რითი ვართ ფასეული ევროკავშირისთვის? - ლალი მოროშკინა ქართველებზე

სოზარ სუბარის მრჩეველი ლალი მოროშკინა "ფეისბუქის" საკუთარ გვერდზე ქართველების ტოლერანტობის შესახებ წერს და აღნიშნავს, რომ ევროკავშირისთვის საქართველო პირველ ყოვლისა, ქართველი ხალხის ამ თვისებით არის საინტერესო.

"დღეს დილით სილამაზის სალონში გავიარე, თმა მქონდა შესაჭრელი. ერთი ძველისძველი სალონია ადრე, რომ "საპარიკმახერო" ერქვა ვაჟას და ასათიანის კუთხეში, პირველად თმები იქ შევიჭერი და ალბათ უკანასკნელიც იქ იქნება - ეს ჩემი ისტორიის ნაწილია.

თმის ხელოსნები ძირითადად სომხები არიან, ჩვენ ერთად ვიზრდებოდით, ბევრმა ხელობა ჩემს თავზე ისწავლა;) ოჯახებს ვქმნიდით, ერთმანეთს ბავშვებს ვუნათლავდით, უფროს თაობას ერთად ვკრძალავდით... ძნელბედობის ჟამიც არაერთხელ დამდგარა... ხან მე ვსესხულობდი მათგან, ხან ისინი ჩემგან... ასე მოვიდა დღემდე... ცოტა სომხური, ცოტა რუსული, ცოტა ქართული, ცოტაც ტბილისის ესპერანტოდ ქცეული ჰავლაბრული და სოფელიც აშენდა.

არ გაინტერესებთ დღეს რითი იყვნენ დაკავებულები ჩემი სომეხი მეგობრები?

მორიგი თურქული სერიალის გმირების ძვლებს "რეცხავდნენ". გამეცინა, გამახსენდა ერევანი, ორი წლის წინ ერევნის სახ. უნიში ლექციებს ვკითხულობდი და საოცარი აღმოჩენა გავაკეთე... სომხების ახალ თაობასაც თვალებში განსაკუთრებული სევდა აქვთ ჩარჩენილი, ეს გენეტიკური ტკივილია საუკუნეების წინ მომხდარი უბედურების...

ერევანში პირველად ჩასულმა აუცილებლად უნდა მიაგო პატივი მილიონობით დაღუპული უდანაშაულო ადამიანების საფლავებს, მათი სისხლიანი ისტორია სომხეთის ეროვნული ტრაგედიაა.

დღეს კი, 2013 წლის 5 დეკემბერს ჩემი საყვარელი სომეხი "თმის ჯადოქრები" ლაზათიანად უზიარებენ ერთმანეთს მორიგი თურქული სერიალის მოკლე შინააარს...

და ეს კარგია! ძალიან კარგი, იმიტომ რომ სიძულვილი მხოლოდ სიძულვილს შობს, ბოროტებას ბოროტება მოაქვს, სისხლს სისხლი და ვერასოდეს გამოვალთ ამ მოჯადოებული წრიდან!

არ თქვათ ახლა რუსია და სენტიმენტები მოეძალაო, მაშინ რატომ დგას მცხეთაში ლერმონტოვის ძეგლი, რატომ გვაქვს ლესელიძეზე სინაგოგა, რატომ ვაშენებთ დღემდე მეჩეთებს, რატომ არსებობს შარდენის ქუჩა, რატომ ვიცით ვინ არის ლესია უკრაინკა, რატომ ვცემთ პატივს გრიბოედოვს, რატომ გვტკივა ცხინვალი და სოხუმი და რატომ მიტანთ მე?

იმიტომ რომ ქართველები ყოველთვის ყველაზე ტოლერანტულები იყვნენ!

გვახსოვდეს ეს!!!

აი ზუსტად ამით ვართ ფასეული ევროკავშირისთვის!

მუდამ თქვენი რუსი ლ.მ.", - წერს ლალი მოროშკინა.