საქართველოს პრემიერ-მინისტრმა ბიძინა ივანიშვილმა ოჯახის წევრებთან ერთად საკუთარი არჩევანი უკვე გააკეთა. პრემიერმა ხმა კოჯრის ქუჩაზე მდებარე # 4 საარჩევნო უბანზე მისცა. ივანიშვილი უბანზე მეუღლესა და ორ შვილთან ერთად მივიდა.
"რა თქმა უნდა, საქართველოს მომავლის სასარგებლოდ გავაკეთეთ არჩევანი და ხმა მივეცით მთელმა ოჯახმა. მინდა ქართულ საზოგადოებას მივულოცო დღევანდელი დღე - მაქვს ინფორმაცია, რომ რიგებია საარჩევნო ყუთებთან, არის მობილიზაცია. ამას ველოდი და დარწმუნებული ვიყავი, რომ შეგვიძლია დაბალანსებულ სიტუაციაში სწორი არჩევანის გაკეთება", - განაცხადა ბიძინა ივანიშვილმა ხმის მიცემის შემდეგ.
მისივე შეფასებით, ქართველი ხალხი დღეს ადასტურებს, რომ იდეურად ევროპული ერია.
"წარმოდგენას ქმნიდნენ, რომ ჩვენ განსხვავებული ხედვები გვაქვს, დღეს ვამტკიცებთ, რომ ვართ იდეურად ევროპელები და ხარისხობრივად განსხვავებულ სიტუაციაშიც მაქსიმალურ პასუხისმგებლობას ვაჩვენებთ. დღევანდელი დილა ამას ამტკიცებს და დარწუნებული ვარ, რომ არავინ დარჩება სახლში, რომ არ მისცეს ხმა საქართველოს მომავალს და მინიმალური პასუხისმგებლობა არ აჩვენოს", - აღნიშნა ივანიშვილმა.