მზია ორველაშვილის სიყვარულის ამბავი

"ცეკვავენ ვარსკვლავებში" მონაწილე ექიმების უცვლელი მეწყვილე - მოცეკვავე მზია ორველაშვილი შეყვარებულია. მისი რჩეული ამავე პროექტის ქორეოგრაფი - საშა ოხრიმენკო გახლავთ. წყვილი უკვე ერთად ცხოვრობს და მალე ურთიერთობისთვის ოფიციალური სახის მიცემას აპირებს... მზიას პირველმა ქორწინებამ დაახლოებით, 8 თვეს გასტანა. მაშინ ქორწილი არ ჰქონია - 17 წლის იყო, როცა მომავალმა მეუღლემ მოიტაცა. ჰყავს 6 წლის ვაჟი... ამჟამად, საკუთარ გრძნობებში დარწმუნებულმა გვიამბო, თუ როგორ სთხოვა ხელი საშამ...

ბუნებრივი სილამაზის მოტრფიალე მზიამ გვითხრა, - სიბერეში თუ ძალიან დავუშნოვდები, შეიძლება, დახმარებისთვის პლასტიკურ ქირურგს მივაკითხოო. სამუშაო რეჟიმის გამო, უპირატესობას სპორტული სტილის სამოსს ანიჭებს. სამაგიეროდ, სკოლის მოსწავლეობის პერიოდში თურმე, მაკიაჟითა და მაღალქუსლიანი ფეხსაცმელებით იწონებდა თავს...

მაკიაჟი და სახის კანის მოვლა

- მიუხედავად იმისა, რომ კონკურსებში მონაწილეობისას სახეზე გრიმს მიკეთებენ, სახის კანზე განსაკუთრებულად არ ვზრუნავ. უბრალოდ, დაბანის შემდეგ მკვებავ კრემს ვისვამ. სახის კარგი კანი გენეტიკურად მაქვს. თავს არ ვიქებ, მაგრამ ერთხელ კოსმეტოლოგთან სახის გასაწმენდად მისული უკან გამომაბრუნეს - კანი პატარა ბავშვივით გაქვს, არაფერი გჭირდებაო.

- მაკიაჟს ყოველდღიურად იკეთებ?

- არა. ალბათ მაკიაჟი იმიტომ არ მიყვარს, რომ ყოველკვირა ტურნირებში ვმონაწილეობ (მინსკში ვცეკვავ) და ეს ყველაფერი მობეზრებული მაქვს. მიმაჩნია, რომ ქალი სადად უნდა გამოიყურებოდეს და ბუნებრივი სილამაზე ჰქონდეს.

- სასცენო მაკიაჟს დამოუკიდებლად იკეთებ?

- როცა საქართველოში ვცეკვავდი, თავდაპირველად, მაკიაჟის გაკეთებაში დედიკო მეხმარებოდა. ახლა კი ტურნირებზე ვარცხნილობასაც დამოუკიდებლად ვიკეთებ. თუმცა, პროექტში - "ცეკვავენ ვარსკვლავები" მაკიაჟს სხვები გვიკეთებენ.

თმის ფერი და ვარცხნილობა

- პირველად თმა 12 წლისამ შევიღებე. მაშინ გერმანიაში ვიყავი. იქ მამიდაჩემი ცხოვრობს და დასასვენებლად ხშირად მივდიოდი. მოგეხსენებათ, გერმანიაში "სტილნი" ხალხი ცხოვრობს. ჰოდა, მამიდამ მელირება გამიკეთა. იმ პერიოდში, სკოლაში თმაშეღებილი მხოლოდ მე დავდიოდი. ბავშვები სულ მეუბნებოდნენ: შენთვის თუ შეიძლება, ჩვენ რატომ გვიშლიანო?

- როგორ ფიქრობ, ამ ყველაფერს ცეკვის გამო გპატიობდნენ?

- ალბათ. მასწავლებლებს, სკოლის დირექტორს ძალიან ვუყვარდი და კლასში გამოპრანჭულს მართლაც, მხოლოდ მე მიშვებდნენ. მაღალქუსლიან ფეხსაცმელებს ვიცვამდი. თან, პირველ გაკვეთილზე სულ ვაგვიანებდი. სკოლაში ისეთი სიჩუმე იდგა, ბუზის გაფრენის ხმა ისმოდა, მე კი ქუსლების კაკუნით მივდიოდი. მასწავლებლები მეუბნებოდნენ: - "ოჰ, ორველაშვილი, ისევ "ქუსლები" გაცვია, არა (იცინის)?" ჩემი შვილიც იმ სკოლაში მივიყვანე, სადაც მე დავდიოდი.

- თმას როგორ უვლი?

- ძალიან ხვეული თმა მაქვს. იტალიიდან სპეციალური კრემები გამოვიწერე, სწორი თმა რომ მქონდეს. არ მიყვარს, როცა ჩემი თმა დახვეულია. თმის მოვლაზე ვგიჟდები. მიმაჩნია, რომ ყველა ქალმა უნდა მოუაროს. ერთხელ ჩემმა მომავალმა რძალმა მირჩია, მაიონეზის ნიღაბი გამეკეთებინა და მართლაც, ეფექტურია. თან, თმის ცვენასაც აჩერებს. ადრე ძალიან გრძელი თმა მქონდა და შეჭრა მინდოდა, მაგრამ მამა მეუბნებოდა, - თმა რომ შეიჭრა, საერთოდ არ დაგელაპარაკებიო. მერე, ბელორუსიაში ყოფნისას მაინც შევიჭერი და ჩემმა სტილისტმა მირჩია, როგორ უნდა მეზრუნა მასზე.

ვარჯიში და დიეტა

- მშობიარობამდე დიეტა არ დამიცავს, რადგან სულ ვვარჯიშობდი და სიმსუქნისკენ მიდრეკილებაც არ მქონდა. მშობიარობის მერე პრობლემები შემექმნა და კვების რეჟიმი შევცვალე. შიმშილით თავს არ ვიკლავ, უფრო მეტიც, ხაჭაპურსაც გეახლებით და ყველანაირ ცომეულსაც, მაგრამ ძირითადად, ბოსტნეულს მივირთმევ და საღამოს 6 საათის მერე არაფერს ვჭამ. საერთოდ, წონაში სწრაფად ვიმატებ და ვიკლებ. ფეხმძიმობამდე 49 კილო ვიყავი, მშობიარობის წინადღეს კი - 84. ვიმშობიარე თუ არა, 16 კილო "დავაგდე". ყველა გაკვირვებული იყო. მერე მითხრეს, - დიდი წონა შეშუპებების ბრალი უფრო იყო, ვიდრე - სიმსუქნისო. ფორმაში ჩასადგომად, დღეში ერთხელ მხოლოდ "სუპჩიკებს" (ძალიან მიყვარს!) ვჭამდი, მაგრამ მერე კუჭი ამტკივდა; პარალელურად, ვვარჯიშობდი კიდეც - 7 საათს დარბაზში ვატარებდი... მინსკში ყოფნისას ტრენაჟორებზეც დავდივარ, იოგაზეც და თვეში ერთხელ, გოგონები საუნაშიც მივდივართ. მიმაჩნია, რომ ქალი ყოველთვის ფორმაში უნდა იყოს.

სამოსი

- საღამოს კაბები მიყვარს! ადრე ყოველდღე მაღალქუსლიანი ფეხსაცმელებით დავდიოდი, მაგრამ მას მერე, რაც ბელორუსიაში წავედი, დღის რეჟიმის გამო სპორტული სტილი მოვირგე. არადა, კლასიკურ სამოსზე მაბოდებს!

- რომელიმე სამოსის შესაძენად ფული დაგნანებია?

- არა. ამას წინათ, საყიდლებზე მე და საშა ერთად ვიყავით. საშა ამბობდა: იმდენი რაღაც ვიყიდეთ, გარდერობში აღარ დაგეტევაო (იცინის).

- ტანსაცმელს ძირითადად, სად ყიდულობ?

- კარგ მაღაზიებში, მაგრამ რაღაცები ინტერნეტითაც შემიძენია.

სამკაული და აქსესუარები

- უამრავი სამკაული მაქვს. ბევრს ვყიდულობ და ყველა ლამაზია. ჩემი მეგობრები ამა თუ იმ ნივთზე ხშირად მეუბნებიან, - მაჩუქეო.

- გასაჩუქებლად თუ იმეტებ?

- მეგობრები ისე მიყვარს, რომ მათთვის ძვირად ღირებული სამკაულიც არ დამენანება.

- განსაკუთრებულად საყვარელი სამკაული თუ გაქვს?

- დავასახელებ საყურეს, რომელიც ჩემმა მომავალმა ქმარმა მაჩუქა და ბეჭედს, რომლითაც ხელი მთხოვა. ერთ-ერთ ტურში მკითხეს, - ამ საყურეებს და ბეჭედს არასდროს იხსნიო? ვერ ვიხსნი, რადგან როცა მიკეთია, ასე მგონია, ჩემი საყვარელი ადამიანი ჩემ გვერდით არის...

პირადი ცხოვრება

- საშამ ხელი მოულოდნელად მთხოვა, მე კი ბედნიერებისგან ლამის, გული ამომივარდა... ტელეფონით მეგობარს საქმეზე ველაპარაკებოდი. როცა დავემშვიდობე, მოვტრიალდი და დავინახე, საშა მუხლებზე იდგა. ცოლობა ძალიან საყვარლად მთხოვა. ხმა ვერ გავეცი - შოკში ვიყავი, ტირილი დავიწყე... როცა ჩავეხუტე, ვიგრძენი, გული როგორ უცემდა. საოცარი ემოცია დამეუფლა. ვფიქრობ, ჩემზე ბედნიერი ქალი დედამიწაზე არ დადის. ყველა ქალს ვუსურვებ ისეთი კარგი მეორე ნახევრის პოვნას, როგორიც მე ვიპოვე. საშა ხელისგულზე მატარებს.

- თქვენი სიყვარულის ამბავი რატომღაც, ჟურნალისტებს გამოგვეპარა.

- დიდი ხნის განმავლობაში, მართლა არავის არაფერს ვეუბნებოდით, მაგრამ "ცეკვავენ ვარსკვლავების" წინა სეზონზე ჩვენ შესახებ ჭორები გავრცელდა.

- წინა სეზონზე, ჭორი შენსა და ლევან ხურციას შესახებ გავრცელდა.

- პარალელურად, საშაზეც ლაპარაკობდნენ, მაგრამ რეალურად, ჩვენ მაშინ მხოლოდ კარგი მეგობრები ვიყავით, სხვა - არაფერი. ერთი პერიოდი, საშა მშობლებთან გაემგზავრა. ინტერნეტით ყოველ საღამოს ვსაუბრობდით. ერთხელ მითხრა, - აქედან კი არ უნდა გეუბნებოდე, მაგრამ ძალიან მენატრებიო. სულ მინდოდა ეთქვა, - მიყვარხარო და ამას სულ ველოდი. ერთი ნახვით შეყვარების არ მჯეროდა, ვიდრე თავად არ გამოვცადე. საშა საქართველოში რომ დაბრუნდა, ვნახე. იმავე დღეს რესტორანში დამპატიჟა და სიყვარული ამიხსნა.

- ახლა რას აპირებთ?

- საერთო სამსახური გვაქვს. მას მერე, რაც ერთად ცხოვრება გადავწყვიტეთ, ყველაფერს ერთად ვაკეთებთ. მინდა, თბილისში ვიცხოვროთ. ჩემს მშობლებს სტუდია აქვთ და მათ მივეხმარები. ამჟამად, ბავშვებს ვამეცადინებ. ვისაც ცეკვის შესწავლის სურვილი აქვს, შეუძლია, მოვიდეს (იღიმის).

- პირად ცხოვრებაში მომხდარი სიახლე შენმა 6 წლის ბიჭუნამ როგორ მიიღო?

- ძალიან კარგად. ჩემს შვილს საშა ძალიან უყვარს. პროექტის წინა სეზონზე მუშაობისას, სასეირნოდ როცა მივდიოდით, ჩემი ბიჭუნა ატრაქციონებზეც წაგვიყვანია. ის ჯერ ძალიან პატარაა, მაგრამ საშა ისეთი ადამიანია, რომ მისი საწინააღმდეგო არაფერი აქვს. თბილად ურთიერთობენ. როცა ერთად არიან, ერთმანეთს ეფერებიან, სულ ჩახუტებულები არიან...

- საშას ოჯახსაც იცნობ?

- ერთი წელია, რაც საშას ოჯახის წევრები გავიცანი. დიდი ხანია, ასეთი კარგი ოჯახი არ მინახავს. ვფიქრობ, ამ მხრივაც გამიმართლა.

- თქვენი რომანისთვის ოფიციალური სახის მიცემას როდის აპირებთ?

- ჯერ ეს პროექტი უნდა ჩავამთავროთ... ძალიან გვინდა, ქორწილი თბილისში გადავიხადოთ. ქართული ტრადიციული ქორწილი გვექნება!

საქმე

- მთელი დღეები ვვარჯიშობთ, პროექტის მომდევნო ტურისთვის ვემზადებით. ძალიან ვნერვიულობ, ყოველ ტურზე დაძაბული ვარ, რადგან დამწყები მოცეკვავეები, რომლებიც პროექტში არ მონაწილეობენ და თავიანთი ფავორიტები ჰყავთ, არასასიამოვნო კომენტარებს წერენ. ამბობენ, რომ ბატონ გუგას ბევრი "ფულები" აქვს და ტურიდან ტურში ამით გადადის. გუგა არაჩვეულებრივი ადამიანია. მას საკუთარი თავისთვის 1 "ესემესიც" არ გაუგზავნია. ბავშვს გეფიცებით, რომ ასე მეც არ მოვქცეულვარ. ალბათ ვიღაცებს ჩვენ მიერ შესრულებული ცეკვა მოსწონთ და გვიმესიჯებენ.

- თავს იმართლებ?

- ასე გამოდის. უარყოფითი კომენტარების გამო დაძაბულები ვართ. გვინდა, ჩვენი სასცენო ნომერი კარგი გამოვიდეს, მაგრამ რომ ნერვიულობ, იბნევი... ჩემს მეწყვილეს ადრე არასოდეს უცეკვია - პატარა ოთახებში ვარჯიშებს აკეთებს. მისთვის ამდენი ხალხის წინაშე გამოსვლა სტრესია. მინდა, ხალხმა გაუგოს და მხარი დაუჭიროს.

- უკვე მეორე სეზონია, რაც პროექტში პარტნიორობას მედიცინის სფეროს წარმომადგენელი გიწევს...

- საქართველოდან წლების წინ წავედი და ზოგიერთ "ვარსკვლავს" საერთოდ არ ვიცნობდი. როცა ბატონი გუგას შესახებ შევიტყვე, რომ ექიმია, ვთქვი: ძალიან კარგი. თუ თავი ამტკივდება, ოთარს მივაკითხავ, თუ კანის დაჭიმვა დამჭირდება - ბატონ გუგას-მეთქი (იცინის). ოთარი უზომოდ მიყვარს! ბატონ გუგასთან ურთიერთობა ახლა დავიწყე. ის იმდენად სერიოზული ადამიანია, რომ ხუმრობასაც ვერ ვუბედავ...

- ოთარის მსგავსად თუ ზარმაცობს ხოლმე?

- ზოგჯერ ასეც ხდება (იღიმის)...

ჰობი

- სიმღერა ძალიან მიყვარს. 16 წლამდე ნანა ჟღერიასთან ვმღეროდი. როცა მეგობრები ვიკრიბებით, ახლაც სულ მთხოვენ, - რამე გვიმღერეო. სიმღერა სიამოვნებას მანიჭებს.

- მომღერლობაზე სერიოზულად არ გიფიქრია?

- წინათ - კი, მაგრამ ახლა ამისთვის დრო არ მაქვს. რაიმე შოუში მონაწილეობას თუ შემომთავაზებენ, სადაც სიმღერა მომიწევს, სიამოვნებით დავთანხმდები.

ეთო ყორღანაშვილი

ჟურნალი ”გზა”

(გამოდის ხუთშაბათობით)