15
ივლისიდღის ზოგადი ასტროლოგიური პროგნოზი
ჩვენი რესპონდენტი 21 წლის მფრინავი ნადია ბენკლიანია. ნადიას ჯერ მხოლოდ ა-22-ის ტიპის თვითმფრინავის მართვის გამოცდილება აქვს და საქართველოს მასშტაბით დაფრინავს.
- მფრინავების ოჯახში გავიზარდე, მაგრამ ბავშვობაში არასდროს მქონია ამ პროფესიის არჩევის სურვილი, თუმცა ბოლოს მაინც მფრინავობა გადავწყვიტე. ჩემთვის ეს არის ყველაზე საინტერესო, რომანტიკული და ორიგინალური პროფესია. თავად უნდა გამოსცადოთ თვითმფრინავის მართვა და მიხვდები, რომ ამაზე მაგარი პროფესია არ არსებობს. დედამ იტირა, პროფესიად მფრინავობა როცა ავირჩიე.
- ვინ არის მამა, ცნობილი მფრინავია?
- მამაჩემი არის სტანისლავ ბენკლიანი, ბაბუა, ბიძა - ყველა წამყვანი მფრინავი იყო. 7 თვის ასაკიდან მიწევს ფრენა, 13 წლის ვიყავი, როცა მამას გავყევი და პილოტის კაბინეტში ვიჯექი. ვერ გადმოვცემ, ეს რა ბედნიერება იყო ჩემთვის. შიში საერთოდ არ მაქვს, ფრენას ახლავს დაძაბულობა, მაგრამ ეს ყველაზე მაგარი შეგრძნებაა. როცა პირველად ავფრინდი, ეს იყო ყველაზე მნიშვნელოვანი მოვლენა ჩემს ცხოვრებაში, დაწყნარებული და სიამოვნებისგან დაღლილი დავფრინდი მიწაზე, რადგან პირველი ფრენა წარმატებით განვახორციელე. ძალიან ემოციური ვარ და მამა ხშირად მეუბნება, რომ ეს დიდი ნაკლია.
- ბევრი მფრინავი გოგო გვყავს?
- სამნი ვიყავით, მაგრამ ახლა მხოლოდ ორნი ვართ. ერთი დაიწუნეს. საავიაციოში სწავლისას წელიწადში ერთხელ გვიტარებენ სრულ გამოკვლევას, მთელი ორგანიზმი ჯანმრთელი უნდა იყოს და მხოლოდ ამ შემთხვევაში გეძლევა ფრენის უფლება. ზოგს გულის გამო იწუნებენ, მაგალითად, ერთ გოგოს თავის ქალის ენცეფალოგრამა გადაუღეს და აღმოჩნდა, რომ მას შენელებული რეაქცია ჰქონდა, ამიტომ არ ექნება ფრენის უფლება. თვითმფრინავის მართვა სრულიად განსხვავდება მანქანის მართვისგან. ჩვენ სპეციალური ნავიგაციური რუკების მიხედვით დავფრინავთ, სადაც დახაზულია მარშრუტი. დიდ ავიაციაში კი დისპეტჩერთან შეთანხმების საფუძველზე დავფრინავთ. ქალისთვის თვითმფრინავის მართვა განსხვავებული პროფესიაა, მაგრამ ეს არ არის ის საქმე, რომლის გამოც უარი უნდა თქვა ოჯახსა და საკუთარ თავზე. თვითმფრინავი პედლებით უნდა მართო, ამბობენ, კარგი მფრინავი მანქანას ცუდად მართავსო და მართალია.
- ექსტრიმის მოყვარული ხარ?
- დიახ, მინდა პარაშუტითაც გადმოვხტე. ხიდიდან გადმოხტომა და მსგავსი სისულელეები არ მომწონს, თანაც საქართველოში არ არის ისეთი პარაშუტები, რომლითაც დაცული იქნები. რამდენიმე დღის წინ ძალიან აღელვებულმა ვმართე ა-22 თელავში, მაგრამ ფრენის დროს განვიტვირთე.
- რა უნდა გაითვალისწინონ მგზავრებმა თვითმფრინავით ფრენისას, ბევრს ეშინია...
- ყველა მგზავრს ურიგდება სპეციალური ჟურნალი, სადაც მითითებულია, როგორ უნდა მოიქცნენ ავარიულ შემთხვევაში. ბევრი სკეპტიკურად უყურებს ამას, მაგრამ თუ ზუსტად დაიცავთ მითითებებს, მერწმუნეთ, რომ უბედური შემთხვევის შანსი ნაკლებია.
- სამხედრო ავიაციაში მუშაობას არ აპირებ?
- მტკიცედ მაქვს გადაწყვეტილი - მე სამოქალაქო ავიაციაში ვრჩები. მფრინავს აფასებენ იმით, თუ რამდენი საათი იფრინა, ათას საათს ვინც იფრენს, ის უკვე გამოცდილ მფრინავად ითვლება. განსაზღვრული დროით იკრძალება შვილის გაჩენა, ახლა მოლაპარაკება მაქვს ერთ-ერთ ავიაკომპანიასთან და თუ მეტყვიან, რომ პირველი სამი წელი შვილი არ უნდა გავაჩინო - არ გავაჩენ. ჯერ არ მეჩქარება.
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
