31
მაისიდღის ზოგადი ასტროლოგიური პროგნოზი
მეგრული ენის მივიწყებისგან დაცვა და სამეგრელოს რეგიონის ავტონომიურ რესპუბლიკად განხილვა იყო ზუგდიდში გამართული შეხვედრის თემა, სადაც ქართულის პარარელულად საუბრები მეგრულ ენაზეც წარიმართა. შეხვედრის მონაწილეებისთვის, ოთხ ძირეულ შეკითხვაზე პასუხის გაცემა იყო მნიშვნელოვანი: არის თუ არა მეგრული ენა? თუ არის, მაშინ, ის ეროვნული სიმდიდრეა თუ არა? ემუქრება თუ არა გადაშენების საფრთხე? რა ღონისძიებები უნდა განხორციელდეს ამ საშიშროების თავიდან ასარიდებლად?
"ვფიქრობ, მეგრული ენა თითქმის განადგურებული და აგონიაშია. ჩვენ ახალ პრეზიდენტს ვთხოვთ, ყურად იღოს ეს საკითხი, რადგან მეგრული ენის სიკვდილით ქართული ენის კვდომის პროცესიც დაიწყება", - განმარტა შემოქმედთა რეგიონული საზოგადოება "აიას" თავმჯდომარე ედემ იზორიამ.
განათლების ცენტრის "კოლხიდას" წარმომადგენელის იური ღვინჯილიას განცხადებით, მთავრობისა და პოლიტიკურ პარტიათა დამოკიდებულებაც მოწმობს, რომ მეგრელების ასიმილაციის პოლიტიკა გაცნობიერებულად ხორციელდება. "საქართველომ ევროსაბჭოში გაწევრიანებისას აიღო ვალდებულება, ხელი მოეწერა ევროპის რეგიონული ენების ქარტიას, რაც გაქრობის პირას მყოფი ენების შენარჩუნებას და განვითარებას ისახავდა მიზნად. მეექვსე შეხვედრას ვმართავთ და არც ერთხელ არ დაგვსწრებიან ხელისუფლების, სახალხო დამცველის, სხვადასხვა პარტიათა წარმომადგენლები. ენის თვითმყოფადობის გადასარჩენად გამოსავალი სამეგრელოსთვის პოლიტიკური სტატუსის მინიჭებაა", - განაცხადა იური ღვინჯილიამ.
შეხვედრის მონაწილეთა თქმით, დღეს საფრთხე არა მხოლოდ მეგრულს, არამედ სახელმწიფო ქართულ ენასაც ემუქრება, რომლის უცხო ენებით ჩანაცვლების პროპაგანდაც ხელისუფლების მხრიდან აქტიურად ხორციელდება. "უკვე სახლებშიც აღარ საუბრობენ მეგრულად, ბავშვებს ქართულს ასწავლიან. ეს არის დამოუკიდებლობა? დამოუკიდებლობა კი არა, დამოკიდებულებაა ვიღაცაზე. ჩვენ თავს ვიტყუებთ. საქმე ისე წავიდა, მეგრელს რცხვენია უკვე მეგრულად საუბრის. ვინ შექმნა ეს პირობები? საჭიროა ისწავლებოდეს მეგრული, ტელევიზიასა თუ რადიოში იყოს გადაცემები ამ ენაზე", - აღნიშნა შეხვედრის მონაწილემ, კონსტანტინე შეროზიამ.
შეხვედრა მეგრული ხალხური სიმღერების პოპურით დასრულდა.
იხილეთ ვიდეო
