17
ივლისიდღის ზოგადი ასტროლოგიური პროგნოზი
სამსახურებრივი მოვალეობის არაჯეროვნად შესრულების მოტივით, ბათუმის #2 საბავშვო ბაღის გამგე და რამდენიმე თანამშრომელი სამსახურიდან გაათავისუფლეს.
როგორც ბათუმის ბაღების გაერთიანების დირექტორმა, ნატალია ზაქარეიშვილი განაცხადა, "მონიტორინგის დროს 10 გოგონა საპირფარეშოში ნახევრადშიშველ მდგომარეობაში ნახა, რაც ბავშვთა სწორად აღზრდისთვის მიუღებელია".
"გუშინ, 16:00 საათზე ვეწვიე მეორე საბავშვო ბაღს და აღმოვაჩინე დარღვევა. საპირფარეშოში დავინახე ათი გოგონა, რომლებსაც საცვლები ჩაძრობილი ჰქონდათ და იყვნენ ნახევრად შიშვლები. მათთან პედაგოგიც იყო. ეს არის მიუღებელი აღზრდისთვის. მივიღე სათანადო ზომები - ბაღის გამგე, მეთოდისტი და პედაგოგი გავათავისუფლე სამსახურიდან", - აღნიშნა ნატალია ზაქარეიშვილმა.
მისივე განმარტებით, #2 საბავშვო ბაღის გამგე ნანა ირემაშვილს სამსახურიდან წასვლის შესახებ განცხადება არ დაუწერია, რის გამოც მისი გათავისუფლების შესახებ ბრძანებას ბაღების გაერთიანება მოამზადებს.
ნანა ირემაშვილი ბათუმის საკრებულოში იმყოფება. ასევე, საკრებულოში იმყოფებოდა გათავისუფლებული პედაგოგი თინათინ გოგიტიძე. როგორც მან განაცხადა, საპირფარეშოში ოთხი გოგონა შეიყვანა ერთდროულად, რადგან მცირე ასაკის ბავშვებს ბუნებრივი მოთხოვნილების დაკმაყოფილების სურვილის მოთმენას ვერ აიძულებს. პედაგოგი განმარტავს, რომ იმ დღეს ჯგუფში სულ 6 გოგონა იმყოფებოდა, რის დამადასტურებლად საკრებულოს აღრიცხვის ჟურნალი წარუდგინა:
"10-12 გოგონა არ ყოფილა. იმ დღეს ჯგუფში სულ 6 გოგონა გვყავდა. ამის შესაბამისი აღრიცხვის ჟურნალი წარვუდგინე საკრებულოს. საუზმის შემდეგ ბავშვებს ერთდროულად უნდათ საპირფარეშოში შესვლა, ერთი რომ იტყვის, დანარჩენებიც მიბაძავენ. ჩვენ გუნდურად ვმუშაობთ. აღმზრდელი სხვა საქმეს აკეთებდა, ამიტომ ოთხი გოგონა შევიყვანე ერთდროულად საპირფარეშოში", - აღნიშნა თინათინ გოგიტიძემ.
#2 ბაღის თანამშრომლები აცხადებენ, რომ ბაღის გამგე, პედაგოგი და მეთოდისტი უსამართლოდ არიან გათავისუფლებული. როგორც პედაგოგმა ია ჯაფარიძემ განაცხადა, საკითხი კომპეტენტურმა ორგანოებმა უნდა გამოიძიონ:
"უსამართლოდ არიან გათავისუფლებული სამსახურიდან, ასეთ უსამართლობაში ჩვენც როგორ უნდა ვიმუშაოთ. მასწავლებელს საუზმის შემდეგ საპირფარეშოში შესვლა რომ მოთხოვეს, მან ოთხი გოგონა ერთდროულად შეიყვანა. სამი ქოთანზე დასვა და ერთი უნიტაჟზე. ამ დროს შემოვიდა გაერთიანების ხელმძღვანელი და დაინახა ეს სიტუაცია. შეგვიძლია ხატზე, ჯვარზე დავიფიცოთ, რომ ეს არის უსამართლობა და ანგარიშსწორება. ამის უკან რაღაც დგას, უნდა გამოიძიონ", - აღნიშნა ია ჯაფარიძემ.
ბათუმის ბაღების გაერთიანების ახალი ხელმძღვანელი ნატალია ზაქარეიშვილი აღნიშნულ პოზიციაზე 2014 წლის1 იანვრიდან მუშაობს.
