მნიშვნელოვანი ინფორმაცია
3
ივნისიდღის ზოგადი ასტროლოგიური პროგნოზი
სამშაბათი, მთვარის მერვე დღე დაიწყება 13:13-ზე, მთვარე ქალწულშია – დღეს დაწყებული და დაგეგმილი ყველაფერი გაცილებით ნელა მიმდინარეობს, ვიდრე ჩვენ გვსურს. შესაძლებელია მოვლენების მოულოდნელი შემობრუნება, კონფლიქტები და საგანგებო სიტუაციები. რეკომენდებულია კრეატიული მიდგომები ძველი პროექტების განსახორციელებლად. მოაგვარეთ მხოლოდ მცირე ფინანსური საკითხები. მოძებნეთ ახალი პარტნიორები. ინდივიდუალურად იმუშავეთ. შეზღუდეთ კოლექტიური მუშაობა. შეგიძლიათ დაიცვათ მარხვა, შესაფერისია მსუბუქი საკვები, მარცვლეული და თევზი. ალკოჰოლი და ნიკოტინი უკუნაჩვენებია.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"საფლავების და ეკლესიის ჩაძირვას აპირებენ, ქრისტიანები არიან ეგენი?!" - სვანები პროტესტის უკიდურესი ფორმით იმუქრებიან
23:21 / 08-11-2013
სოფელ ხაიშში ხუდონჰესის მშენებლობასთან დაკავშირებულ მორიგ საპროტესტო აქციაზე მიგვეჩქარებოდა და გზას უთენია დავადექით. გზადაგზა ნახევრად აშენებული და მიტოვებული ხუდონის პროექტის ძველი კონსტრუქციები გვხვდება. მალე სოფელ ლალხორალის ტერიტორიას ვუახლოვდებით. ამ სოფლის მოსახლეთა ნაწილი ჯერ კიდევ მე-20 საუკუნის 80-იან წლებში გადაასახლეს, როდესაც საბჭოთა მთავრობამ საბოლოოდ გადაწყვიტა ჰესის მშენებლობა. მათ შორის ზურაბ გელოვანის ოჯახიც იყო. ბატონი ზურაბი ნამოსახლარს გვიჩვენებს და გვიხსნის რა ტერიტორიაზე უნდა აშენდეს მთავარი კაშხალი. ჩვენ წინ უზარმაზარი მთაა აღმართული, გვეუბნებიან, რომ ჰესის მშენებლობის შემთხვევაში დაგუბებული წყლის დონე ამ მთის შუაწელს მიაღწევს და მთელ ხეობას დაფარავს.
ზურაბ გელოვანი:
- ჯერ კიდევ კომუნისტების დროს გააყალბეს გეოლოგიური კვლევის მონაცემები. საქმე ისაა, რომ ამ ადგილებში ენგურის მარჯვენა სანაპირო კია კლდოვანი, მაგრამ მარცხენა სანაპირო ნაშალი მიწაა, შეგიძლიათ თქვენ თვითონ ნახოთ, ადგილ-ადგილ როგორ არის მიწა დაძრული და ჩამოშლილი. აქაურობა წყლის მასის დაწოლას გაუძლებს?! ჯანდაბას ჩვენი თავი, გადაგვასახლებენ, მოგვცემენ ალბათ გარკვეულ კომპენსაციას, მაგრამ ჩემს ძმებ მეგრელებსა და დანარჩენ საქართველოს მივმართავ: ერთხელაც რომ აიშვას ამ წყალმა თავი, ხომ უნდა წალეკოს მთელი სამეგრელო და დასავლეთი საქართველო. კალაძეს რომ დაუჟინია, მაინც აშენდებაო, ერთხელ მაინც იყო ჩამოსული, ნახა აქაურობა?! არავინ კითხულობს ჩვენს აზრს. წინა ხელისუფლება იყო და, ჩვენს ზურგს უკან ჩვენი კუთვნილი მიწები ეკონომიკის სამინისტროს გადასცა, მერე კიდევ ამ ვითომ ინვესტორს 1 დოლარად აჩუქა. ხატზე დავიფიცეთ და უკან აღარ დავიხევთ.
ხაიშში ჩასულებს ხალხმრავლობა გვხვდება, თბილისიდან ჩასული საორგანიზაციო კომიტეტის, არასამთავრობო ორგანიზაციების, მესტიის მუნიციპალიტეტის ყველა თემის წარმომადგენლები ხაიშის წმინდა გიორგის ეკლესიის ეზოში შეკრებილან. ხაიშელთა მიერ ხატზე დადებულ ფიცს ახლა უკვე მესტიის სხვადასხვა თემის წარმომადგენლებიც უერთდებიან და თავის გადაწყვეტილებას ხელმოწერით ადასტურებენ.
ტაძრის წინამძღვარი მამა დემეტრე:
- ამ ტაძრის საძირკველი მე-12 საუკუნისაა, გვეუბნებიან, რომ თურმე უნდა ჩაძირონ. კალაძეს ისიც უთქვამს, ტაძარს გადავიტანთო, ეს წარმოუდგენელი რამაა, ვის გაუგია ტაძრის გადატანა?! ადგილობრივმა მოსახლეობამ, მთლიანად სვანეთმა ხმამაღლა თქვა, რომ ჰესი არ უნდა აშენდეს. დიდი იმედი მაქვს, რომ ამას გაითვალისწინებს ხელისუფლება. საერთოდ ასეთი რამ - მასობრივად ხატზე დაფიცება - სვანეთში დიდი ხანია არ ყოფილა, ხალხი იძულებული გახდა, ასე მოქცეულიყო.
ეკა კვიციანი:
- ჩვენ სოფელ ბეჩოდან ჩამოვედით და გვერდით ვუდგავართ ხაიშელებს, რადგან ეს მარტო მაგათი პრობლემა არ არის. ეს ჰესი მთლიანად შეცვლის ჩვენს ისედაც მძიმე ბუნებრივ პირობებს. ენგურჰესმა რაც ვერ დაგვაკლო, ეს აანაზღაურებს ალბათ..
ეკლესიის ეზოს ერთ მხარეს სვანი მამაკაცები შეკრებილან და ლოცვის ტრადიციულ რიტუალს ასრულებენ:
ირაკლი იოსელიანი:
- ვლოცულობთ, რომ ჩვენი საქმე უკეთესად წავიდეს. რომ შეგვეშველოს ღმერთი და მოვახერხოთ ჩვენი სახლ-კარისა და მიწა-წყლის შენარჩუნება. მოგვცეს უფალმა ძალა, რომ დადებული ფიცი შევასრულოთ. ამ ჩვენს ტაძარს ხომ ხედავთ? ჩავიკეტებით ამ ტაძარში და მასთან ერთად დაგვძირონ ან ჩაგვხოცონ და ჩაგვატანონ ამ მშენებლობას. აქაურობას ცოცხალი თავით არ დავთმობთ.
აქცია ხაიშის ცენტრში გრძელდება, სიტყვით გამოდიან როგორც ადგილობრივი მცხოვრებლები, ასევე ხაიშელთა მხარდასაჭერად ჩასული სტუმრები.
ნინო ჩხობაძე, "მწვანეთა მოძრაობის" თანათავმჯდომარე:
- გეოლოგიური მდგომარეობიდან გამომდინარე, იმ ეკოლოგიური პრობლემებიდან, რასაც ჩვენ ვხედავთ, მიმაჩნია, რომ საფრთხე ძალიან მაღალია. გიგანტური კაშხლის მშენებლობა აუცილებლად გამოიწვევს ეკოსისტემების რღვევას, ტყეების გაქრობას, მეწყრებისა და ღვარცოფების საფრთხის ზრდას. სოციალური ფონი ისედაც მძიმეა, ის ზიანი, რაც ქვეყანას ამით მიადგება, ნამდვილად გადაფარავს იმ ეკონომიკურ მოგებას, რასაც ხელისუფლება ელის.
ღამდება, უკვე გვარიანად ცივა, აქცია ნელ-ნელა იშლება, მოწყენილი ხაიშელები ტოვებენ სოფლის ცენტრს. ღრმად მოხუცი ქალბატონი მიახლოვდება და აცრემლებული მეუბნება:
- საფლავებისა და ეკლესიის ჩაძირვას აპირებენ, ქრისტიანები არიან ეგენი?! ყველა ახლობელი მანდ მყავს დასაფლავებული, ახლა სადღა უნდა წავიდე, ჩვენმა კაცებმა ხატზე დაიფიცეს, აღარ გადათქვამენ, ნეტავ, მანამდე მოვკვდებოდე, ვიდრე კიდევ რაღაც უბედურება დატრიალდება...
დღეს არსებული პროექტით, ჰესის სიმძლავრე 702 მეგავატი იქნება. კაშხლის მშენებლობით დაიტბორება 528 ჰექტარი ტერიტორია. 14 დასახლებიდან გახდება საჭირო მოსახლეობის გასახლება. აქედან ოთხი სოფელი - ხაიში, გაღმა ხაიში, დაკარი და ტობარი სრულად დაიტბორება, დანარჩენი დასახლებებიდან მხოლოდ რამდენიმე ოჯახს გაასახლებენ. სულ, სავარაუდოდ, 2000-ზე მეტ ადამიანს მოუწევს საცხოვრებელი ადგილის დატოვება.
ნათია დოლიძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
აფეთქება, ამჯერად წყალქვეშ - თავდასხმა ყირიმის ხიდზე
კვირის კითხვადი სტატიები
მნიშვნელოვანი ინფორმაცია
მკითხველის რჩევით
