პარლამენტი უახლოეს პერიოდში განიხილავს საკანონმდებლო რეგულაციას, რომლის თანახმად, აბორტის გაკეთებასთან დაკავშირებული კრიტერიუმები გამკაცრდება. თუმცა საზოგადოების საკმაოდ დიდი ნაწილი აბორტის საერთოდ აკრძალვას ითხოვს. აბორტის - ორსულობისას ნაყოფის ჩაკვლის სოციალურ, ეთიკურ, სამედიცინო და დემოგრაფიულ ასპექტებზე ორგანიზაცია "ეროვნული ფრონტის" წარმომადგენელი ევგენი მიქელაძე, მეან-გინეკოლოგი ლელა რუხაძე და სოციოლოგი ლელა გაფრინდაშვილი გვესაუბრებიან.
ევგენი მიქელაძე:
- ამჟამინდელი სტატისტიკა სავალალოა: საქართველოში დღეში 90-მდე აბორტი კეთდება, არაოფიციალური ინფორმაციით კი - 300-მდე, რაც ნიშნავს, რომ საშუალოდ წელიწადში 100 000 აბორტზე მეტი კეთდება, რაც ისეთი მძიმე დემოგრაფიული სიტუაციის მქონე ქვეყნისათვის, როგორიც საქართველოა, გენოციდს, სიკვდილს ნიშნავს. არაფერს ვამბობ იმაზე, რომ მუცლის მოშლა ვნებს ქალის ჯანმრთელობას. განსაკუთრებულ მნიშვნელობას ვანიჭებთ იმასაც, რომ რელიგიური თვალსაზრისით, ადამიანის ნაყოფი პირველივე დღიდან ისეთივე სულიერი არსებაა, როგორც ზრდასრული ადამიანი, ამიტომ ნაყოფის მოშორება მკვლელობად მიიჩნევა. აქედან გამომდინარე, ნაყოფის, ემბრიონის დედისგან მოწყვეტა მკვლელობაა და, როგორც ჩვეულებრივი კრიმინალი, სისხლის სამართლის კოდექსით უნდა ისჯებოდეს; ასე რომ, ადამიანის მკვლელობის აკრძალვას ვითხოვთ, სხვას არაფერს...
ლელა რუხაძე:
- აბორტის აკრძალვა, კანონის რეგულაციის გამკაცრება გამოსავალი არ არის, საჭიროა მოსახლეობის მეტი ინფორმირებულობა, რომ მიმართონ სხვადასხვა კონტრაცეფციულ საშუალებას, მათ შორის მექანიკურს, როგორიც არის კონდომები, საშვილოსნოს ყელის ქუდი, ჩასახვის საწინააღმდეგო აბები და ა.შ.
როცა ქალი აბორტის გასაკეთებლად მიდის, ექიმი მას რამდენიმე დღეს აძლევს დასაფიქრებლად, საბოლოო გადაწყვეტილების მისაღებად; რეპროდუქტოლოგი, გინეკოლოგი მას აბორტის მავნე ზეგავლენაზე აფრთხილებენ, მაგრამ თუ პაციენტის გადაწყვეტილება კატეგორიულია, შეუძლია შევიდეს კაბინეტში და აბორტი მაინც გაიკეთოს, ამას ვერავინ აუკრძალავს.აბორტს მიმართავენ არადაოჯახებული წყვილები, ახალგაზრდა გოგონები, უმეტესწილად, კეთდება მინი-აბორტები; ჩვენი კანონმდებლობით აბორტი ორსულობის მე-12 კვირამდეა დასაშვები, წინააღმდეგ შემთხვევაში, ისჯება, თუმცა ბოლო დროს აბორტების რიცხვმა იკლო.
- ხშირად საწინააღმდეგო ციფრებსაც ასახელებენ...
- ასე არ არის. სტაციონარში ე.წ. დიდი აბორტები კეთდება იმ შემთხვევაშიც, თუ ნაყოფს თანდაყოლილი, სიცოცხლესთან შეუთავსებელი დეფექტი, სიმახინჯე აქვს. არის გარკვეული დაავადებები, რომელიც სიცოცხლესთან შეუთავსებელია - გიგრომა, სქელი კისრის ნაკეცი, მშობიარობის 21-22 კვირამდე ეს დეფექტი ვლინდება და შემდეგ ნაყოფის გამოძევება ხდება, შესაბამისი სისტემა იდგმება და ფაქტობრივად, პაციენტს ამშობიარებენ, ეს მხოლოდ დადგენილი სამედიცინო ჩვენებისას ხდება. არის შემთხვევები, როცა ნაყოფს გამოაძევებენ, თუკი მისი გულის ცემა ჩერდება. ნაყოფში დაუნის სინდრომის გამოვლენა 17-18 კვირის ორსულობისას უკვე შესაძლებელია, დედას აქვს უფლება იცოდეს, რომ მისი შვილი ამ სინდრომით დაიბადება და თვითონ წყვეტს, გააჩინოს თუ არა. აბორტი კეთდება მაშინ, როცა მშობიარობა ქალის სიცოცხლეს აშკარა საფრთხეს უქმნის, ან მძიმე პათოლოგიებისას, როგორიც არის შაქრიანი დიაბეტის რთული ფორმა, თირკმლის მძიმე უკმარისობა, თუმცა, საბოლოო გადაწყვეტილებას მშობიარე იღებს - ზოგმა ქალმა იცის, რომ რისკავს, მაგრამ შვილს მაინც აჩენს, ბევრი ასეთი შემთხვევა კეთილადაც მთავრდება.
ლელა გაფრინდაშვილი:
- საქართველოში ჯერ კიდევ აქტუალურია სელექციური აბორტი, ანუ როცა ბავშვის სქესის გაგების შემდეგ, მშობლები წყვეტენ, რომ ნაყოფი, უმეტესწილად მდედრობითი სქესის, მოიშორონ, რაც მხოლოდ ველურობად შეიძლება შეფასდეს. ეკლესია, საზოგადოების გარკვეული წრეები აბორტის კრიმინალიზაციას, მის დანაშაულად გამოცხადებას ითხოვენ, ეს მეთოდი არაერთ ქვეყანაშია ნაცადი და ზოგან დღემდე მოქმედებს, მაგრამ ეს პანაცეა არ არის, პირიქით - ხშირად კიდევ უფრო ამძიმებს დემოგრაფიულ ფონს და დიდ ზიანს აყენებს ქალის ჯანმრთელობას. ამ შემთხვევაში აბორტის კეთება იატაკქვეშეთში გადაინაცვლებს, მომრავლდებიან აბორტმახერები და ეს ბევრად უფრო ველურ ფორმას მიიღებს, ვიდრე ახლაა. აღსანიშნავია, რომ "სიცოცხლის" სამედიცინო და რელიგიური გაგება ერთმანეთისგან განსხვავდება. რელიგიური თვალსაზრისით, ნაყოფი ჩასახვის პირველივე დღიდან ცოცხალია, მედიცინა კი იმ დროიდან მიიჩნევს ცოცხლად, როცა ცენტრალური ნერვული სისტემა ფორმირებულია, ტკივილის განცდა აქვს და ამის მიხედვით ადგენენ, როდის არის დასაშვები აბორტის გაკეთება. ცხადია, არავინ დავობს იმაზე, რომ აბორტი ძალზე საზიანოა ქალის ჯანმრთელობისთვის; ქალებმა, განსაკუთრებით გოგონებმა უნდა იცოდნენ, რომ მაღალია რისკი, ამის შემდეგ შვილი აღარ ეყოლოთ.
ინფოგრაფიკა: ნაყოფის განვითარება 6-დან 20 კვირამდე
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
