1
ივნისიდღის ზოგადი ასტროლოგიური პროგნოზი
მას შემდეგ, რაც რეჟისორმა რობერტ სტურუამ, ქართული თეატრის დღეს, "ფეისბუქის" საკუთარ გვერდზე თეატრების წინ ვარსკვლავის გახსნის შესახებ თავისი უარყოფითი დამოკიდებულება გამოხატა, "ამბები.გე" კულტურის პალატის პრეზიდენტს და ვარსკვლავების გახსნის ცერემონიის ორგანიზატორს, დავით ოქიტაშვილს დაუკავშირდა და კომენტარი სთხოვა:
- ნებისმიერი ადამიანის აზრს მივესალმები, მაგრამ უნდა გითხრათ, რომ არც ერთი ვარსკვალავი თეატრის ხელმძღვანელებთან შეთანხმების გარეშე არ გაგვიხსნია. ინიციატივა ყოველთვის მათგან მოდიოდა. ჩვენ მხოლოდ შემსრულებლები ვიყავით და ვართ. ეს რომ ასეა, ამის დამადასტურებელი არაერთი დოკუმენტი მაქვს და შემიძლია, წარმოგიდგინოთ. დიახ, მოგვმართავს თეატრის ხელმძღვანელობა და მათ თხოვნას შემდგომ ჩვენ ვახორციელებთ. თეატრების ადმინისტრაცია ვარსკვლავის გახსნას უმეტესად ამა თუ იმ ღვაწლმოსილი ადამიანის საიუბილეო თარიღს ამთხვევს ხოლმე.
- ე.ი. თქვენი ინიციატივით საქართველოში ვარსკვლავი არ გახსნილა?
- ვიმეორებ, ჩვენი ინიციატივით საქართველოში ვარსკვლავი არ გახსნილა, ჩვენ მხოლოდ შემსრულებლები ვართ. ბატონ რობერტს აქვს თავისი მოსაზრება და ყველა განსხვავებულ აზრს მივესალმები. თუკი მიიჩნევენ, რომ ეს ყველაფერი პროვინციალიზმია, შეუძლიათ, რუსთაველის თეატრის წინ აღარ გახსნან ვარსკვლავი. თუმცა ღმერთმა გვიმრავლოს ნიჭიერი და გამოჩენილი ადამიანები, ისეთები, ვისაც ჩვენში ვარსკვლავი გაეხსნათ. როგორ გგონიათ, რამაზ ჩხიკვაძის, კარლო საკანდელიძის, გურამ საღარაძის, მედეა ჩახავას სურვილის წინააღმდეგ გაიხსნა მათი ვარსკვლავები?
საერთოდ, ყველა ვარსკვლავი მათ სიცოცხლეშია გახსნილი. ერთადერთი შემთხვევა იყო გამონაკლისი, როცა გარდაცვალების შემდეგ, "რუსთაველის" კინოთეატრის წინ ნატო ვაჩნაძის ვარსკვლავი გაიხსნა. ვინაიდან მისი საფლავი არ არსებობს, მის ვარსკვლავს რაღაც სიმბოლური დატვირთვა მიენიჭა. თან, "რუსთაველის" კინოთეატრი ხომ მის სახელს უკავშირდება.
- ვარსკვლავების გახსნის პროცესი კვლავაც გაგრძელდება?
- დიახ, 22 იანვარს თემურ წიკლაურის ვარსკვლავი გაიხსნება. ამასთან დაკავშირებით, თხოვნით კომპოზიტორთა კავშირმა მოგვმართა. არასოდეს ავიღებ ჩემს თავზე იმას, რომ თვითონ გადავწყვიტო, ვის გაეხსნას საქართველოში ვარსკვლავი და ვის - არა. ერთადერთი, რაც საკუთარ თავზე ავიღე, ეს ნინო რამიშვილის ვარსკვლავი იყო (ფილარმონიასთან), როცა საერთოდ საფუძველი ჩაეყარა ამ ცერემონიას. ნინო რამიშვილს რა, ან ვისი წერილი სჭირდებოდა?..
რამაზ ჩხიკვაძის სახეს კი ვერასდროს დავივიწყებ. უბედნიერესი ადამიანი გახლდათ, როდესაც მისი ვარსკვლავი ნახა. როგორ გგონია, თეატრის ტერიტორიაზე ვარსკვლავს რობერტ სტურუასთან შეთანხმების გარეშე ვინ გახსნიდა? თუ არ უნდოდა და არ მოსწონდა, მაშინ აეკრძალა ეს ყველაფერი.
- ის თავის წერილში ამბობს, რომ წლების განმავლობაში ვიბრძოდი ამის წინააღმდეგო...
- ვიმეორებ, მისი სურვილი რომ არ ყოფილიყო, ვის რა უფლება ჰქონდა, რუსთველის თეატრის წინ ვარსკვლავი გაეხსნა.
ასევე იხილეთ: რობერტ სტურუას ვარსკვლავებზე ასფალტის გადასხმის სურვილი აქვს
ლალი ფაცია, Ambebi.ge
