"ქუდებს ვქსოვ და მაღაზიას ვაბარებ" - ქრისტინე იმედაძის ახალი გატაცება
მომღერალი ქრისტინე იმედაძე ამ ზამთარს ქსოვამ გაიტაცა. ამბობს, რომ ახალი ჰობი აქვს: "გავაკეთე ნაქსოვი ქუდებისა და "აბადოკების" სერია, ასე ვთქვათ, ბრენდი "ტაისიი". ნამუშევრები მართლაც კარგია, მათი ხილვის საშუალება "ფეისბუქის" მომხმარებელს ქრისტინეს გვერდზე შეუძლია.
- ეს ქუდები შენ მოქსოვე?
- დიახ, ყველაფერი ჩემი დიზაინითა და ჩემი ხელით არის დამზადებული და ჯერჯერობით მხოლოდ ერთ მაღაზია "მაჯენტაში", აბაშიძის 29 ნომერში იყიდება.
- იმდენი მოქსოვე, რომ მაღაზიასაც ჩააბარე?
- მართალია, ჩემი ნამუშევრები ჯერ შეზღუდული რაოდენობით იყიდება, მაგრამ თუ მოთხოვნა იქნება, დავამატებთ. მოკლედ, წარმატება მისურვეთ ჩემს ახალ საქმიანობაში.
- ისე, ამ საქმეში სულ არავინ დაგხმარებია?
- ცოტას მეგობარი დამეხმარა, რომ მოგვესწრო, თორემ ზამთარი გავიდოდა... ტაისია, ჩემი შვილი კი ძაფების ფერების შერჩევაში დავიხმარე და ასევე ქვებიც მან შემახამებინა, რომელიც "აბადოკებს" აქვს დაბნეული...
- დღეში რამდენს ქსოვ?
- დილიდან სამსახურიში მივდივარ, მერე გადაღებები, ჩაწერები მაქვს, თან, საახალწლოდ მუშაობა ყველგან გაორმაგებულია და მიუხედავად ამისა, ამ ადგილებში რაც დავასახელე, სადაც მომიხერხდებოდა, ამოვიღებდი საქსოვს ჩანთიდან და ვქსოვდი...
ასე რომ, ვერ გეტყვით, ხან რამდენს ვქსოვ, ხან - რამდენს...
საერთოდ, ზამთარს ქსოვაც უხდება და ნაქსოვი ტანსაცმელიც...
- როდის და როგორ გაგიჩნდა ეს იდეა?
- იდეა ჯერ კიდევ დიდი ხნის წინ გამიჩნდა, მაგრამ უდროობის გამო თავი ვერ მოვაბი... მოკლედ, დღეში 24 საათი არ მყოფნის (სიცილით ამბობს)...
- ისე, მშვენიერი ნახელავია... დარწმუნებული ვარ, კლიენტიც ეყოლება...
- მადლობა... ისე, მხოლოდ ამ პროდუქციით არ შემოვიფარგლები, სხვა იდეებიც მაქვს... როგორც კი დროს გამოვძებნი, დანარჩენს მივხედავ...
- რას გულისხმობ?
- მაქვს კიდევ იდეები, რომელის განხორციელებას ასევე ჩემი ჩართვა სჭირდება და უდროობაზე ამიტომ ვწუწუნებ. მოკლედ, ამ ჩემს ახალ ბრენდს სხვა პროდუქტიც ექნება... ეს ყველაფერი, რაც აქამდე გავაკეთე, ჯერჯერობით საცდელი გახლდათ...
- ისე, ქსოვა კარგი სარელაქსაციო საშუალებაა. ადამიანის ნერვულ სიტემაზე დადებითად მოქმედებს...
- კი, გეთანხმებით, ქსოვა ნამდვილად სასიამოვნო პროცესია...
- ქრისტინე, შენი ფერადი ნამუშევრები, რომლებსაც ფოტოებზე "ფეისბუქის" საკუთარ გვერდზე შენვე უწევ რეკლამას, ვინ გადაიღო?
- ფოტოები ძალიან ნიჭიერმა ფოტოგრაფმა - ირაკლი ღვინიაშვილმა გადამიღო და მაჩუქა...
ლალი ფაცია
სპეციალურად "ამბები.გე"-სთვის
ასევე დაგაინტერესებთ:
სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე
"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე
