ანა სანაია: როცა ადამიანს ფული გაქვს, ყველაფერი გიყვარს - შოპინგიც და ტანსაცმელიც

ალბათ სერიალიდან - "ჩვენი ოფისი" თეკლა ყველას გახსოვთ. ცოტა ხნის წინ, თეკლას როლის შემსრულებელი - ანა სანაია სერიალში - "ჩვენი ამბავი" გამოჩნდა - ისევ მოსულელო გოგონას როლით და ბერეტით... გულშემატკივრებისგან კომპლიმენტის გარდა, შენიშვნებსაც იღებს და ითვალისწინებს. თეკლას როლში რომ არ ჩავრჩე, ამას სხვა გარჯა სჭირდებაო, - გვითხრა მსახიობმა, რომელსაც ცხოვრების აქტიური სტილი აქვს: სპექტაკლებში მონაწილეობს, სცენარებს წერს... სამსახიობო სფეროში მუშაობის გამო, გაპრანჭვა ადრეული ასაკიდან დაიწყო.

მაკიაჟი და სახის კანის მოვლა

- გამოცდილი ვიზაჟისტებიც მეუბნებიან, - "რთული" თვალი გაქვსო. მაკიაჟის კეთებას ხელი შევაჩვიე: უკვე ვიცი, რა მიხდება და რა - არა. ვისურვებდი, ყველა ქალს მოვლილი სახის კანი და კარგი მაკიაჟი ჰქონდეს.

- მაკიაჟს ყოველდღიურად იკეთებ?

- კი, მაგრამ ზოგჯერ იმდენად უმნიშვნელოს, ვერც შემამჩნევ. ჩემი დღის რეჟიმი ასეთია: ან სპექტაკლი მაქვს, ან - რეპეტიცია. გრიმი თუ არა, სასცენო მაკიაჟის გაკეთება მაინც მიწევს ხოლმე... გრიმი უფრო რთული თემაა და ამაზე ძირითადად, გრიმიორები ზრუნავენ, მაგრამ ისე გავიწაფე, რომ უკვე თავადაც შემიძლია გაკეთება. ცხადია, გრიმისა თუ მაკიაჟის გამო ვერ ვახერხებ სახის იდეალური კანი მქონდეს.

- სახის კანს როგორ უვლი?

- ქალს (მით უმეტეს - მსახიობს) სახის კანი სულ ფორმაში უნდა ჰქონდეს, მაგრამ ზოგს მოვლის საშუალებების შერჩევა ძალზე უჭირს. მეც გამიჭირდა. არ დავმალავ - პრობლემები მქონდა ხოლმე... სახეს ხშირად ვიწმენდ და შესაბამის მკვებავსაც ვისვამ.

- ხალხურ მეთოდებს თუ მიმართავ?

- არა და არც არასოდეს გამოვიყენებ!

- რატომ?

- ასეთი რაღაცების მეშინია.

- კიტრის ნათალისა თუ სხვადასხვა სახის ხილის გეშინია?

- არა, არა, სახეზე კიტრის დადება მეზიზღება! იმ ადამიანების მეშინია, ვისაც სახეზე ხილი და კიტრი ადევს! არაესთეტიკურია. მედიცინა განვითარების იმ დონეზე ავიდა, რომ სახეზე კიტრის დადება საჭირო აღარ არის.

- ბუნებრივ ინგრედიენტებზე დამზადებული კოსმეტიკური საშუალებები ყველაზე ეფექტური და ძვირად ღირებული რომ არის, იცი?

- კი, ბატონო, შეიძლება, ჩემი კრემიც ასეა დამზადებული, მაგრამ საჭიროდ არ მიმაჩნია, ბალი მოვწყვიტო და სახეზე დავიდო. არავითარ შემთხვევაში!

თმის ფერი და ვარცხნილობა

- ბუნებრივი ფერის ხუჭუჭა თმა მაქვს. სხვა ვარცხნილობის გაკეთებაც მიცდია, მაგრამ ბუნებრივობა მომწონს. გაშლილი, გრძელი თმა კარგია.

- მოკლე ვარცხნილობა არასდროს გქონია?

- კი, "კარე" მქონდა. ისიც კარგი იყო, მაგრამ ვფიქრობ, რომ ამჟამინდელი ვარცხნილობა უფრო მეტად მიხდება.

- ვარცხნილობის მოსაწესრიგებლად სილამაზის სალონში ხშირად დადიხარ?

- სილამაზის სალონში ძალიან ხში­რად დავდივარ, ოღონდ - არა ვარცხნილობის მოსაწესრიგებლად, არამედ ფრჩხილების "გასაკეთებლად", სახის პროცედურებისთვის... ჩემს ვარცხნილობას ბევრი წვალება არ სჭირდება. მთავარია, გქონდეს შამპუნი, თმის ნიღაბი, ზეთი, მუსი და თვითონ თმა (იცინის). თუ ფენს დაახმარ, მთლად გადასარევია!

- თმა არასოდეს შეგიღებავს?

- ადრე ფრანგული მელირება გავიკეთე და ძალიან მომიხდა...

ვარჯიში და დიეტა

- ვარჯიში მეზარება. ამიტომ სამეჯლისო-სპორტულ ცეკვაზე დავიწყე სიარული. დიეტის დაცვას სულ ვცდილობ, მაგრამ არ გამომდის. ბევრნაირი დიეტა ვიცი. ამ საკითხზე კონსულტაციის გაწევა უკვე პროფესიულ დონეზე შემიძლია, მაგრამ პირადად მე, დიეტის დაცვა არ შემიძლია: ჭამა ძალიან მიყვარს. გურმანი ვარ!

- კერძებს თავადაც ამზადებ?

- კი, რაღაცებს ვამზადებ ხოლმე და მგონი, კარგი გამომდის.

- ოდესმე წონაში ძალიან მოგიმატია?

- სულ მომატებული არ ვარ? უნდა გეკითხა, - ოდესმე წონაში თუ დაგიკლიაო (იცინის)? საერთოდ, წონა მაწუხებს - მინდა, ნაკლებს ვიწონიდე!

- კარგი, მაშინ გვითხარი, ოდესმე ძალიან გამხდარი თუ ყოფილხარ?

- ეს ფაქტი ბუნდოვნად მახსენდება: 5 წლის წინ. რაღაც დიეტა დავიცავი და დავიკელი.

სამოსი

- როცა ადამიანს ფული გაქვს, ყველაფერი გიყვარს - შოპინგიც და ტანსაცმელიც. თუ ბევრი ფული გაქვს, მით უმეტეს - მაღაზიებში წოწიალი ძალზე სასიამოვნოა.

- მაღაზიებში მარტო დადიხარ ხოლმე?

- თუ მარტო ვარ და იქვე ახლოს მაღაზიაა, არ ვიტყვი: ვაიმე, მარტო ვარ და მაღაზიაში ხომ არ შევალ-მეთქი? ისე, ვინმესთან ერთად თუ ვარ, უფრო ხალისიანად ვშოპინგობ.

- სამოსს ძნელად არჩევ?

- თუ ფული მაქვს, ყველაფერს ადვილად ვარჩევ, მაგრამ თუ საკმარისი თანხა არ მაქვს, ყველაფერი რთულდება.

- როგორი სტილის სამოსი მოგწონს?

- ყველანაირი - საღამოს სამოსიდან დაწყებული, სპორტული ტანსაცმლით დამთავრებული. რა სტილის სამოსიც მაქვს, იმას ვიხდენ და ასე ჯახირით მივდივართ წინ.

სამკაული და აქსესუარები

- სამკაული და აქსესუარი რაც უფრო ძვირფასია, მით უკეთესია. გაქვს? გაიკეთე. არ გაქვს? - ნუ გაიკეთებ. ოქრო თუ იქნება, უკეთესია, ბრილიანტი ქალს უხდება, მარგალიტი - ამშვენებს, ფირუზზე არაფერი გამიგონია (თვალით არც მინახავს), მაგრამ ამბობენ, - კარგიაო. ალბათ ეგეც მომიხდება (იცინის). ძვირფასი ქვები ყველა ქალს უნდა ჰქონდეს.

- შენთვის საყვარელი სამკაული ან აქსესუარი რომელია?

- საყურეები და ბრილიანტის ბეჭდები მიყვარს. ქუდები, ჩანთები, სათვალეები - ყველაფერზე ვგიჟდები! "ბრენდს" მნიშვნელობას ვანიჭებ. თუკი ჩანთა და სათვალე "შანელის" არის, რა თქმა უნდა, ძალიან მაგარი, დახვეწილი და ქალური იქნება. ვინც ამ ბრენდის ნივთებს ატარებს, ის ადამიანი ორმაგად მიყვარს და მომწონს.

- უბრალო, ნაკლებად ცნობილი ფირმის პროდუქცია შენს მოწონებას არასოდეს იმსახურებს?

- სხვა გზა არ მაქვს, თორემ სულ "შანელი" მომეწონებოდა (იცინის). ცხადია, უბრალო რაღაცებიც მომწონებია. საერთოდ, ვგიჟდები, როცა ადამიანს გემოვნებიანად აცვია. როცა რაიმე უბრალოს, მაგრამ ლამაზს ვიყიდი და ვიცვამ, მიხარია.

საქმე

- ამჟამად მოზარდ მაყურებელთა თეატრში სპექტაკლის - "კლოუნადა" პრემიერა გვაქვს. მარჯანიშვილის თეატრში რამდენიმე სპექტაკლში ვთამაშობ. ჯერჯერობით, ჩემი ძირითადი საქმიანობა ეს გახლავთ. კიდევ ბევრი პროექტი და სამომავლო გეგმა მაქვს, მაგრამ ამ თემაზე ლაპარაკი ნაადრევი მგონია. სულ ვმუშაობ. მხოლოდ 1 სფეროში არ ვარ: ხელოვნებას რაც შეეხება, ვცდილობ, სულ საქმის კურსში ვიყო და საქმე თავადაც ვაკეთო, მაგალითად - სცენარები ვწერო, რაღაცები გადავიღო, ვითამაშო, სხვაც ვათამაშო...

- სცენარებს რა ჟანრის ფილმებისთვის წერ?

- ალბათ კონკრეტულ ჟანრში მუშაობას არც ვისურვებდი. რაც მაინტერესებს, იმაზე ვწერ...

- როგორ ფიქრობ, შენ მიერ შექმნილი პერსონაჟის როლის მორგება უფრო გაგიადვილდებოდა?

- მოკლემეტრაჟიან ფილმში მითამაშია, სადაც ჩემ მიერ შექმნილი პერსონაჟი განვასახიერე. ეს ის შემთხვევა იყო, როცა ვიცოდი, რა მინდოდა ანუ ვიღაც არ მეუბნებოდა, თავად რა სურდა... კარგია, მაგრამ რთულია.

- ახლახან სერიალში - "ჩვენი ამბავი" გამოჩნდი. შენ მიერ განსახიერებულმა პერსონაჟმა თეკლა გაგვახსენა, სერიალიდან - "ჩვენი ოფისი". თან, ისევ ბერეტი გეხურა...

- სიმართლე გითხრა, შეიძლებოდა, ეს პერსონაჟი ცოტა სხვანაირი ყოფილიყო, მაგრამ ეტყობა, ძველ როლთან ყველა მაიგივებს და სტერეოტიპი ჩამოყალიბდა: ბერეტს როგორც კი დავიხურავ, მაშინვე თეკლა "ვხდები", მაგრამ ძალიან მომეწონა, რომ ხალხს ეს გმირი გაახსენდა. ახალ სერიალშიც სულელი გოგოს როლი შევასრულე - ამას ვერ გავექეცი, მაგრამ მიმაჩნია, რომ ახლა უფრო "სადად" ვითამაშე...

- შენი შემოქმედების ისეთივე თაყვანისმცემელს თუ ისურვებდი, როგორიც შენი პერსონაჟია?

- არა, არ ვისურვებდი. ასეთი ექსცენტრიკული ადამიანების ცოტა არ იყოს, მეშინია. სერიალის პერსონაჟს - ზურას ბუნებრივი რეაქცია ჰქონდა, როცა ჩემი გმირი ზედმეტ კომპლიმენტს ეუბნებოდა... ასეთი გოგონები მართლა არსებობენ - ეს "ყურით მოთრეული" თემა არ არის.

- შენს გულშემატკივრებთან როგორი ურთიერთობა გაქვს?

- მიხარია, ჩემი შესრულებული რო­ლებისთვის კომპლიმენტს რომ მეუბნებიან. შენიშვნებსაც ვიღებ და ვითვალისწინებ.

ოჯახი

- ჩემი ოჯახის წევრები არიან: დედა, მამა და ჩემზე 5 წლით უმცროსი და - ნინო. ნინო პროფესიით ჟურნალისტია. ამჟამად არ მუშაობს, მაგრამ იმედია, სამსახურს იშოვის.

- რაიმე ოჯახური ტრადიცია თუ გაქვთ?

- როგორც ყველა, ახალი წლის დღესასწაულს ჩვენც ერთად ვხვდებით. ძალიან მყუდრო, თბილი და სასიამოვნო ოჯახი გვაქვს...

დასვენება და გართობა

- თუ ზაფხული არ არის და ძალიან არ ცხელა, ჩემთვის დასვენებაც, დასაქმებაც და საერთოდ ყველაფერი - თეატრი და კინო გახლავთ. ამ სფეროში თავს კარგად ვგრძნობ და ბედნიერი ვარ, რომ მსახიობის პროფესიას ვემსახურები. გართობას რაც შეეხება, მეგობრებთან ერთად ყოფნას არაფერი მირჩევნია. ახლა ერთი ტრადიცია გვაქვს: ერთ-ერთ მეგობართან მივდივართ, რომელმაც კარგი ტელევიზორი შეიძინა და ახალ, საინტერესო ფილმებს ვუყურებთ, განვიხილავთ, ვმხიარულობთ.

ეთო ყორღანაშვილი

ჟურნალი ”გზა”

(გამოდის ხუთშაბათობით)

იხილეთ ასევე: ანა სანაია აფხაზეთის დაბრუნებაზე ოცნებობს