდან მასშტაბური პროექტია, მოსამზადებლად დიდი დრო გვჭირდება. სცენარი 9 თვის განმავლობაში იწერებოდა.

- მსახიობები უკვე შეარჩიეთ?

- თებერვლის ბოლოს მსახიობების შესარჩევად ქასთინგს ჩავატარებთ. საქართველოში უკვე გვქონდა ქასთინგი და ქართველი მსახიობები შევარჩიეთ.

- შეიძლება მათი დასახელება?

- კი, შევარჩიეთ დათო ბეშიტაიშვილი და ლაშა კანკავა, კარგი არტისტები არიან. ლაშა რუსთავის თეატრიდან არის, დათო - მუსკომედიიდან. ისე, ფილმში უმეტესად ბრიტანელი და ამერიკელი მსახიობები დაკავდებიან. მაისში კი საბოლოო ქასთინგს ჩავატარებთ... ამ წუთისთვის, რაც ნამდვილად ვიცით, უცხოელებიდან ჯეისონ ფლემინგი იქნება. საკმაოდ ცნობილი მსახიობია და ჩემი მეგობარიც...

- მას ფილმში რა როლი აქვს?

- მღვდლის, თემურ ჩიხლაძის როლზე დავაკავებთ...

- ედუარ შევარდნაძის პერსონაჟი თუ მიიღებს ფილმში მონაწილეობას?

- კი, რა თქმა უნდა, ეს ერთ-ერთი მთავარი როლია. მასზე სავარაუდო მსახიობიც გვყავდა შერჩეული, მაგრამ ქასთინგზე შეიძლება, შეიცვალოს. მთავარ როლებზე როგორც გითხარით, ინგლისურენოვანი მსახიობები უნდა იყვნენ. ეს იქნება ერთ-ერთი ჰოლივუდური ფილმი. მოკლედ, ძალიან ძლიერი გუნდი გვყავს.

- გადასაღებ მოედანზე როდის გადაინაცვლებთ და ამ ეტაპზე რა არის ამისთვის საჭირო?

- ყველაფერი ქასთინგზეა დამოკიდებული. ისეთი მსახიობები გვინდა, რომელბიც ეფექტურები იქნებიან და პროექტს ხელს შეუწყობენ, რომ კარგი გამოვიდეს. საბოლოოდ რომ შევთანხმდებით, გადაღებებსაც იმის მიხედვით დავგეგმავთ, სავარაუდოდ კი, სექტემბერ-ოქტომბერში...

- ვინ იქნება ფილმის კომპოზიტორი?

- ძალიან ცნობილი კომპოზიტორი უნდა იყოს, რადგანაც სპეციფიკური პროექტია და აქ რისკი არ შეიძლება... ამასთან, პროექტისთვის ამერიკელი პროდიუსერიც შევიძინეთ, რომელსაც სწორი გზით მივყავართ ისე, როგორც დიდი პროექტების განვითარება ხდება ხოლმე.

- ფილმს "ჯინსების თაობა" ერქმევა?

- სამუშაო სათაურებია: "ჯინსების თაობა", "გაფრენა თავისუფებისკენ", მაგრამ ვფიქრობთ, რომ "ჯინსების თაობას" ვერ დავარქმევთ, რადგანაც უცხოელი მაყურებლისთვის რთული გასაგები იქნება, რას ნიშნავს "ჯინსების თაობა" და სხვა მიმართულებით წავალთ...

- რამდენი იქნება ფილმის ბიუჯეტი?

- ეს საკითხი კონფიდენციალურია და თან, ინვესტორთან შეთანხმება კვლავაც მიმდინარეობს... ძალიან დიდი ბიუჯეტიც არ იქნება, რადგანაც ყველამ იცის ჩვენი შესაძლებლობები.

ლალი ფაცია

სპეციალურად "ამბები.გე"-სთვის