20
მაისიდღის ზოგადი ასტროლოგიური პროგნოზი
თოვლიანმა და ცივმა ზამთარმა საქართველოს ზამთრის კურორტებს დამსვენებლები მოუმრავლა.
ტრადიციისამებრ, ყველაზე უკეთესი ვითარება გუდაურშია, სადაც ყველაზე მეტ დამსვენებელს ელიან. როგორც კურორტის განვითარების ფონდში აცხადებენ, წლეულს გუდაურში ტურისტების დიდი მოძალება იგრძნობა, სასტუმროებშიც ადგილები უკვე დაჯავშნილია.
აღნიშნულს ადასტურებს გუდაურის განვითარების სააგენტოს ხელმძღვანელი ალექსანდრე ონოფრიშვილიც. მისი თქმით გუდაურში ტურისტების რაოდენობა ამ სეზონზე საგრძნობლად მომატებულია.
"ვვარაუდობთ, რომ შარშანდელთან შედარებით 30%-იანი მატება გვექნება. ამის საფუძველს ის გვაძლევს, რომ სასტუმროებში ნომრები მთელი ზამთრის სეზონის განმავლობაში, აპრილამდეა დაჯავშნილი. სოციალური ქსელებით გამოხატული აქტიურობით ვასკვნით, რომ წლეულს გუდაურში ჩამოსვლას ძალიან ბევრი ტურისტი აპირებს. საკურორტო სეზონის ოფიციალური გახსნა 21 დეკემბერსაა დაგეგმილი," - ამბობს ონოფრიშვილი.
მისი განმარტებით, უცხოელ ტურსტებს შორის წელს განსაკუთრებით გააქტიურდნენ უკრაინელი და რუსი დამსვენებლები, საგრძნობლად მოიმატა აზერბაიჯანელების რიცხვმაც, ასევე აქტიურობენ პოლონელები, თურქები, ყაზახები. როგორც ონოფრიშვილი ამბობს, სასტუმროებში ფასი $100-დან იწყება, ამ ფასში შედის კვება. თუმცა, კერძო სასტუმროები, ფასებს ინდივიდუალურად ადგენენ და არის ჰოსტელებიც, სადაც ფასი 40-45 ლარიდანაც იწყება.
"ასეა თუ ისე, ზამთარში დასვენების მსურველებმა უნდა იცოდნენ, რომ 15 იანვრამდე გუდაურში ადგილების შოვნა ძალიან გაუჭირდებათ," - დასძინა ონოფრიშვილმა.
საქართველოს ტუროპერატორთა ასოციაციის თავმჯდომარე, ია თაბაგარი ამბობს, რომ საქართველოში ყველა სამთო-სათხილამურო კურორტი ერთნაირ მდგომარეობაში არ არის - ზოგიერთი უფრო პოპულარულია, სხვები - ნაკლებად.
"გუდაური ყოველთვის იყო და მომავალშიც პოპულარული იქნება დედაქალაქთან სიახლოვისა და ხელსაყრელი ადგილმდებარეობის გამო, თუმცა სწორი მარკეტინგის შემთხვევაში სხვა კურორტებიც კარგად ამუშავდება. ტურისტებს გუდაურში ბევრი რამ იზიდავს - გზა, ხელმისაწვდომი ტრანსპორტი, ადამიანური რესურსები, თუნდაც ახლომდებარე დედაქალაქის სამაშველო სამსახურის არსებობა. ამას ემატება მრავალფეროვანი სათხილამურო ტრასებიც. თუ ზამთრის სხვა კურორტებიც უფრო კომფორტული გახდება, ხალხიც მათ შორის გადანაწილდება. საამისო პოტენციალი გვაქვს, მაგრამ მარტო პოტენციალით რომ არ კმარა, თანაბარ პირობებში რომ აღმოჩნდნენ, კომფორტისა და სხვა პირობების მიხედვით ერთნაირად უნდა მოვაწყოთ. ამის ნათელი მაგალითი ბაკურიანია: იქ სასტუმროები ბევრია, მაგრამ ამას ვერ ვიტყვით საბაგიროებსა და სათხილამურო ტრასებზე, ძალიან ცოტაა კვების ობიექტი და გასართობი ადგილებიც. მარტო ტრასა და საბაგირო არ არის საკმარისი კურორტის განვითარებისთვის. ადამიანმა კურორტზე თავი დაცულად და კომფორტულად უნდა იგრძნოს და ფასებიც ნორმალური უნდა იყოს. ბოლოს და ბოლოს, უნდა არსებობდეს რეგულარული სამაშველო სამსახური, რამე რომ მოხდეს, დამსვენებელს ხომ უნდა ჰქონდეს იმედი, რომ დროულად დაეხმარებიან?" - ამბობს ია თაბაგარი.
ზემო სვანეთის ზამთრის კურორტების პრობლემად თაბაგარი დედაქალაქთან სიშორესა და მკაცრი კლიმატურ პირობებს მიიჩნევს. მისი თქმით, იქამდე მისასვლელად პატარა ვერტმფრენი მაინცაა საჭირო. ამას ემატება სასტუმროებისა და კომფორტის ნაკლებობა, გათბობის პრობლემა, რამდენადაც იქ გაზი არ არის და თუ დენი გამოირთო, ხალხი შეშის ღუმლების იმედად რჩება.
"საბაგიროცა და სათხილამურო ტრასებიც მესტიიდან რვა კილომეტრშია, რის გამოც გადაადგილება საკმაოდ რთულია, იქ აუცილებლად უნდა იყოს რეგულარული ტრანსპორტი საბაგირომდე მისასვლელად, რადგან კერძო ტრანსპორტი საკმაოდ ძვირი ჯდება: 80-დან 100 ლარამდე გამოგართმევთ მანქანა, რომელიც ტრასამდე მიგიყვანთ და უკან წამოგიყვანთ. მოყვარული მოთხილამურისთვის ეს არ არის ადვილად გადასახდელი თანხა. თანაც, სვანეთის ტრასები უფრო პროფესიონალებზეა გათვლილი, ვიდრე დამწყებ მოთხილამურეებზე. დაახლოებით იმავეს თქმა შემიძლია ზემო აჭარაზეც. თუმცა ზემო აჭარის უპირატესობა ის არის, რომ იქაური კურორტების მომხმარებელი შესაძლოა დასავლეთ საქართველოს ქალაქები გახდნენ. ყველაზე მეტად კი ქუთაისი, სადაც მართალია სათხილამურო სპორტი იმდენად პოპულარული არ არის, მაგრამ საერთაშორისო ბაზრის კარგად გამოყენება შეიძლება, საერთაშორისო აეროპორტის არსებობის ფაქტორის გათვალისწინებთ. საკმაო კვლევა და დაკვირვებაა საჭირო, რათა საქართველოში ეს ბიზნესი პოპულარულიც გახდეს და მომგებიანიც," - ამბობს ია თაბაგარი.
ტუროპერატორთა ასოციაციის თავმჯდომარე, დადებით მოვლენად აფასებს იმას, რომ მთავრობა სასტუმროების დაბეგვრის სეზონური რეჟიმის შემოღებაზე მუშაობს ტურიზმის ხელშეწყობის მიზნით.
