ბორის ჩოჩიევი - ზაქარეიშვილს ვურჩევდი, სამინისტროს სახელწოდების შეცვლის მაგივრად, სამხრეთ ოსეთის დამოუკიდებლობის აღიარებაზე იფიქროს

სამხრეთ ოსეთი არასდროს ყოფილა საქართველოს შემადგენლობაში და არც მომავალში იქნება, - ამის შესახებ ეწ. სამხრეთ ოსეთის დე-ფაქტო პრეზიდენტის ადმინისტრაციის ხელმძღვანელმა, ბორის ჩოჩიევმა ოსური სააგენტო Рес–ისთვის მიცემულ ინტერვიუში განაცხადა.

ჩოჩიევი პაატა ზაქარეიშვილის უწყებისთვის სახელის შეცვლას და თავად საქართველოს სახელმწიფო მინისტრის განცხადებას გამოეხმაურა, რომლის მიხედვითაც აფხაზეთის და სამხრეთ ოსეთის საქართველოში დაბრუნება უნდა იყოს ნებაყოფლობითი.

"რომელ დაბრუნებაზეა საუბარი, როდესაც სამხრეთ ოსეთი არასდროს ყოფილა საქართველოს შემადგენლობაში. როგორი ლამაზი სიტყვებიც არ უნდა ისმოდეს თბილისიდან, ჩვენ მუდმივად უნდა გვახსოვდეს: მიუხედავად პერსონალიებისა, ქართული სახელმწიფოს პოლიტიკის მთავარი მიმართულება დაფუძნებულია ლოზუნგზე "საქართველო ქართველებისთვის". ან უნდა გახდე ქართველი, ან იქნები მეორეხარისხოვანი ადამიანი. ასე იყო, ასე არის და ასე იქნება",-განაცხადა ჩოჩიევმა.

მისი თქმით, არ აქვს მნიშვნელობა ვინ იქნება საქართველოს მთავრობაში, ვინ იქნება პრეზიდენტი, მინისტრი და "მით უმეტეს, არ აქვს მნიშვნელობა, როგორი სახელწოდება ექნება სამინისტროებს".

"საქართველოს სურს სამხრეთ ოსეთის ტერიტორიის მიტაცება, ჩვენი, ოსების – განადგურება ან განდევნა მშობლიური მიწიდან. მე პაატა ზაქარეიშვილს ვთვლიდი უფრო შორსმჭვრეტელ პოლიტოლოგად და რეალისტურ პოლიტიკოსად. თუმცა, სამწუხაროდ, მისი გამონათქვამები საპირისპიროზე მეტყველებს. მე მას და მის მომხრეებს ვურჩევდი, რომ სამინისტროს სახელწოდება კი არ უნდა შეცვალონ, არამედ იფიქრონ სამხრეთ ოსეთის დამოუკიდებელ სახელმწიფოდ აღიარებაზე და დიპლომატიური ურთიერთობის დამყარებაზე, თუ მათი სურვილი, დარეგულირდეს ურთიერთობა სამხრეთ ოსეთთან, გულწრფელია", -აღნიშნა ჩოჩიევმა.

საქართველოს მთავრობის დადგენილებით, "სახელმწიფო მინისტრი რეინტეგრაციის საკითხებში" შეიცვალა სახელწოდებით - "სახელმწიფო მინისტრი შერიგებისა და სამოქალაქო თანასწორობის საკითხებში".

"ინტერპრესნიუსი"