17
ივნისიდღის ზოგადი ასტროლოგიური პროგნოზი
ნარკოტიკების მომხმარებელთა ასაკი რომ შემაშფოთებლად გაახალგაზრდავდა, არახალია. თვითმკვლელი ახალგაზრდობა "კაიფისთვის" სხვადასხვა ტიპის, უმეტესად ანტიეპილეფსიურ მედიკამენტებს მოიხმარს. აფთიაქებში ე.წ. მეორე ჯგუფის მედიკამენტების შეძენა, საუბედუროდ, თავისუფლადაა შესაძლებელი, თუმცა 2014 წლის 1-ლი იანვრიდან, ახალი საკანონმდებლო რეგულაციების თანახმად, ასეთი მედიკამენტების ურეცეპტოდ გაცემა აიკრძალება.
ამასთან, ნარკოტიკების მოყვარულები ძირითადად ბაკლოსანსა და გაბაგამას ეტანებიან.
ჩვენთან საუბარს დათანხმდა სამი ახალგაზრდა, რომლებიც დროთა განმავლობაში სწორედ ანტიეპილეფსიური საშუალებების რეგულარული მომხმარებლები გახდნენ და აბებს ნარკოტიკული თრობისთვის იღებენ. მათ შორის ერთი გოგონაა, რომელიც, როგორც გვიყვება, ჰიპერდოზირების შედეგად სიკვდილს ძლივს გადაურჩა. დღეს მას, საბედნიეროდ, მკაცრად აქვს გადაწყვეტილი, ჯანსაღ ცხოვრებას დაუბრუნდეს.
ლაშა:
- კაიფისთვის ნორმალური დოზაა 4 ბაკლოსანი და 2 აბი გაბაგამა, თუმცა ძირითადად 4-4 აბს სვამენ. მიღების მომენტში ადამიანი არის მოდუნებული, მოთენთილი და წნევა აქვს დავარდნილი. ეს სიამოვნება 5 ლარი ჯდება (რა თქმა უნდა, წამალს რეცეპტის გარეშე ვყიდულობთ). კაიფი 5 საათს გრძელდება. ბევრმა არ იცის, რომ ამ აბების მოხმარების შედეგად, კაიფი 1 საათში მოდის, ერთი საათის მანძილზე იხსნება, ამიტომ მომხმარებლები ფიქრობენ, რომ არ მიიღეს საკმარისი დოზა და მერე ამატებენ, რაც იწვევს სავალალო შედეგს. ამ აბებს სასმელს თუ დააყოლებ, კიდევ უფრო მეტი კაიფი მოაქვს, ორმაგად დუნდები და ხდები უმოქმედო.
ლიკა:
- ამ ზაფხულს აგარაკზე ვიყავი მეგობრებთან ერთად, სადაც ერთმა მათგანმა მოიტანა წამლები - ბაკლოსანი და გაბაგამა, დავლიეთ - მე 4-4, ბიჭებმა - ჩემზე მეტი. ნახევარ საათს ველოდი, როდის მოიტანდა კაიფს. რომ არ მოიტანა, ერთი იმდენი კიდევ დავამატე. როცა გაიხსნა, გავითიშე, მერე აღარ მახსოვს, რა მოხდა. ბევრი მომივიდა და ჩემს მეგობრებს სასწრაფოს გამოძახება დასჭირდათ.
თორნიკე:
- თბილისში ცხოვრობს ნარკოტიკული ფხვნილის ქართველი მწარმოებელი, რომელთან დაკავშირებაც მხოლოდ სკაიპით შეიძლება. ეს ადამიანი მსურველებს ართმევს ტელეფონის ნომერს, გირეკავს და გეუბნება ანგარიშის ნომერს, სადაც რიცხავ ფულს. მას მხოლოდ 600 ლარის ზემოთ უნდა დაურიცხო თანხა, რომ დანიშნულების ადგილი მიგითითოს, მაგალითად, ამა და ამ სკვერში, ერთ-ერთ ურნასთან მიხვალ და დაგხვდება შეკვეთილი წამალი. დაახლოებით 1 წელია, რაც ეს ბიზნესი არსებობს. ამას აკეთებს კარგად გამოცდილი ქიმიკოსი, რომელიც თავად ამზადებს ფხვნილს. იგი ბევრ ნაერთს იყენებს და ნარკოლოგიური ტესტი რომც ჩაიტარო, არაფერი გამოჩნდება, სუფთა ხარ. მას, ისევე როგორც მარიხუანას, თუთუნში აზავებენ, უფრო სწორად, მასში ასველებ სიგარტს და მოწევ. ერთი ნაფაზიც საკმარისია, 2 ნაფაზის შემდეგ უკვე მაგარ კაიფში ხარ, 5 კი უკვე "გბრიდავს". ის ძალიან ძლიერი ნარკოტიკია, ისეთი, რომ მისი გადამეტებული დოზით ხშირად იღუპებიან ან გიჟდებიან (სამი თვის წინ მეგობარი დამეღუპა). ინკოგნიტო გამსაღებლის დადგენა და გამოჭერა ვერავინ შეძლო, ისე ფრთხილად მუშაობს. ვინმემ რომც იცოდეს მისი ვინაობა, ვინ ჩაუშვებს? მხოლოდ ის ვიცი, რომ ეს ადამიანი ქიმიკოსია და ძალზე მდიდარი.
"სააფთიაქო ნარკომანები" ბაკლოსანსა და გაბაგამას ეტანებიან ბაკლოსანი (დოზის გადაჭარბებისას): კუნთების ჰიპოტონია, სასუნთქი ცენტრის დათრგუნვა, ცნობიერების დარღვევა, კომა (გონების დაბრუნების შემდეგ კუნთების ჰიპოტონია შესაძლოა, 72 საათის განმავლობაში გაგრძელდეს).
გაბაგამა(დოზის გადაჭარბებისას): "თავბრუ, კოორდინაციის დარღვევა, აგრესიული ქცევა და პათოლოგიური მოძრაობები.
ნანა ფიცხელაური
ყოველკვირეული გაზეთი "ყველა სიახლე"
(გამოდის ოთხშაბათობით)
