31
მაისიდღის ზოგადი ასტროლოგიური პროგნოზი
"ინტერკონტინენტალის" სიურპრიზი ქართველ ტურისტებს - 20-მდე ქართველი იორდანიის დედაქალაქ ამანის აეროპორტში 10 საათზე მეტია, სამშობლოში დაბრუნებას ელოდება.
ambebi.ge-ს რამდენიმე მგზავრი დაუკავშირდა, რომლებიც აცხადებენ, რომ "ინტერკონტინენტალისგან" ამანი-თბილისის რეისის გადადების მიზეზი ვერ გაიგეს. თუმცა, მათი თქმით, შუამავალი კომპანიის წარმომადგენლისგან მიიღეს ინფორმაცია, რომ თბილისიდან რეისის თანხის გადარიცხვა გვიანდება.
"რეისის ამდენი ხნით გადადების შემთხვევაში, კანონი კომპანიას მგზავრებისადმი ყურადღებით მოპყრობას, წყლითა და საკვებით უზრუნველყოფას ავალდებულებს. დილის 05:00 საათიდან ამ დრომდე აეროპორტში ვართ, გვიჯდება ტელეფონები, კომპიუტერები, არ გვაქვს ფული და ვრჩებით მარტო სრულიად უცხო გარემოში. დილიდან გვეუბნებიან, რომ რეისი რამდენიმე წუთში შესრულდება, მაგრამ ჯერ ისევ არაფერი ისმის", - გვითხრა სალომე ლილუაშვილმა.
მისი ინფორმაციით, "ინტერკონტინენტალმა" კიდევ ერთი სიურპრიზი ქართველებს ჯერ კიდევ იორდანიაში გაფრენისას მოუწყო. კერძოდ, ორი საათის დაგვიანებით შესრულდა თბილისი-ამანის რეისი.
"პრობლემა მაშინაც თანხის გადარიცხვაში მდგომარეობდა. კიდევ ერთი სიურპრიზი ამანში ჩასულებს დაგვხვდა. თბილისში სხვა სასტუმროს ფოტოები გვაჩვენეს და სულ სხვაგან აღმოვჩნდით. ეს იყო ჩვეულებრივი "მოტელი", სადაც მთელი ღამე ტანსაცმლით გვეძინა. პროტესტის შემდეგ მეორე დღეს სხვა სასტუმროში გადაგვიყვანეს, თუმცა, დანაპირების შესაბამისად, ზღვასთან ახლოს ისიც არ იყო და ზღვამდე მისვლა თითოეულს 11 დოლარი გვიჯდებოდა. ამიტომ, ზღვაზე გასვლა სულ ორჯერ შევძელით", - განაცხადა სალომე ლილუაშვილმა.
ambebi.ge "ინტერკონტინენტალის" წარმომადგენელ თათა საყვარელიძეს დაუკავშირდა, რომელმაც განმარტა, რომ პრობლემა უკვე აღმოფხვრილია და მგზავრების რეგისტრაცია ამანი-თბილისის რეისზე დაახლოებით ერთ საათში დაიწყება.
"ინტერკონტინენტალში" რეისის გადადების მიზეზი არ დააკონკრეტეს და აღნიშნეს, რომ პრაქტიკაში ამგვარი რამ ხშირად ხდება.
ნინო წივწივაძე
