4
ივნისიდღის ზოგადი ასტროლოგიური პროგნოზი
მათ ცხოვრებაში 2013 წელი წარმატებული აღმოჩნდა. ისინი პოპულარული პროექტის - "ცეკვავენ ვარსკვლავები" მონაწილეები ისე აღმოჩნდნენ, რომ ვარსკვლავი და საზოგადოებისთვის ცნობილი არც ერთი არ ყოფილა. ერთი ტანმოვარჯიშე გახლავთ, მეორე, როგორც თვითონ ამბობს, ჩვეულებრივი, არაფრით გამორჩეული ჟურნალისტი, მაგრამ მათ შეძლეს ის, რაც შოუს უძლიერესმა მონაწილეებმა ვერა - ერთმანეთს ფინალში შეხვდნენ და წლის წარმატებული ადამიანები გახდნენ. საუბარია თაკო ჩორგოლაშვილსა და ქეთი ხატიაშვილზე. გოგონებს ფინალამდე შევხვდი და ისინი რუბრიკაში "ჟურნალისტის როლში" მოვიწვიე...
ჟურნალისტი - თაკო ჩორგოლაშვილი
რესპონდენტი - ქეთი ხატიაშვილი
- ქეთი, ახალ წელს როგორ ხვდები ხოლმე? ოჯახში რაიმე განსაკუთრებული ტრადიცია ხომ არ გაქვთ?
- 31 დეკემბერი რომ თენდება, ვცდილობთ, დღე ხალისიანად დავიწყოთ და ოჯახში მუდმივად ფუსფუსია. ვამზადებ რამდენიმე კერძს, დიდ სუფრას არ ვშლი. ახალ წელს სახლში ვხვდებით და მერე შეიძლება, სადმე გავიდეთ...
- 2013 წელს გამორჩეული 31 დეკემბერი გექნება, - "ცეკვავენ ვარსკვლავებში" ფინალურ შოუში უნდა იცეკვო... ეს წელი შენთვის მგონი, ზღაპარს ჰგავდა... ეს პროექტი კიდევ რით დაგამახსოვრდება?
- გასული წელი ჩემთვის სრულიად განსხვავებული და დასამახსოვრებელი აღმოჩნდა. მინდა, რომ შემდეგი წელიც ასეთივე იყოს. თუმცა, აქამდე მიღწეულითაც კმაყოფილი და ბედნიერი ვარ. ამ პროექტმა თავდაჯერებულობა შემმატა, მეტად გაბედული და მიზანდასახულიც გავხდი. კვირაში ერთი ცეკვა მქონდა ხოლმე მოსამზადებელი და დროს ისე ვანაწილებდი, პრობლემა რომ წარმატებით დამეძლია. ასე რომ, მობილიზებულიც გავხდი...
- როგორც ვიცი, 2013 წელი შენი წელიწადი იყო, რადგანაც გველის წელში ხარ დაბადებული...
- კი და თან, ამ წელიწადში "ოქროს" დაბადების დღეც მქონდა. 24 მარტს 24 წლის გავხდი...
- ისე, 2014 წელი (ცხენის წელიწადი) ჩემი წელია. 8 თებერვალს მეც 24 წლის ვხდები. ფინალში გადასვლა კი ჩემს მეუღლეს მივუძღვენი, 26 დეკემბერს იყო ნახევარფინალი და იმ დღეს 26 წლის გახდა, "ოქროს" დაბადების დღე ჰქონდა. ყველაფერი რაღაც სიმბოლურად დაემთხვა... მიმაჩნია, რომ ორივემ დიდ წარმატებას მივაღწიეთ. ხალხისთვის ძალიან ცნობილი სახეები არ ვიყავით, მაგრამ მიუხედავად ამისა, მათ მხარი მაინც დაგვიჭირეს, რაც ძალზე სასიხარულოა... მიმაჩნია, რომ ყველაფერი სამართლიანად მოხდა. სულ იმას ვამბობდი, მე თუ არა, ფინალში ქეთი მაინც მინდა, ვიხილო-მეთქი.
- მე კი ფინალში შენ გხედავდი...
- ქეთი, შენ "ცეკვავენ ვარსკვლავებს" როგორც "ხალხის რჩეული", მე-13 მონაწილე, ისე მოევლინე და ყველანაირად გაამართლე, იმაზე მეტადაც კი, ვიდრე ეს მოსალოდნელი იყო. ყველა ტურში შეძელი, თავი კარგად წარმოგეჩინა, მაქსიმალურად იხარჯებოდი, შენი ყოველი გამოსვლა გამორჩეული და დასამახსოვრებელი იყო. განსაკუთრებულად შენ რომელი ცეკვა მიგაჩნია?
- მიყვარს სახლში კედელზე ფოტოების ჩამოკიდება. ახალი წლიდან კი ჩარჩოში აუცილებლად უნდა ჩავსვა კადრი, რომელიც "სუხიშვილების ტურში" ვიცეკვე - "ცეკვა ხანჯლური", ასევე კადრი იმ "ჩა-ჩა-ჩადან", რომელიც გველთან ერთად ვიცეკვე და ეპიზოდი მიუზიკლიდან - "პარიზის ღვთისმშობლის ტაძარი". თითოეული ძალიან რთული შესასრულებელი იყო. ამ ბოლო ცეკვაში თავი მართლა ესმერალდა მეგონა...
- გველის წელი რომ დადგა, თუ იფიქრებდი, რომ 2013 წელს დიდ წარმატებას მიაღწევდი?
- ანასტასია რომ გავაჩინე, ცოტა ხანს ყველაფერს მოვწყდი... 2013 წელი რომ დადგა, ვთქვი, მოდი, ჩემს ორწლიან ჩამორჩენას დავძლევ-მეთქი და გავაქტიურდი; ავიღე მართვის მოწმობა, მერე ჩემს საქმიანობაში კვალიფიკაციის ასამაღლებლად საზღვარგარეთ გავემგზავრე და გამოცდები ჩავაბარე. მოგვიანებით გავიგე, რომ "ცეკვავენ ვარსკვლავებში" მონაწილეობის შანსი შეიძლებოდა მქონოდა, რადგან მე-13 მონაწილეზე კონკურსი გამოცხადდა... მოკლედ, ვცადე და გამიმართლა... გასულ წელს რაც ვცადე, ყველაფერი გამომივიდა.
- მე-13 მონაწილე რომ უნდა ყოფილიყავი, ამან თუ დაგაფრთხო?
- არა, 13 რიცხვი კარგად მაქვს დაცდილი...
- ჩემთვის 2 რიცხვია საყვარელი. ჰოდა, ჩვენი წყვილის ნომრად 112 რომ ამომივიდა, გამიხარდა და კარგადაც მენიშნა. მაშინვე ვთქვი, ყველაფერი კარგად იქნება-მეთქი... კონკურსს მიღმა რომ აღმოვჩენილიყავით, როგორ გგონია, ფინალში ვინ იცეკვებდა? ყველაზე ღირსეული ვინ იქნებოდა?
- თავიდან ყველა აღნიშნავდა და ასეც არის, რომ ევროპული ცეკვები ისე გამოგდის, რომ ბადალი არ გყავს... პეტო (ნოდარ გურგენაშვილი) ისეთ შოუებს აწყობდა, რომელიც ძალიან მომწონდა, მაგრამ კონკურსიდან წავიდა. კარგად ცეკვავდა იულია... ფინალში შენ რომ დარჩი, მიმაჩნია, რომ აბსოლუტურად სწორი გადაწყვეტილებაა...
- მადლობა.
- ფინალში გადასვლა კი გამიხარდა, მაგრამ ეს გიორგი ყიფშიძის წასვლას დაემთხვა და თავს იმის უფლებას არ ვაძლევდი, რომ სიხარულისგან მეხტუნავა, რადგანაც გიორგიზე მწყდებოდა გული...
- გიორგის წასვლა მეც მეწყინა. ბოლოს ყველანი ისე შევიკარით, დარწმუნებული ვარ, მე რომ წავსულიყავი, ისევე დაგწყდებოდათ გული, როგორც - მე. ქეთი, გისურვებ საბოლოო გამარჯვებას, თუმცა ვფიქრობ, უკვე გამარჯვებული ხარ, რადგანაც ხალხის რჩეული ხარ და ეს პროექტი შენია. შენი წელია და ბოლო წერტილიც წარმატებულად უნდა დასვა.
ჟურნალისტი - ქეთი ხატიაშვილი
რესპონდენტი - თაკო ჩორგოლაშვილი
- თაკო, როგორ მოხვდი ამ პროექტში? მაშინვე დათანხმდი ნოე სულაბერიძის წინადადებას?
- "იმედზე" ერთი ჩვეულებრივი, სხვებისგან არაფრით გამორჩეული ჟურნალისტი გახლდით. თან, აბსოლუტურად მოულოდნელი წინადადება იყო. მაშინვე არ დავთანხმებულვარ, აზრი მეუღლეს ვკითხე, გამიხარდა, რომ მხარი დამიჭირა, რადგანაც ცეკვა ჩემთვის ყველაფერია. კარგად მახსენდება ის პერიოდი, როცა ქართულ ცეკვებს ანსამბლში ვცეკვავდი... ასე რომ, რეზის თანხმობა ჩემთვის დიდი სტიმული აღმოჩნდა. ის ყოველთვის ითვალისწინებს და ანგარიშს უწევს იმას, რაც ჩემთვის მნიშვნელოვანია. ასე რომ, პროექტში მონაწილეობაზე ნოეს თანხმობა მალევე ვუთხარი.
- ალბათ თავიდან ყველამ შოკი მიიღო, როდესაც შენი ცეკვა ნახეს. პროფესიონალმა მოცეკვავემ, გოჩა ჩერტკოევმა, შენს პარტნიორს, ასევე პროფესიონალ მოცეკვავე, გაგა თოდუას უთხრა, შეგიძლია, სამეჯლისო ცეკვებში გადაიყვანოო...
- ასეთი შეფასება ჩემთვის მოულოდნელი იყო, რადგანაც ბავშვობიდან ქართულს ვცეკვავდი... იმის მერე ძნელია, სამეჯლისო ცეკვებზე გადართვა. თან, გაგა ძლიერი მოცეკვავეა... დედაჩემი ჩემზე კი ამბობს, - თაკო მაქსიმალისტია და რასაც ხელს მოჰკიდებს, ყველაფერს ბოლომდე აკეთებსო, მაგრამ ვიცი, ბოლომდე მასაც არ სჯეროდა, რომ ამდენს შევძლებდი.
- ახალი წლის აღნიშვნისა და შეხვედრის ტრადიციებზე მელაპარაკე...
- მე და დედა ყოველთვის საახალწლო საყიდლებზე მივდივართ. ნაძვის ხეს ერთად ვრთავთ, ორივე ვგიჟდებით ამაზე. მაგრამ 2013 წელს ეს ყველაფერი დედას გადავაბარე, რადგან სრულიად სხვა რეჟიმში მიწევდა ცხოვრება... ახალი წლის პირველ დღეებში ახლა მე და ჩემი ქმარი სადმე წავალთ, რომ ის რამდენიმე დღე დავისვენო და საახალწლო განწყობილება შევიქმნა. ჟრიამულს ეს მირჩევნია, ძალიან დავიღალე...
- მე რომ არა, ფინალში ვისთან ერთად ისურვებდი ყოფნას?
- ვისთანაც მინდოდა, იმასთან ერთად დავრჩი. სუსტი კონკურსანტის გვერდით რომ დავმდგარიყავი, არ გამიხარდებოდა. ვიფიქრებდი, რომ ამ პროექტმა არ გაამართლა... ასეთ შოუში ძლიერი უნდა გადიოდეს... პირველივე დღიდან იულია ქავთარაძე მომწონდა, კარგად ცეკვავდა და ადრე გავარდა... იმის შემდეგ იყავი შენ.
- ჩემი წელი მოდისო, - აღნიშნე. რაიმეს ხომ არ გეგმავ ცხენის წელიწადში?
- როდესაც დაიწყო ეს პროექტი, არანაირი გათვლა არ მქონია. ყველაფერი თავისით მოხდა. ჩემს თავს ფინალში ვერ ვხედავდი, რადგანაც მიმაჩნდა, რომ ძლიერი კონკურენტები იყვნენ... ასე რომ, წინასწარ არაფერს ვგეგმავ... ერთი ვიცი, რაც ჩემს ცხოვრებაში ხდება (კარგიც და ცუდიც), ჩემთვის ხდება და იმიტომ, რომ ასე უნდა მომხდარიყო.
- ცეკვის გარდა კიდევ რა გიყვარს?
- ჩემი საქმე. ტელევიზიაზე ვამბობ, რომ ის ჩემი მეორე სახლია. ბოლო ოთხი თვის განმავლობაში კი ჩემი სახლი სარეპეტიციო დარბაზი გახდა. "იმედის" გარეშე ვერასდროს ვიცხოვრებ, რადგანაც ჟურნალისტობა ჩემი საყვარელი საქმიანობაა.
- მეც მინდა ვთქვა, რომ ამ პროექტმა იმაზე მეტი მომცა, ვიდრე ველოდი. ჩემს გულშემატკივრებს ჟურნალის საშუალებით მადლობას ვუხდი. მინდა, ყველას ოჯახში ბედნიერი და წარმატებული წელი მოსულიყოს. ოცნებები ხდება! მადლობა ასევე ნოე სულაბერიძეს. მისი იდეა რომ არა, აქ მე არ ვიქნებოდი...
ლალი ფაცია
(გამოდის ხუთშაბათობით)
