სოსო ჯაჭვლიანი 200 შეფიცულ სვანსა და ხუდონჰესის მშენებლობაზე

შეურაცხმყოფელია, როცა ვიღაც-ვიღაცეები სასაცილოდ იგდებენ, რომ თურმე სვანეთში 200-მა ადამიანმა ხატზე დაიფიცა, - ამის შესახებ საპარლამენტო უმრავლესობის წევრმა სოსო ჯაჭვლიანმა განაცხადა, რომელიც მიიჩნევს, რომ "ხუდონჰესის" ამჟამინდელი პროექტი ყველაზე ცუდი ვარიანტია.

დეპუტატის აზრით, პირველ რიგში აზრთა შეჯერება და ადგილობრივი მაცხოვრებლების მოსაზრებების გათვალისწინება უნდა მოხდეს.

"ჩვენ ძალიან კარგად ვიცით რა ხდება სოფელ ხაიშში. ზოგიერთები ლაპარაკობენ და ჩემთვის აბსოლუტურად შეურაცხმყოფელია როცა ვიღაც-ვიღაცეები სასაცილოდ იგდებენ, რომ თურმე 200-მა ადამიანმა ხატზე დაიფიცა. ჩემი კუთხის შვილები იცით რას იცავენ? ისინი თავიანთ ადგილის დედას, თავიანთ საფლავებს, ისტორიას და მიწა-წყალს იცავენ. მე ჩემს ჯიშს ძალიან კარგად ვიცნობ. სვანებმა ხატზე იმაზე კი არ დაიფიცეს, რომ სახელმწიფოს წინააღმდეგ მიდიან, არამც და არამც, მათ დაიფიცეს იმაზე, რომ ეს უნდა გახდეს საზოგადოებისთვის ფართო მსჯელობის საგანი. მათ აინტერესებთ რა იქნება დადებითი და უარყოფითი ამ ჰესის აშენების შემდეგ. იქ მცხოვრებმა თითოეულმა ადამიანმა ეს უნდა გაიგოს და ჩვენ უნდა დავარწმუნოთ იმაში, თუ რამდენად სტარტეგიული მნიშვნელობა აქვს ჰესის მშენებლობას", - აცხადებს სოსო ჯაჭვლიანი.

რაც შეეხება ადგილობრივი სვანების მიერ დადებული ფიცის შინაარს, რომ ისინი ჰესის მშენებლობას არ დაუშვებენ და იმას, თუ რამდენად შესაძლებელია, მათ ფიცი გატეხონ, სოსო ჯაჭვლიანი არ გამორიცხავს, რომ დაფიცულებიდან აზრი ვინმემ შეიცვალოს.

"მე შეიძლება რაღაცის გაკეთება არ მინდა, მაგრამ შენ უნდა გადმოდგა ნაბიჯი და დამარწმუნო, რომ ეს ოჯახს და ქვეყანას სჭირდება. თუ რამე ისეთი კატასტროფაა, მე ვიქნები იქ, სადაც ჩემი კუთხის შვილები არიან. რამდენჯერ ყოფილა, რომ დაიფიცებენ, ან რაღაც უბედურება მოხდება, სისხლის აღებას ვგულოსხმობ და რამდენჯერ შეურიგებიათ. ყველაფერი შეიძლება მოხდეს. დაფიცებული ადამიანებისგან შეიძლება აზრი ვინმეს შეეცვალოს. შეიძლება შავზე დაიფიცო, რომ თეთრია? ხომ არ შეიძლება?", - აცხადებს დეპუტატი.

მისივე თქმით, რამდენ ენერგეტიკოსსაც ის საქართველოში ესაუბრა, აღმოჩნდა, რომ ჰესის ყველაზე ცუდი ვარიანტია არჩეული. სოსო ჯაჭვლკიანი მიიჩნევს, რომ ეს ფართო საზოგადოებისთვის ცნობილი უნდა იყოს.

"ხომ შეიძლება ისეთი ავირჩიოთ, რომელიც ნაკლებად დააზიანებს და მისაღები იქნება იქ მცხოვრები ადამიანებისთვის. მე ყოველთვის ვიქნები იქ, სადაც ხალხი იქნება, მაგრამ არამც და არამც სახელმწიფოს წინააღმდეგ არ უნდა წავიდეთ, თუ დაგვარწმუნებენ რომ მართლაც აუცილებელია, უნდა აშენდეს. ქვეყნისთვის თუ შენ თავს სწირავ, რაღაც გვერდზე უნდა გადადო", - მიაჩნია დეპუტატს.

სოფელ ხაიშში კი ხუდონჰესის მშენებლობის წინააღმდეგ ადგილობრივები ფიცის დადებას განაგრძობენ. რამდენიმე დღის წინ ისინი ხაიშის წმინდა გიორგის სახელობის ეკლესიის ეზოში შეიკრიბნენ და ფიცი დადეს. მათი რიცხვი 200-ზე მეტს შეადგენს.

როგორც ადგილობრივი სკოლის პედაგოგმა აკაკი ზუმბაძემ განაცხადა, ფიცს დებენ არა მარტო ხაიშის, არამედ მთელი სვანეთის მცხოვრებლები.

ფიცის ტექსტი შემდეგია: "ვფიცავ, არ დავიშურებ ძალ-ღონეს და ჭკუა-გონებას, რომ ხაიშის წმინდა გიორგის სახელობის ტაძარი, სოფელი და სასაფლაოები წყალქვეშ არ მოექცეს. ფიცის სინამდვილეს ვადასტურებ ხელმოწერით".

ადგილობრივები აცხადებენ, რომ ისინი არც ერთ შემთხვევაში არ დათანხმდებიან ხუდონჰესის აშენებას. მათივე ინფორმაციით, იყო შეთავაზებებიsalesland.ge - ფასდაკლებების სამყარო! კომპენსაციებზე, თუმცა კონკრეტული შეთავაზება არ ყოფილა. თუმცა, მოსახლეობის თქმით, რა თანხაც არ უნდა შესთავაზონ, ხუდონჰესის მშენებლობას არც ერთ შემთხვევაში არ დათანხმდებიან.

მინდია აფციაური, ამბები.ge

იხილეთ ვიდეო