ჯეიმს ინჰოფი - ჩვენ მკაცრად ვგმობთ რუსეთის მიერ საქართველოს ტერიტორიების ოკუპაციას
ჩვენ მკაცრად ვგმობთ რუსეთის მიერ საქართველოს ტერიტორიების ოკუპაციას, - ამის შესახებ აშშ-ის დელეგაციის ხელმძღვანელმა, სენატორმა ჯეიმს ინჰოფმა გუშინ, პრემიერ-მინისტრ ირაკლი ღარიბაშვილთან შეხვედრის შემდეგ ჟურნალისტებს განუცხადა.
სენატორ ინჰოფის თქმით, ამერიკა ღრმად შეშფოთებულია რუსეთის მცდელობით, გაზარდოს ოკუპირებული ტერიტორიების ფართობი.
"ჩვენ მკაცრად ვგმობთ რუსეთის მიერ დამატებითი ტერიტორიების ოკუპაციას, რასაც ადგილი ჰქონდა ბოლო პერიოდში. ეს საფრთხეს უქმნის საქართველოს სუვერენიტეტს. 2008 წლის სამხედრო შემოჭრის ხუთი წლისა და ეკონომიკური ემბარგოს შემდეგ რუსეთის ეს ქმედებები საფრთხეს უქმნის საქართველოს და მისი ხალხის თავისუფალ არჩევანს დამოუკიდებლობის თვალსაზრისით. ეს წარმოადგენს საფრთხეს ქართველი ხალხის თავისუფალი არჩევანისა, ევროპულ და ევროატლანტიკურ სტრუქტურებში ინტეგრაციის შესახებ. ჩვენ მტკიცედ ვუჭერთ მხარს საქართველოს მისწრაფებას ნატო-ში გაწევრიანებისკენ და მადლიერები ვართ იმ წვლილისთვის, რომელიც საქართველოს ავღანეთის საერთაშორისო მისიაში შეაქვს. ჩვენ მოვუწოდებთ რუსეთს, შეწყვიტოს აგრესიული ქმედება საქართველოს წინააღმდეგ, იმ ქვეყნის წინააღმდეგ, რომელმაც უკანასკნელ პერიოდში ჩაატარა ორი დემოკრატიული არჩევნები. ჩვენ ასევე მოვუწოდებთ რუსეთს, ჩაერთოს ჟენევის მოლაპარაკებების პროცესში. ჩვენ მსოფლიოში არ გვყავს საქართველოზე უკეთესი მეგობარი", - განაცხადა სენატორმა ინჰოფმა.
ამერიკელ სენატორთა და კონგრესმენთა შეხვედრა პრემიერ-მინისტრ ირაკლი ღარიბაშვილთან დაახლოებით ერთ საათს გაგრძელდა. შეხვედრას საქართველოს მინისტრთა კაბინეტის რამდენიმე წევრიც ესწრებოდა, მათ შორის საგარეო საქმეთა, თავდაცვის, იუსტიციის მინისტრები და სახელმწიფო მინისტრი ევროინტეგრაციის საკითხებში.
მასწავლებელი ოკუპირებული აფხაზეთიდან, რომელიც საქართველოს 5 საუკეთესო პედაგოგს შორისაა, მისი წიგნები კი ბესტსელერია
"სიკვდილ-სიცოცხლის არჩევანის წინაშე გვაყენებენ, მიგრაცია გარდაუვალია" - უვადოდ ჩაკეტილი ახალგორის გზა და ცხოვრება იზოლაცაში
