29
ივნისიდღის ზოგადი ასტროლოგიური პროგნოზი
საქართველოში სილამაზის კონკურსი "მის საქართველო" 1996 წლიდან ტარდება და შეიძლება ითქვას, რომ სკანდალები არასოდეს მოჰკლებია - მისი მონაწილე ხან გათხოვილი აღმოჩენილა, ხან კი... ნასამართლევი. შოუბიზნესის წარმომადგენლებს არაერთხელ დაუჩივლიათ, რომ მსგავსი კონკურსები მხოლოდ ბიზნესად ქცეული სილამაზეა და გამარჯვებული არა კომპეტენტური ჟიურის, არამედ რამდენიმე ადამიანის შეხედულებებით ვლინდება. კონკურსების ორგანიზატორები ამ ბრალდებას, რა თქმა უნდა, უარყოფენ, თუმცა მათგან განაწყენებულიც ბევრი გვინახავს. გამარჯვებულები ჩვენს ქვეყანას "მის სამყაროსა" და "მის მსოფლიოზე" წარადგენენ, თუმცა საქართველოს ფარგლებს გარეთ წარმატება არცთუ ისე ხშირად მოგვიპოვებია. რა არის საჭირო იმისთვის, რომ ჩვენი ქვეყანა, სულ ცოტა, ათეულში მაინც მოხვდეს? - ამ კითხვაზე პასუხი ყოველთვის ერთნაირია, გვეუბნებიან, რომ ჩვენი წარმომადგენელი უდავოდ ლამაზია, თუმცა ეს სილამაზე რატომღაც არ ფასდება, ან "რაღაც დეტალი აკლია". მთავარი კი ისაა, რა კრიტერიუმებით არჩევენ "მის საქართველოს" მონაწილეებს. ამ თემაზე "ყველა სიახლეს" ყოფილი მოდელი გიორგი ნაზღაიძე ესაუბრება:
- ჩვენი ქვეყანა ჯერჯერობით განვითარების გზაზეა და რა გასაკვირია, რომ ასეთ ქვეყანაში სილამაზის კონკურსები სათანადო დონეზე ვერ ტარდება. აქედან გამომდინარე, ღირსეულ შედეგსაც ვერ ვიღებთ. ჩვენში ვიღაცა ვიღაცის ნაცნობი ან ნათესავია და ამის მიხედვით ხდება ჩაწყობა. სამწუხაროდ, ასეთ ფაქტებს ვერსად გავექცევით. ათბალიანი სისტემით რომ შევაფასოთ, რამდენად ღირსეულად და სამართლიანად ტარდება კონკურსები ჩვენში, მე სამ ქულას დავწერდი.
- ქართველი მოდელები საერთაშორისო დონის კონკურსებზე წარმატებას რომ ვერ აღწევენ, ამის გამო ხშირად აკრიტიკებენ. ამის მიზეზიც ე.წ. ჩაწყობაა?
- აქ კიდევ ბევრი ნიუანსია. თბილისში ძალიან ბევრი ლამაზი გოგონაა, თუმცა მენტალიტეტი თავისას შვრება. ვიღაცას მამა არ უშვებს, ვიღაცას ბიძა. მეორე პრობლემაა ის, რაც ზემოთაც აღვნიშნე - რომ ვიღაცა ვიღაცის ნაცნობობის გამო ხვდება ასეთ კონკურსში. იმ შეკრებილი გოგონებიდან, კარგია თუ ცუდი, ვიღაცამ ხომ უნდა გაიმარჯვოს? ზოგიერთი იმასაც ფიქრობს, მაინც ჩაწყობილია და რატომ მივიღო მონაწილეობაო. ჩემი აზრით, მონაწილეობა მაინც უნდა მიიღო, რადგან შენი სილამაზე და ნიჭი არასოდეს დაიკარგება, შესაძლოა შემდგომში გახდე ძალიან ცნობილი მოდელი, მიუხედავად იმისა, ჩაწყობით მოხვდი თუ არა.
- რა კრიტერიუმებით უნდა შეფასდეს მოდელი, წარმატებას რომ მიაღწიოს?
- საერთოდ, ქართველებს ზედმეტი თავის ქება გვჩვევია. მოდით, ნუ შევაქებთ ჩვენს თავს, უმჯობესია სხვამ შეგვაქოს. ჩვენთან სამოდელო სფერო სათანადო დონეზე არ არის განვითარებული, ამიტომ, ქართველმა რომ გაიმარჯვოს, კიდეც გამიკვირდება. თუმცა, ეს იმას არ ნიშნავს, რომ ლამაზი ქალები არ გვყავს.
ნოდარ ქუთათელაძე სილამაზის კონკურსებს 90-იანი წლებიდან ატარებდა, 2004 წლის შემდეგ კონკურსი აღარ ჩაუტერებია, თუმცა ამ საკითხზე თვალსაზრისი გაგვიზიარა:
- დიდი ხანია კონკურსი აღარ ჩამიტარებია და შესაბამისად, აღარც ვიცი, დღეს რა ხდება, მაგრამ გული მწყდება, კონკურსები არასამართლიანად რომ ტარდება. შეიძლება ამის თქმა ჩემგან უხერხული იყოს, მაგრამ ჩემ მიერ ორგანიზებული კონკურსები ცოტათი განსხვავებული იყო, პატარა მინი-სპექტაკლი იყო ყოველი ტური. მე რომ სამართლიანად ვატარებდი და მეტროთი მოვდიოდი კონკურსის შემდეგ, ეს ზუსტად ვიცი, დღეს კი რას აკეთებენ, ვერ გეტყვით...
- რატომ ვერ აღწევენ ჩვენი მოდელები საერთაშორისო კონკურსებზე წარმატებას?
- ძალიან ბევრი ლამაზი გოგონა გვყავს, ღმერთმა გვიმრავლოს, მაგრამ ჩვენში კონკურსები უსამართლოდ ტარდება და ასევე ხდება პირველი ადგილის განაწილება. არ ვიცი, ჩაწყობა ხდება თუ არა, მაგრამ ჟიურიში რომ არაპროფესიონალები სხედან, უდავოა (ჩემთან ყოველთვის ხელოვანი ხალხი იჯდა). ორგანიზატორებისთვის რა ხეირია აქედან, ვერ ვხვდები. არ შეიძლება სილამაზის კონკურსის ჟიურიში მეწარმე, მეწაღე და პურის მცხობელი იჯდეს. ამით ვერასდროს მივაღწევთ იმ დონეს, რაც საერთაშორისო კონკურსებზეა. დღევანდელ პირობებში სილამაზის კონკურსების ჩატარება საერთოდ უმართებულოდ მიმაჩნია, ასეთი ფორმით ჩატარებას, ჯობია, საერთოდ არ ჩაატარო. ჯერ ერთი, სპონსორები არ არიან. მე ყოველთვის გაჭირვებით ვატარებდი, ვმათხოვრობდი. დღეს ვეღარ იმათხოვრებ. ამიტომაც გვაქვს ის, რაც გვაქვს...
პირველი "მის მსოფლიო"
მსოფლიოში პირველი ფართომასშტაბიანი სილამაზის კონკურსი "მის მსოფლიო" 1951 წელს ლონდონში გაიმართა. კონკურსში დიდი ბრიტანეთიდან 21 გოგონა მონაწილეობდა, 5 კი საზღვარგარეთის ქვეყნებიდან. პირველი "მის მსოფლიო" შვედი კერსტინ "კიკი" ჰაკანსონი გახდა.
ესაუბრა ქეთი საგინაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
