2
ივნისიდღის ზოგადი ასტროლოგიური პროგნოზი
ადიგენის რაიონის სოფელ ჭელაში მინარეთი აღადგინეს. მისი მონტაჟი სოფელში გვიან ღამით დაიწყო და რამდენიმე საათს გაგრძელდა. მინარეთის აღმართვაში ადგილობრივი მოსახლეობაც მონაწილეობდა. პროცესს სამართალდამცავები აკონტროლებდნენ.
პარალელურად, სოფელში მინარეთის აღმართვას აპროტესტებდა რამდენიმე მართლმადიდებელი სასულიერო პირი, ისინი საქართველოში თურქული ექსპანსიის მოსალოდნელ გაძლიერებაზე საუბრობდნენ.
მამა დავით ისაკაძის განცხადებით, ადგილი, სადაც მინარეთი აღმართეს, მათი წინაპრების სისხლით მორწყული მიწაა.
"ეს სწორედ მუსლიმებთან ბრძოლაში სისხლით მორწყული მიწაა. ორგმაგად უფრო შეურაცხმყოფელია ის, რაც დღეს აქ მოხდა. მე მგონი ქართველი ადამიანი არ შეეგუება ამას. ეს არის თურქული ექსპანსია, ევროკავშირის დაკვეთა", - აცხადებს მამა დავითი.
როგორც სრულიად საქართველოს მუსლიმთა მუფთი ჯემალ პაქსაძე აცხადებს, მიმდინარეობს მუშაობა კანონმდებლებთან ერთად, რათა საკანონმდებლო ბაზა მოგვარდეს და დაახლოებით 40-მდე მეჩეთი, რომელიც საქართველოშია, დარეგისტრირდეს.
მინარეთის აღდგენის საკითხს უკვე გამოეხმაურა ქართველ მუსლიმთა კავშირიც.
მუსლიმთა კავშირი სოფელ ჭელაში მინარეთის აღდგენასთან დაკავშირებით განცხადებას ავრცელებს, სადაც საქართველოს ყოფილ პრემიერს, ბიძინა ივანიშვილს მადლობას უხდის.
ქართველ მუსლიმთა კავშირის განცხადებას უცვლელად გთავაზობთ:
"სოფელ ჭელაში თავის ადგილს დაუბრუნდა რამდენიმე თვის წინ "მოტაცებული" მინარეთი. ვფიქრობთ, რომ ეს არის მოვლენა, როცა შეიძლება ითქვას, საქართველოში იმარჯვებს დემოკრატია. ეს არის, საქართველოს ყველა მოქალაქის მონაპოვარი, განურჩევლად რწმენისა და აღმსარებლობისა. ქართველი მუსლიმების სახელით გვსურს მადლობა გადავუხადოთ ყველას, ვინც მონაწილეობა მიიღო ამ პროცესის მშვიდად და დემოკრატიულად მოგვარებაში. კერძოდ, გვსურს მადლობა გადავუხადოთ საქართველოს მთავრობის იმ უწყებებს და პირებს, რომლებიც ჩაერთვნენ და მიიღეს გონივრული გადაწყვეტილება მინარეთის თავის ადგილზე აღმართვასთან დაკავშირებით. მადლობას ვუხდით საქართველოს ყოფილ პრემიერ- მინისტრს, ბატონ ბიძინა ივანიშვილს, რომლის დიდი წვლილიც არის აღნიშნული საკითხის მოგვარებაში; სახალხო დამცველის აპარატს, მასთან არსებულ რელიგიათა საბჭოს ხელმძღვანელობას და მის ყველა წევრს; საქართველოში მოქმედ ყველა რელიგიურ ორგანიზაციას, განსაკუთრებით, ევანგელურ-ბაპტისტური ეკლესიის წინამძღვარს, მთავარეპისკოპოსს მალხაზ სონღულაშვილს; საქართველოში მოქმედ არასამთავრობო და უფლებადამცველ ორგანიზაციებს; რეგიონალურ და ცენტრალურ მედიასაშუალებებს, ჟურნალისტებს; საქართველოში მოქმედ დიპლომატიურ კორპუსს; ჩვენი მეგობარი ქვეყნების ელჩებს; უცხოეთში ჩვენი ქვეყნის დემოკრატიული განვითარების მხარდამჭერ საერთაშორისო ორგანიზაციებს. არ შეგვიძლია არ აღვნიშნოთ და მადლობა არ ვუთხრათ ადგილობრივ ქართველ მუსლიმებს მოთმინებისათვის, იმ გონივრული, მიზანმიმართული და სწორი ქმედებებისათვის, რამაც ხელი შეუწყო პროცესების მშვიდ და დემოკრატიულ ჩარჩოებში წარმართვასა და საბოლოო მოგვარებას. აქვე, ვადასტურებთ ჩვენს პატივისცემას რეგიონის მართლმადიდებელი მრევლისადმი, რომლებიც პატივს სცემენ განსხვავებული მრწამსის ადამიანებთან ურთიერთობას და ხელს უწყობენ ადგილობრივ მუსლიმ მოსახლეობასთან კეთილმეზობლური კავშირების განმტკიცებას".
მინარეთის დემონტაჟი აგვისტოს ბოლოს მოხდა, მაშინ ამის ოფიციალური მიზეზი უკანონო მშენებლობა გახდა.
