26
მაისიდღის ზოგადი ასტროლოგიური პროგნოზი
როგორ უნდა შეხვდეს ადამიანი თავს დატეხილ უბედურებას, როგორ უნდა დაძლიოს მწუხარება ისე, რომ არ გაბოროტდეს და სასოწარკვეთილებამ არ შეიპყროს? - ამ საკითხის განხილვა მღვდელ მიქაელ მეკრავიშვილს ვთხოვეთ:
- როდესაც ადამიანი ქრისტიანული ცხოვრების გზას ირჩევს, ისიც უნდა იცოდეს, რომ თავისი კუთვნილი ჯვარი უნდა ატაროს. შეიძლება ეს ჯვარი ძალიან მძიმე იყოს, მაგრამ მის ტარებაში უფლის შემწეობის იმედი უნდა ჰქონდეს. ყველას თავისი ცხოვრება აქვს და ამ გზაზე ყველას თავისი წილი ტკივილი და სიხარული აქვს გასავლელი. წმინდა მამები ამბობენ: განსაცდელი ისე გამობრძმედს ადამიანს, როგორც ქურაში დანთებული ცეცხლი - ოქროსო. ამავე დროს, მწუხარება და უბედურება მწარე წამლის როლსაც ასრულებს.
- მამაო, როგორ უნდა გავიგოთ ეს?
- ახლავე აგიხსნით: განსაცდელი ყველაზე უკეთესად აქარვებს ადამიანის ცოდვისაკენ მიდრეკილებას, წმენდს ჩვენს ფიქრებსა და აზრებს, ძალიან ბევრი ადამიანი სწორედ განსაცდელის დროს მიდის უფალთან და ეკლესიურ ცხოვრებას იწყებს. მწუხარება სულიერად ამაღლებს და აძლიერებს ადამიანს, სიძნელეების გადალახვას აჩვევს, ცხოვრებისეულ გამოცდილებას სძენს და ისიც ნელ-ნელა განიწმენდს თავის სულს ცოდვილი ზრახვებისა და მიდრეკილებებისაგან. როდესაც ადამიანი კარგად არის, ჰგონია, რომ მის გარშემო მყოფნი ზუსტად ასეთ მდგომარეობაში არიან. გალაღებული კაცი სრულყოფილად ვერ შეიგრძნობს იმის ტკივილს, ვინც ავადაა, ვისაც დიდი მწუხარება დაატყდა თავს, ვინც ცხოვრებისაგან დაჩაგრულია. მოვლენილი განსაცდელის შედეგად კი აცნობიერებს, რომ შეჭირვებული ადამიანისათვის თუნდაც ერთ ტკბილ სიტყვას, ან ერთ გაღიმებასაც ძალიან დიდი შვება მოაქვს. ასეთ მაგალითს მოვიყვან: რა ხდება ოჯახში, სადაც ავადმყოფია? - რა თქმა უნდა, ოჯახის წევრები მას უვლიან, ზოგჯერ ხელითაც აჭმევენ, მასზე ზრუნავენ და ამ ყურადღებისა და სიყვარულის გამო ისინიც იწმინდებიან. ავადმყოფი ტკივილითა და მოთმინებით იწმინდება, ხოლო მომვლელები - მისი მოვლით. ავადმყოფი თითქოსდა, აბათილებს იმ ადამიანთა ცოდვებს, ვინც მას უვლის და ტკივილებს უმსუბუქებს.
- როდესაც პატარა ბავშვი ან ახალგაზრდა, უცოდველი ადამიანი იღუპება, ახლობლები ვერ იტევენ ამ მწუხარებას და ზოგჯერ უფალს გმობენ...
- ძნელი სათქმელია, მაგრამ ასეთ დროს ადამიანი სასოწარკვეთილებაში არ უნდა ჩავარდეს, იმიტომ, რომ ჩვენ ვიცით: ყველაფერი ღვთის ნებით ხდება. ადამიანი, რომელიც მწუხარების გამო იმედს კარგავს, ნებსით თუ უნებლიეთ ღვთის არსებობას უარყოფს. ეს საშინელებაა, სასოწარკვეთილება არ უნდა მოგვერიოს, მან ადამიანი ვერ უნდა დაჯაბნოს, პირიქით, განსაცდელისა და მწუხარების დროს უფრო მეტად უნდა აღვიჭურვოთ ღვთის რწმენითა და იმედით. ასეთ დროს ადამიანმა ყურადღებით უნდა გადახედოს თავის ცხოვრებას, იქნებ წარსულში რაღაც ცოდვას სჩადიოდა და თავის დანაშაულს ვერ აცნობიერებდა, იქნებ ვიღაცას ვნებდა და ამას ვერ ხედავდა. განსაცდელი, გაჭირვება აფხიზლებს კაცს. ზოგჯერ უფალს მართლაც გაჰყავს ამ ქვეყნიდან უცოდველი არსებები, მაგრამ ეს ღვთის ნებითა და დაშვებით ხდება. სხვათა შორის, ძველ აღთქმაში წერია: ნუ სცოდავ, თორემ პასუხს ან შენ, ან შენს შვილსა და შვილიშვილს მოვთხოვო. ცოდვა შეიძლება შვიდ თაობაზეც გადავიდეს, თუ ჩამდენმა არ მოინანია. ტრაგიკულ შემთხვევას ან უცაბედ სიკვდილს ყოველთვის აქვს ფარული მიზეზი და საფუძველი. ძალიან ბევრი ადამიანი მოსულა ეკლესიაში და უთქვამს: კომუნისტების დროს ჩემმა წინაპარმა ეკლესია დაანგრია, სასულიერო პირი მოკლა, ხატი შეურაცხყო და იმის შემდეგ ჩვენმა გვარმა ვერ გაიხარაო. ასეთი ცოდვის ჩამდენი ან თვითონ ისჯება, ან მოგვიანებით მისი ოჯახის წევრი იხდის საზღაურს. ამავე დროს, შეიძლება თავის დროზე ადამიანმა ვიღაც გაამწარა ან მოკლა, ან არასწორი ცხოვრებით ცხოვრობდა. ამიტომ, შეიძლება მისი შვილს ან შვილიშვილს მოუხდეს ამის გამო პასუხისგება.
- დღეს ბევრისთვის ცოდვა აღარ არის სიძვა, მრუშობა, მეუღლის ღალატი და ბევრი სხვა რამ, რაც ადრე საქართველოში დიდ სირცხვილად მიაჩნდათ.
- გეთანხმებით. მიმოვიხედოთ ირგვლივ რა ხდება: გამუდმებით ვხედავთ უხამს რეკლამებს, გვესმის უხამსი მუსიკა, რომელიც ღვთის გმობითა და უწმაწური სიტყვებით არის გაჯერებული... ეს ყველაფერი ადამიანში რელიგიური გრძნობების ნაცვლად ცხოველურ ინსტინქტებს აღვიძებს, მერე ეს ბინძური ნალექი ადამიანის სულში გროვდება და ათასგვარ სიმახინჯეს წარმოშობს. აღარაფერს ვამბობ ნარკოტიკსა და აზარტულ თამაშებზე. დღეს ადამიანის გარეგნობაც კი სტანდარტებით არის განსაზღვრული: რატომღაც სურთ, რომ ყველას ერთი სიმაღლე, წონა და მკერდის ზომა ჰქონდეს. არადა, ადამიანი სწორედ ისეთია მშვენიერი, როგორიც უფალმა შექმნა. თუ ვიღაცის წელის ზომა და თვალის ფერი დადგენილ სტანდარტებს შეეფერება, ის უეცრად ხდება ცნობილი და პოპულარული, ისე, რომ მის ზნეობაზე, მის შინაგან სამყაროზე არავინ ფიქრობს. ეს არის სწორედ ეშმაკის მიერ დაგებული მახე: ბოროტ ძალას სურს შექმნას ერთგვაროვან ადამიანთა მასა, რომელიც სტანდარტულად აზროვნებს, უგუნურია და ყველანაირ ცოდვაზე წამსვლელი.
- მამაო, ბოლო წლებში საქართველოში ძალიან ბევრი ოჯახი გაღატაკდა, ბევრს ვალი დაედო და მამაპაპისეული ქონება დაკარგა. ზოგიერთი ამ გასაცდელსაც ვერ უძლებს - განსაცდელს, რომელსაც სიდუხჭირე ჰქვია...
- მოდით, დავფიქრდეთ, იქნებ ეს ქონება უკანონო, უფლისათვის მიუღებელი გზებითა და საშუალებებით იყო დაგროვილი? ქურდმა ძალიან კარგად იცის, რომ მას ადრე თუ გვიან დაიჭერენ, ბოროტმოქმედმაც იცის, რომ ადრე თუ გვიან სასჯელი უწევს. უკანონოდ შეძენილმა ქონებამაც იცის ასეთი რამ: მის მფლობელს მუდმივი შიში აქვს, რომ ადრე თუ გვიან დაკარგავს მას. უმეტესწილად ეს შიში მართლდება და ქარის მოტანილს ქარი წაიღებს ხოლმე: ან ამ ოჯახის რომელიმე წევრი ავადდება, ან ცუდ გზას ადგება და ერთ დროს შეძლებული ადამიანი ღარიბი და უქონელი ხდება. ასეთი ქონება ხშირად სასჯელად იქცევა ხოლმე მთელი მისი ოჯახისათვის. ამის გამო უფლის გმობა დაუშვებელია, რადგან ღვთაებრივი კანონები იმისთვის არსებობს, რომ ჩვენი სისუსტე დავინახოთ, რომ გამოვსწორდეთ და უფლის იმედით ვიაროთ ამ წუთისოფლის გზაზე. უფალი უხვად გვაძლევს თავის წყალობას, რომელიც აუცილებლად უნდა დავაფასოთ. გულწრფელად უნდა გვიყვარდეს ადამიანები და განსაცდელსაც ადვილად გადავიტანთ და ყველაზე დიდი მწუხარებიდანაც კი განწმენდილნი და განმტკიცებულნი გამოვალთ.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
