წინასაშობაოდ გაერომ სანტა-კლაუსი ევროპის ტყეების ელჩად დანიშნა

გაეროს სურსათისა და სოფლის მეურნეობის ორგანიზაციამ და გაეროს ევროპულმა ეკონომიკურმა კომისიამ სანტა-კლაუსი ევროპული ტყეების ელჩად დანიშნა. ახლა საშობაო საჩუქრების დარიგების გარდა, სანტა-კლაუსი ტყის მასივებსაც გაუფრთხილდება.

სანტა ახალ თანამდებობაზე მის სამშობლოში, ფინეთის ქალაქ როვანიემში დანიშნეს, რომელიც ლაპლანდიის პროვინციაში მდებარეობს. სწორედ იქაა სანტა-კლაუსის სოფელი და მისი მთავარი საფოსტო ოფისი, სადაც ყოველწლიურად ნახევარი მილიონი წერილი მიდის. ორშაბათს იქ ტყეების ევროპული კვირა გაიხსნა.

"როდესაც სატყეო მეურნეობას მართავენ როგორც საჭიროა, იგი მუდმივად განახლებადი ნედლეულითა და ბიოენერგიით გვამარაგებს. აი, რატომ უნდა მივაქციოთ ევროპულ ტყეებს ყურადღება. ჩვენთვის დიდი პატივია ტყეების ევროპულ კვირას ვუმასპინძლოთ",- განაცხადა ფინეთის სასოფლო და სატყეო მეურნეობის მინისტრმა იარი კოსკინენმა.

ევროპის სატყეო მეურნეობის მინისტრი და 40 ქვეყნის მაღალი რანგის დელეგატი ფინეთში შეიკრიბნენ, რომ სატყეო სექტორისთვის მოქმედების გეგმა განეხილათ, რომელიც ევროპის ტყეების დაცვისკენ და 2020 წლისთვის მწვანე ეკონომიკაზე გადასვლის დაჩქარებისკენაა მიმართული.

"თუ სატყეო მეურნეობაში მოქმედების გეგმას დაამტკიცებენ, ჩვენ საიმედო ინსტრუმენტი გაგვიჩნდება, რომელიც ამ სექტორში მომუშავე სახელმწიფო ორგანიზაციებს რესურსების ინვესტირებაში, პრიორიტეტის განსაზღვრასა და "გამწვანებასთან" დაკავშირებით ღონისძიებების გატარებაში დაეხმარება",- განაცხადა ევროპული ეკონომიკური კომისიის მდივანმა და გაეროს გენერალური მდივნის მოადგილემ სვენ ალკალაიმ.

მომზადებულია newsru.com-ის მიხედვით.