გიორგი მარგველაშვილი, შოთა არველაძე და ზურა ხიზანიშვილი თურქეთის პრეზიდენტის სასახლეში (+ფოტოგალერეა)
საქართველოს პრეზიდენტის პატივსაცემად, თურქეთის პრეზიდენტის სასახლეში ოფიციალური სადილი გაიმართა. როგორც საქართველოს პრეზიდენტის პრესსამსახურში აცხადებენ, პრეზიდენტ გიორგი მარგველაშვილის ოფიციალური ვიზიტი ანკარაში თურქეთის პრეზიდენტის "ჩანკაიას" სასახლეში გამართული სადილით დასრულდა.
მათივე ინფორმაციით, საქართველოსა და თურქეთის ლიდერებმა ოფიციალურ სადილზე თურქეთ-საქართველოს პარტნიორულ ურთიერთობებსა და თანამშრომლობის გაღრმავების შესაძლებლობებზე ისაუბრეს.
"უპირველესად, კიდევ ერთხელ მინდა მივულოცო თქვენს აღმატებულებას საქართველოში 27 ოქტომბრის არჩევნებში ქვეყნის პრეზიდენტად არჩევა. გვსურს, რომ წელს დასრულდეს "თანამედროვე აბრეშუმის გზად" წოდებული "ერთობლივი მარშრუტის" შემადგენელი ერთ-ერთი მნიშვნელოვანი მონაკვეთის - ბაქო-თბილისი-ყარსის სარკინიგზო მაგისტრალის პროექტი. ასევე, გადაწყვეტილი გვაქვს, ბუნებრივი გაზის სამხრეთი დერეფნის ერთ-ერთი უმნიშვნელოვანესი ნაწილი - ტრანსანატოლიის გაზსადენის პროექტი (TANAP) - განხორციელდეს ჩვენს ქართველ და აზერბაიჯანელ ძმებთან ერთად. ჩვენი სურვილია, რომ საქართველოსთან ერთად განვახორციელოთ ახალი პროექტები. გავხსნათ ახალი სასაზღვრო-გამშვები პუნქტები, განვავითაროთ კომუნიკაციები და ამით ხელი შევუწყოთ ჩვენი ურთიერთობის კიდევ უფრო განმტკიცებას. ქართველი მეგობრების ანალოგიური მტკიცე ნება ჩვენი ურთიერთობის ბრწყინვალე მომავლის საწინდარია", - განაცხადა სიტყვით გამოსვლისას თურქეთის პრეზიდენტმა აბდულა გიულიმ.
სადილზე დამსწრე საზოგადოებას საქართველოს პრეზიდენტი მიესალმა და თურქეთ-საქართველოს მეგობრობის სადღეგრძელოც შესვა.
"ვსარგებლობ შემთხვევით და მინდა, გულითადი მადლობა გადავუხადო დღეს წარმოდგენილ საზოგადოებას - ადამიანებს, რომელთაც დიდი წვლილი შეაქვთ ორი ქვეყნის მეგობრობისა და პარტნიორობის განმტკიცებაში. აღნიშვნის ღირსია ის ფაქტი, რომ ორმხრივი სავაჭრო ბრუნვა ყოველწლიურად იზრდება. არსებული პოტენციალის გათვალისწინებით, უნდა მოხდეს სავაჭრო-ეკონომიკური ურთიერთობების შემდგომი გაღრმავებისა და საინვესტიციო პროექტების ხელშეწყობა, რაც ორი ქვეყნის ბაზრებზე ჩვენი ეროვნული პროდუქციის წარმოჩენისათვის დამატებითი სტიმული იქნება", - აღნიშნა საქართველოს პრეზიდენტმა.
საპრეზიდენტო სადილს თურქეთის რესპუბლიკის მთავრობის წევრები, თურქეთში აკრედიტებული დიპლომატიური კორპუსი, ხელოვნების, სპორტისა და ბიზნესის სფეროს წარმომადგენლები ესწრებოდნენ. მათ შორის იყვნენ ქართველი სპორტსმენები შოთა არველაძე და ზურა ხიზანიშვილი.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
