22
ივლისიდღის ზოგადი ასტროლოგიური პროგნოზი
კონკურენციისა და სახელმწიფო შესყიდვების ელექტრონული ვაჭრობის ერთიან ელექტრონულ სისტემაში ასახული შედეგების თანახმად, 100 ავტობუსს მერიას ყველაზე იაფად ჩინური კომპანია, XIAMEN GOLDEN DRAGON BUS CO სთავაზობს.
საქართველოს ელექტრონული შესყიდვების სისტემის ისტორიაში ყველაზე მსხვილი ტენდერისათვის განაცხადების მიღება გუშინ 16:00 საათზე შეწყდა.
თბილისის მერიამ 100 ახალი სამგზავრო ავტობუსის შესაძენად ტენდერი 4 ნოემბერს გამოაცხადა. ახალი ავტობუსების შესაძენად მერიის 2013-2014 წლის ბიუჯეტიდან მაქსიმუმ 55 მილიონი ლარის გამოყოფა იგეგმება, თითო ავტობუსზე მაქსიმუმ 550 000 ლარი.
XIAMEN GOLDEN DRAGON BUS C0-ს ბოლო სატენდერო შეთავაზება 31,660,626 ლარს შეადგენს და ყველაზე დაბალია. შესაბამისად, ტექნიკური დოკუმენტაციის შესაბამისობის შემთხვევაში, ტენდერში გამარჯვებულად, სავარაუდოდ, ეს კომპანია დასახელდება. სატენდერო კომისას საბოლოო გადაწყვეტილება ჯერ არ გამოუქვეყნებია.
XIAMEN GOLDEN DRAGON BUS CO-ს ვებ-გვერდზე ნათქვამია, რომ კომპანია 1992 წლიდან სპეციალიზებულია საშუალო და დიდი ზომის ავტობუსებისა და სამარშრუტო ტრანსპორტის დამზადებაზე. ვებ-გვერდის თანახმად, კომპანია ფლობს სამ ქარხანას, სადაც 3200 ადამიანია დასაქმებული და წლიურად 40 000 ავტობუსს აწარმოებს. ამასთან, GOLDEN DRAGON BUS-ი ექსპორტს მსოფლიოს 80-მდე ქვეყანაში ახორციელებს.
სატენდერო დოკუმენტაციაში მერიის მიერ წამოყენებული პირობების თანახმად, ავტობუსები უნდა იყოს 12 მეტრი სიგრძის და იტევდეს არანაკლებ 85 მგზავრს. ამასთან, ავტობუსებში უნდა იყოს 25-35 დასაჯდომი ადგილი და სივრცე არანაკლებ ერთი შეზღუდული შესაძლებლობების მქონე პირის ეტლისათვის. გარდა ამისა:
- ავტობუსის ჭერი და გვერდითა კედლები უნდა იყოს თბო-იზოლირებული. ჭერზე უნდა იყოს არანაკლებ ერთი ელექტრონულად მართვადი ლუქი;
- ავტობუსს მარჯვენა მხრიდან უნდა გააჩნდეს 3 ასასვლელი, სადაც არ უნდა იყოს საფეხურები. ავტობუსი აღჭურვილი უნდა იყოს გაჩერებაზე ძირს დაშვების მექანიზმით, რათა მოხუცებს, შეზღუდული შესაძლებლობის მქონე პირებსა და ჩვილ ბავშვიან მგზავრებს შესაძლებლობა ჰქონდეთ, უფრო ადვილად მოხვდნენ ავტობუსში. ამასთან, ერთ-ერთ კარს უნდა ჰქონდეს ინვალიდთა ეტლების ასაყვანი კიბე;
- ავტობუსებში უნდა იყოს ინტეგრირებული გათბობა, კონდიცირება და ვენტილაცია. კონდიცირება და ვენტილაცია უნდა ხდებოდეს განცალკევებულად.
აქვე აღნიშნულია, რომ პრედენდენტი კომპანიის მიერ შემოთავაზებული ყველა ავტობუსი უნდა იყოს ერთი მარკის და ერთი მოდელის. ავტობუსები არ უნდა იყოს ექსპლუატაციაში ნამყოფი და გამოშვების თარიღი უნდა იყოს არანაკლებ 2013 წელი.
ასევე, დოკუმენტაციაში ნათქვამია, რომ თითოეულ ავტობუსში რამდენიმე ვიდეოთვალი უნდა იყოს დამონტაჟებული და გადაღებული კადრების შენახვა მანქანის სისტემაში მინიმუმ 96 საათის განმავლობაში იყოს შესაძლებელი.
ტენდერში გამარჯვებულმა კომპანიამ პირველი 20 ავტობუსი 2014 წლის 30 ივნისამდე უნდა მიაწოდოს შემსყიდველს, დანარჩენი 80 ავტობუსი კი ეტაპობრივად - მომავალი წლის ნოემბრამდე. მიმწოდებელი ვალდებული იქნება, ახალი მანქანების ექსპლუატაციის კუთხით ტრეინინგები ჩაუტაროს 200 მძღოლს.
"საერთაშორისო გამჭვირვალობა - საქართველომ" სხვადასხვა საწარმოში გამოშვებული ავტობუსის მოდელებზე ინფორმაცია მოიძია და დაასკვნა, რომ ისინი, ძირითადად, ტენდერში მოთხოვნილ სპეციფიკაციებს შეესაბამება. ორგანიზაციის მიერ გამოქვეყნებულ ანალიზში ნათვამია, რომ "არაფერი მეტყველებს იმაზე, რომ დოკუმენტები მეტისმეტად სპეციფიკურია ან რომელიმე კონკრეტული მიმწოდებლის სასარგებლოდაა შემუშავებული."
ტენდერში გარდა GOLDEN DRAGON-ისა, მონაწილეობას იღებდნენ კომპანიები: ჩეხური KAREX, a.s.; თეგეტა თრაქ ენდ ბას საქართველოდან; პოლონური Solaris Bus & Coach S.A.; და ჩინური - Zhengzhou Yutong Bus Co..LTD. ყველაზე დიდი თანხა ავტობუსებისათვის ჩეხურმა KAREX, a.s.-მა მოითხოვა, მისი საბოლოო შეთავაზება 53,328,000 ლარს შეადგენდა.
სატენდერო დოკუმენტაციაში ჩამოთვლილი პირობების გათვალისწინებით, მეტ-ნაკლებად შესაფერისი ავტობუსი XIAMEN GOLDEN DRAGON BUS CO-ს ვებ-გვერდზე იძებნება. თუ ტენდერში გამარჯვებულად ეს კომპანია დასახელდება თბილისელები ივნისიდან, სავარაუდოდ, დაახლოებით ასეთი ახალი ავტობუსებით იმგზავრებენ .
BPN.GE
