პატრიარქი - საქართველოს გასამთლიანებლად ძლიერი ნაბიჯებია გადასადგმელი

სრულიად საქართველოს კათოლიკოს - პატრიარქმა, ილია მეორემ საპატრიარქოში ევროკავშირის სადამკვირვებლო მისიის ხელმძღვანელი ტოივო კლაარი მიიღო. შეხვედრას ევროკავშირის სადამკვირვებლო მისიის წარმომადგენლები და სასულიერო პირები ესწრებოდნენ. შეხვედრის ნაწილი ჟურნალისტებისთვის დახურული იყო. ევროკავშირის სადამკვირვებლო მისიის ხელმძღვანელი ტოივო კლაარი დაინტერესდა, რა შეიძლება გაკეთდეს, ე.წ.საზღვრისპირა მოსახლეობის მდგომარეობის გასაუმჯობესებლად, რათა ამ მოსახლეობას ჰქონდეს შესაძლებლობა, ე.წ. საზღვარი დაბრკოლებების გარეშე გადალახოს და გარდაცვლილი ახლობლების საფლავები და სალოცავები მოინახულოს. ევროკავშირის სადამკვირვებლო მისიის ხელმღვანელი დაინტერესდა, როგორია ამასთან დაკავშირებით პატრიარქის შეხედულებები.

ტოივო კლაარის თქმით, იგი შეხვდა აფხაზებსა და ოსებს და მას აქვს განცდა, რომ ქართველებისგან განსხვავებით, ისინი წარსული წლების კონფლიქტებს სხვაგვარად განიცდიან და აღიქვამენ. ტოივო კლაარი მიიჩნევს, რომ შესაძლებელია, ეკლესია იყოს ის ადგილი, სადაც ადამიანები საერთო ტკივილის დაძლევას შეძლებენ.

"როგორც ჩემთვის ცნობილია, თქვენ გიცხოვრიათ აფხაზებთან და ოსებთან ერთად. 90-იანი წლების კონფლიქტის შემდეგ შემორჩენილია დიდი ტკივილი და მაინტერესებს, რა შეიძლება გაკეთდეს, რომ გადაილახოს ეს ტკივილი. როცა ურთიერთობა მქონდა აფხაზებთან და ოსებთან, ისინი წარსულს სხვაგვარად უყურებენ, ვიდრე ქართველები და მრჩება შთაბეჭდილება, რომ ერთი ერთზე საუბრობს, მეორე - სხვაზე. შესაძლოა, ზუსტად ეკლესია იყოს კარგი ადგილი იმისთვის, რომ გააზრებული იყოს ეს საერთო ტკივილი, რაც ხალხმა განიცადა. ასევე იმისათვის, რომ ამ ტკივილის გადასალახად დახმარება მიიღონ", - აღნიშნა ტოივო კლაარმა.

ევროკავშირის სადამკვირვებლო მისიის ხელმძღვანელმა საუბრისას საქართველოს კათოლიკოს-პატრიარქის, რუსეთის ეკლესიის პატრიარქთან კარგი დამოკიდებულების შესახებაც ახსენა. საქართველოს კათოლიკოს-პატრიარქმა თავის მხრივ, რუსეთის პატრიარქთან შეხვედრა გაიხსენა და დასძინა, რომ მან რუსეთის პატრიარქს ჰკითხა: რა უნდა გაკეთდეს საქართველოს გამთლიანებისათვის, რაზეც რუსეთის პატრიარქმა უპასუხა, რომ მას მზა რეცეპტი არ აქვს. მისივე თქმით, საქართველოს გამთლიანებისათვის ალბათ, ძლიერი ნაბიჯებია გადასადგმელი.

"ევროპის ლიდერების მოწოდება რჩება უპასუხოდ რუსეთის მხრიდან. მე მახსენდება საბჭოთა კავშირის პერიოდი, სსრკ-ს ხელმძღვანელობა ძალიან ერიდებოდა ევროპის მხრიდან კრიტიკას. ახლა მათზე აღარ მოქმედებს ასეთი კრიტიკა. ისინი აკეთებენ თავის საქმეს და ყურადღებას არ აქცევენ ევროპის მხრიდან კრიტიკას. როცა მქონდა შეხვედრა რუსეთის პატრიარქთან მე ვუთხარი, - რა უნდა გაკეთდეს, რომ მოხდეს საქართველოს გამთლიანება? მან მიპასუხა, რომ მას არ აქვს მზა რეცეპტები. ალბათ, ძლიერი ნაბიჯებია გადასადგმელი" , - აღნიშნა უწმინდესმა.

პატრიარქი მიიჩნევს, რომ ქართველებსა და ოსებს, ქართველებსა და აფხაზებს შორის კონფლიქტი ხელოვნურადაა გამოწვეული.

შეხვედრის დასრულების შემდეგ ევროკავშირის სადამკვირვებლო მისიის ხელმძღვანელმა ჟურნალისტებთან კომენტარი გააკეთა. ტოივო კლაარმა მადლობა გამოთქვა პატრიარქის მისამართით, რომ გამოძებნა დრო და შეხვდა. იგი მიიჩნევს, რომ შეხვედრა მეტად საინტერესო და კონსტრუქციული იყო, რადგან წარმოიჭრა ახალი იდეები, რაც დაეხმარება სადამკვირვებლო მისიას მუშაობის გაუმჯობესებაში.

ამასთან, ჟურნალისტებთან კომენტარი გააკეთა პატრიარქის ქორეპისკოპოსმა მიტროპოლიტმა თეოდორემ, რომელმაც დაადასტურა, რომ შეხვედრაზე გამოითქვა ძალიან ბევრი საინტერესო წინადადება.

"ევროკავშირმა თავისი იდეები შემოგვთავაზა, ჩვენ ჩვენი იდეები შევთავაზეთ, რათა უფრო მეტი ურთიერთობა და კონტაქტი იყოს ქართველებს, აფხაზებსა და ოსებს შორის. ასევე ე.წ. საზღვრისპირას მაცხოვრებლებს გაუადვილდეთ საზღვრის გადაკვეთა და შეძლონ საფლავებისა და სალოცავების მონახულება. იყო წინადადებებიც, მაგრამ ჩვენ დაველოდებით ამ წინადადებების კონკრეტულ განვითარებას. ჩვენ კვლავ შევხვდებით ერთმანეთს და განვიხილავთ კონკრეტული წინადადებების შედეგებს, რომელზეც დღეს იყო საუბარი", _ აღნიშნა პატრიარქის ქორეპისკოპოსმა.

"ინტერპრესნიუსი"