"სორბონის უნივერსიტეტის დიპლომი დაიდოს!" - გოგა ხაჩიძე ირაკლი ღარიბაშვილს

საპარლამენტო უმცირესობის წვერი გოგა ხაჩიძე თეა წულუკიანის შემდეგ განათლების დამადასტურებელი დოკუმენტის წარმოდგენას პრემიერ-მინისტრობის კანდიდატ ირაკლი ღარიბაშვილისგან მოითხოვს. ამის შესახებ ხაჩიძე საკუთარ "ფეისბუქ-გვერდზე" წერს.

"ვინმემ არ იფიქროს, ასეთი ახირება მაქვს... თუ იფიქრებს და არც ეგაა დიდი პრობლემა.

აბა მიპასუხეთ, ისე - ინფორმაციის დონეზე, რა ვიცით ჩვენ ღარიბაშვილის განათლების შესახებ?...

ვიცით და ამის შესახებ ხშირად გაგვიმეორეს, რომ ღარიბაშვილმა დაამთავრა თბილისის სახელმწიფო უნივერსიტეტი და სორბონის უნივერსიტეტი.

ამას ამბობენ ტელევიზიები, საინფორმაციო საშუალებები, პოლიტიკოსები...

კიდევ ერთხელ, მარტივად რომ ვთქვათ: ჩვენ ვიცით, რომ ღარიბაშვილს {სორბონა} აქვს დამთავრებული.

ხომ ეს ვიცით?...

-დიახ!

ხომ ნამდვილად ასე ვიცით?...

- დიახ, ნამდვილად ასე ვიცით!

ვინაიდან პირადად მე, საფრანგეთში მიღებულ განათლებაზე და იქ აღებულ დიპლომებზე (ქ-ნი წულუკიანის შემთხვევიდან გამომდინარე) "კარგი გამოცდილება" მაქვს, ნება მიბოძეთ ამ შემთხვევაშიც ვიკითხო:

ნამდვილად დაამთავრა ირაკლი ღარიბაშვილმა სორბონის უნივერსიტეტი?!...

ი ქ ნ ე ბ უბრალოდ ენის კურსი გაიარა?...

ი ქ ნ ე ბ სწავლობდა და არ, ან ვერ დაამთავრა?...

რაღაც უცნაური ეჭვი მაქვს, რომ ამ ორი "იქნებ"-იდან შეიძლება რომელიმე სიმართლე აღმოჩნდეს... (?!)

და რა?!... ამის შემდეგ ჩვენ ვიტყვით, რომ ეს სიახლე არაა?!...

რომ ეს ამბავი, ასე ვიცოდით და არა კონკრეტულად ისე, რომ ირაკლი ღარიბაშვილმა სორბონის უნივერსიტეტი დაამთავრა?!...

- არა, ასე ვერ ვიტყვით, მაშინ უბრალოდ თავს მოვიტყუებთ.

ყოველივე აქედან გამომდინარე, ბუნებრივად მიჩნდება მოთხოვნა, თხოვნა (რომელიც გნებავთ)

სორბონის უნივერსიტეტის დიპლომი დაიდოს!...

დაიდება - ყველაფერი გასაგები იქნება.

არ დაიდება და არც მაგის გაგება გაგვიჭირდება, რა მოხდა მერე... ", - წერს ხაჩიძე.

შინაგან საქმეთა მინისტრ ირაკლი ღარიბაშვილის განათლების შესახებ საქართველოს მთავრობის ოფიციალურ ვებ-გვერდზე აღნიშნულია, რომ 2002-2004 წლებში სწავლობდა სორბონის უნივერსიტეტში, პოლიტიკური მეცნიერებების ფაკულტეტზე (სპეციალობა-საერთაშორისო ურთიერთობები) პარიზი, საფრანგეთი; "ფეისბუქში" მინისტრის ოფიციალურ გვერდზე კი თსუ-სთან ერთად მითითებულია Université Paris 1 - Panthéon Sorbonne.