31
მარტიდღის ზოგადი ასტროლოგიური პროგნოზი
ტელეწამყვანი მაია ასათიანი წინასაახალწლო სამზადისს ნოემბრის დასაწყისიდან იწყებს, დამდეგს კი თითქმის ყოველთვის, ოჯახის წევრებთან ერთად ეგებება.
- როგორია შენი წინასაახალწლო სამზადისი?
- უკვე 21 წელია, რაც ჩემი წინასაახალწლო სამზადისი გადაცემებს უკავშირდება. იმდენად ბევრი დრო მიაქვს სატელევიზიო საქმეებს, ერთი სული მაქვს ხოლმე, როდის გავთავისუფლდები, რომ შინ წავიდე. მნიშვნელობა არ აქვს, ახალ წელს მექნება თუ არა გოზინაყი, საცივი და საახალწლო ატრიბუტიკა, ჩემი ბედნიერებისთვის შინ ყოფნაც საკმარისია. ტელევიზიაში საახალწლო მზადებას ნოემბრიდან ვიწყებთ და 1-ელ იანვარს ვასრულებთ. ახლაც ზუსტად ასე ვარ, ერთი წუთიც არ მაქვს საიმისოდ, რომ სხვა რამეზე ვიფიქრო. წელს საახალწლოდ განსაკუთრებულად კარგი გადაცემა გვექნება. ამჯერად გადავწყვიტეთ, გრანდიოზული შოუს მოწყობის ნაცვლად, ქველმოქმედებაზე გვეზრუნა. შევეცადეთ, აბსოლუტურად ყველა წერილისთვის გვეპასუხა. ჩვენი საახალწლო გადაცემის წყალობით, ყველა სტუმრის ცხოვრება შეიცვლება, რამდენიმე მათგანს სახლსაც ვაჩუქებთ, ინტერიერსაც მოვუწყობთ. მოკლედ, ხალხისთვის გრანდიოზული საჩუქრები გვაქვს. ეს არის რეალურად შეცვლილი ცხოვრება. მინდა, თქვენი ჟურნალის მეშვეობით ვუპასუხო ყველა იმ აბეზარ ადამიანს, რომელიც ხშირად იცინის "პროფილში" დაღვრილ ცრემლზე, რაც სიმართლე გითხრათ, ძალიან მაღიზიანებს: არ შეიძლება, გასაჭირს დასცინო!
- შინ როგორ აღნიშნავთ ამ დღესასწაულს?
- რამდენიმე წელია, დიასახლისობას ვერ ვახერხებ. ვცდილობ, ახალ წელს შინიდან არსად გავიდე, საახალწლო კონცერტებს არ ვესწრები. ბედნიერი ვარ მაშინ, როცა შვილის, დედისა და დების გარემოცვაში ვარ. დამდეგს ყველანი ერთად ვეგებებით, მერე კი ჩემი დები მეგობრებთან ერთად, გასართობად მიდიან, მე კი ვიძინებ - ეს არის ის, რაც ყველაზე მეტად მენატრება.
- ასეთი რთული დღის რეჟიმის მქონე ადამიანს ოჯახის წევრები არ გსაყვედურობენ?
- ვცდილობ, დრო ისე გავანაწილო, რომ საყვედური არავინ მითხრას. ვარ ისეთი, როგორიც ვარ, ვერ შევიცვლები. ვაკეთებ საქმეს, რომელიც ძალიან მიყვარს და ვერაფრით შეველევი.
- საახალწლო კერძებიდან რისი მომზადება გეხერხება?
- რატომღაც, ახალი წელი ყოველთვის სიუხვესთან ასოცირდება. ბევრი ადამიანი თავს უფლებას აძლევს, მადიანად მიირთვას. სიმართლე გითხრათ, ეს ჩემთვის მიუღებელია. მთავარია, ასეთ დროს ძვირფას ადამიანებთან ერთად ვიყო. დიდი გურმანი არ ვარ და მიმაჩნია, რომ ჭამის გარეშეც შეიძლება დროის კარგად გატარება. ძალიან მღლის ბაზრებში, სუპერმარკეტებში რიგში დგომა და თავ-პირის მტვრევა. ჭამა-სმის კულტად გახდომა მაღიზიანებს.
- რამე განსაკუთრებული ტრადიცია არ გაქვს?
- არა, ახალ წელს პრაგმატულად ვუყურებ... რომანტიკული, სენტიმენტალური ბავშვი ვიყავი და ეს დღემდე გამომყვა. დიდი ხნის განმავლობაში მჯეროდა სანტა კლაუსის არსებობისა და სასწაულების. თუმცა, როგორც წესი, ყველას შენგან უნდათ რაღაც და არავინ გეკითხება, - შენ რა გინდა. ძირითადად, თავად ვარ ხოლმე სხვების სანტა კლაუსი (იცინის). თუმცა, ძალიან მომწონს, შინაგანად ვივსები, როცა საყვარელ ადამიანებს და ზოგჯერ - უცნობებსაც სიურპრიზს ვუმზადებ.
- წელს შენი სანტა კლაუსი ვინ იქნება?
- მე არ მეყოლება სანტა კლაუსი, უკვე დიდი გოგო ვარ.
- დაბოლოს, რაიმეს თქმა ხომ არ გსურს?
- მინდა, ყველას სითბოს, სიყვარულის, უფრო მეტი შემწყნარებლობის უნარი ვუსურვო. ადამიანებს, რომლებსაც "პროფილის" ცრემლების არ სჯერათ, ვეტყვი, რომ უფრო მეტად კეთილები გახდნენ. თუ შეძლებ, რომ შურისა და ბოღმისგან გათავისუფლდე, უფრო ლაღად იცხოვრებ.
ნინო აბრამიშვილი
(გამოდის ხუთშაბათობით)
