31
მაისიდღის ზოგადი ასტროლოგიური პროგნოზი
25 ნოემბერს, სადახლოს სასაზღვრო-გამშვებ პუნქტზე, თავდამსხმელებმა "მაკაროვის" სისტემის ცეცხლსასროლი იარაღით სამი პირი დაჭრეს: მერაბ კალანდაძე, დილარ მუკბანიანი და გიორგი ფირანიშვილი. საპატრულო პოლიციის თანამშრომლებმა დამნაშავეები მომხდარიდან რამდენიმე წუთში დააკავეს. მერაბ კალანდაძე და გიორგი ფირანიშვილი საავადმყოფოში მიყვანისას გარდაიცვალნენ, მძიმედ დაჭრილი დილარ მუკბანიანი კი, როგორც ამბობენ, ამჟამად ე.წ. არამიანცის საავადმყოფოს რეანიმაციის განყოფილებაშია მოთავსებული. მედიაში გავრცელებული ინფორმაციით, გიორგი ფირანიშვილსა და დილარ მუკბანიანს, ინციდენტამდე რამდენიმე დღით ადრე, ვაკეში დაპირისპირება მოუხდათ დაკავებულ პირებთან, რა დროსაც მკვლელობაში მონაწილე 6 პირიდან, ერთ-ერთის ძმა დაიჭრა. როგორც ითქვა, მოკლული ბიზნესმენი მერაბ კალანდაძე ახალგაზრდებს სომხეთში გადასვლაში ეხმარებოდა. ჩასაფრებული თავდამსხმელები მერაბ კალანდაძეს ორი მანქანით აედევნენ და სადახლოში მისულ ფირანიშვილს, მუკბანიანსა და კალანდაძეს ცეცხლი გაუხსნეს. მკვლელობაში ეჭვმიტანილი 6 პირის მიმართ სისხლის სამართლის საქმე განზრახ მკვლელობის მუხლით აღიძრა. "ყველა სიახლე" გიორგი ფირანიშვილის ბებიას, გულიკო გიგიბერიას ესაუბრა.
- ქალბატონო გულიკო, გვიამბეთ გიორგის შესახებ...
- გიორგი 21 წლის იყო... მას არასოდეს არავისთვის უწყენინებია, კეთილშობილი, მოსიყვარულე, ზრდილი, სამართლიანი და ნამდვილი ვაჟკაცი იყო. იგი მეგობარს გადაეფარა და სხვისთვის ნასროლმა ტყვიამ იმსხვერპლა... გიორგის არასოდეს ჰქონია საქმე სამართალდამცავ სტრუქტურებთან, არ ეწეოდა, არ სვამდა, სპორტსმენი იყო, წყალბურთელთა ახალგაზრდული ნაკრების წევრი, 6 წლიდან ვარჯიშობდა და მიღებული აქვს უამრავი ჯილდო. დაამთავრა პოლიტექნიკური უნივერსიტეტის საერთაშორისო ურთიერთობების ფაკულტეტი. მუშაობდა, პარალელურად ორ მასწავლებელთან ემზადებოდა უცხო ენაში და აპრილში ინგლისში წასვლას და უნივერსიტეტში სწავლის გაგრძელებას აპირებდა. დაკრძალვის დღეს გიორგისთან გამოსათხოვებლად უამრავი ახალგაზრდა მოვიდა, რომლებიც ჩვენზე, ჭირისუფლებზე არანაკლებ განიცდიდნენ თავსდამტყდარ უბედურებას. დაკრძალვის დღეს ხალხის იმხელა ნაკადი იყო, რომ მღვდელი იძულებული გახდა, პროცესია შეეჩერებინა.
- როგორი სამეგობრო წრე ჰყავდა გიორგის?
- ყველანი ერთმანეთზე უკეთესები არიან, ძმებივით უყვარდათ ერთმანეთი, თბილისის საუკეთესო ახალგაზრდობა ჭირისუფლად იდგა გიოს ცხედართან. მას ყველა პატივს სცემდა, ყველას უყვარდა.
- ვინ და რატომ გაიმეტა გიორგი მოსაკლავად?
- რა ვთქვა? - ნაძირალებმა მოგვიკლეს გიორგი. არ მინდა უდანაშაულობის პრეზუმპცია დავარღვიო და მოვლენებს დავასწრო. ჩვენ ჯერ არანაირ ინფორმაციას არ ვფლობთ, მხოლოდ ის ვიცით, რასაც მედია ავრცელებს.
- იმ საბედისწერო დღეს სად მიდიოდა გიორგი?
- არც ვიცოდით, სადმე თუ მიდიოდა - წიგნებით და რვეულებით ხელში წავიდა ინგლისურზე. ვერ გეტყვით, შემდეგ რა მოხდა. გიორგი დილარ მუკბანიანთან მეგობრობდა. რაც ეხება მერაბ კალანდაძეს, მას არც ვიცნობდით.
- შსს-ს მონაცემებით, დაკავებულია მკვლელობის 6 მონაწილე, მათი ვინაობა თუ იცით?
- ამბობენ, რომ მკვლელები დააკავეს, გვიჩვენეს კიდეც ვიდეოკადრები, მაგრამ მათი გვარები არ სახელდება, არ ვიცით, ვინ არიან.
- ითქვა, რომ ანგარიშსწორება რამდენიმე დღით ადრე ვაკეში მომხდარ გარჩევას მოჰყვა. მართლა ჰქონდა გიორგის ვინმესთან უთანხმოება?
- არავითარი კრიმინალური გარჩევა არ ყოფილა. კრიმინალური გარჩევა კი არა, გიორგის არასოდეს არავისთან უსიამოვნებაც არ ჰქონია. არ იცნობდა მერაბ კალანდაძეს და მათ რა საერთო ან რა ურთიერობა უნდა ჰქონოდათ? მაინტერესებს, როგორ არის დილარ მუკბანიანი, მისი ამბავიც ვერ გავიგეთ, საავადმყოფოში არ იძლევიან ინფორმაციას. მხოლოდ ის ვიცით, რომ მძიმედ არის დაჭრილი.
- როგორ აღმოჩნდა იმ დღეს გიორგი სადახლოსთან, ან რატომ უნდა გასულიყო საქართველოდან, რა ვერსია გაქვთ ოჯახს?
- ვიცით, რომ ბავშვი წავიდა ინგლისურზე. როგორ მოხვდა გიორგი სადახლოზე, ან თუ საქართველოდან გასვლას აპირებდა, არც ამის შესახებ ვიცით რამე. ეს არის მთავარი კითხვა, რაც ჩვენც გვაინტერესებს. რა ვერსია უნდა გვქონდეს, როცა ამ ამბავში მონაწილეებიდან არავინ გვინახავს და არც გავსაუბრებივართ. ვიცით მხოლოდ ის, რაც მედიაში გავრცელდა. ჩვენ ველოდებით გამოძიების შედეგებს და დამნაშავეების სათანადოდ დასჯას. თანაც, როგორც მართლმადიდებელი ქრისტიანები, ორმოც დღეს მიცვალებულის სულზე ზრუნვაში გავატარებთ, ამ ეტაპზე ჩვენი მთავარი საზრუნავი მასზე ლოცვაა.
ნანა ფიცხელაური
ყოველკვირეული გაზეთი "ყველა სიახლე"
(გამოდის ოთხშაბათობით)
