31
მაისიდღის ზოგადი ასტროლოგიური პროგნოზი
დავით ბაქრაძე ჯო ბაიდენთან, ანდერს ფოგ რასმუსენთან, მაღალი რანგის უცხოელ პოლიტიკოსებთან, მაგრამ არა მიხეილ სააკაშვილის გვერდით...
"ნაციონალური მოძრაობის" პრეზიდენტობის კანდიდატის წინასაარჩევნო კლიპში საქართველოს პრეზიდენტი არ ფიგურირებს. მიხეილ სააკაშვილმა თანაგუნდელ ბაქრაძეს საჯარო მხარდაჭერა სპორტის სასახლეში გამართულ "ნაციონალური მოძრაობის" ყრილობაზე გამოუცხადა. თუმცა ეს გამონაკლისი იყო. პრეზიდენტი არ ჩნდება დავით ბაქრაძის წინასაარჩევნო შეხვედრებზე და არ ფიგურირებს მის სააგიტაციო მასალაში.
რითი ხსნიან პიარის სპეციალისტები "ნაციონალური მოძრაობის" თავმჯდომარის, მიხეილ სააკაშვილისა და პარტიის საპრეზიდენტო კანდიდატის ერთმანეთისგან დისტანცირებას. პიარისა და მარკეტინგული კომუნიკაციების კომპანია "ჯეპრა"-ს უფროსი კონსულტანტი სოსო გალუმაშვილი ცვლილებას პოზიტიური და ნეგატიური იმიჯების თანაფარდობით ხსნის.
სოსო გალუმაშვილი:
"ალბათ, "ნაციონალურ მოძრაობას" კვლევებმა აჩვენა, რომ დღეს სააკაშვილის ნეგატიური იმიჯი ჭარბობს მის პოზიტიურ იმიჯს, რასაც დავით ბაქრაძის საპრეზიდენტო კამპანიისთვის, შესაძლოა გარკვეული პრობლემები შეექმნა. აქედან გამომდინარე, გაკეთდა დასკვნა, რომ სააკაშვილი არ ყოფილიყო ამ კამპანიის ერთ-ერთი სახე. ალბათ, კვლევებში გამოჩნდა, რომ მისი იმიჯი არ წაადგებოდა დავით ბაქრაძის კამპანიას. ბაქრაძის კამპანიაში არც ვიზუალურად, არც ვერბალურად მიხეილ სააკაშვილის იმიჯი არ იქნა გამოყენებული. მეტსაც გეტყვით, დავით ბაქრაძის კლიპებში და სხვა საარჩევნო სააგიტაციო მასალებში არც ერთი მისი თანაგუნდელი არ მონაწილეობს მსხვილი "პლანით". ეს ნიშნავს, რომ ალბათ მათივე ჩატარებული კვლევების თანახმად, ამას პოზიტიური იმიჯი უფრო ნაკლები აქვს ვიდრე ნეგატიური.
ბაქრაძეს კლიპში ძირითადად უცნობი სახეები, უცნობი ადამიანები ჰყავს გამოყენებული. პირიქით არის გიორგი მარგველაშვილის შემთხვევაში, სადაც ის აქტიურად იყენებს როგორც ბიძინა ივანიშვილს, ასევე სხვა თანაგუნდელებსაც".
დავით ბაქრაძის კამპანიაში "ნაციონალური მოძრაობის" სახეების ნაკლებობაზე საუბრობს საზოგადოებრივი კომუნიკაციების მართვის სპეციალისტი არჩილ გამზარდია. მისი განმარტებით, მიხეილ სააკაშვილის წინა პლანზე ყოფნა და მისთვის ძირითადი რეკომენდატორის ფუნქციის მინიჭება " ნაციონალურ მოძრაობას" იმ შანსებსაც დაუკარგავდა, რომელიც, შესაძლოა მოძრაობას გააჩნდეს.
არჩილ გამზარდია:
"ჩვენ თუ დავაკვირდებით ბაქარაძის კამპანიას, პირადად ბაქრაძე ბევრად მეტად ჩანს, ვიდრე თუნდაც, "ნაციონალური მოძრაობის" სხვადასხვა სახე. ის რომ პრეზიდენტი ამ კამპანიაში აქტიურად არ არის ჩართული, ზოგადად, მომგებიანიცაა. დღევანდელი გადასახედიდან, პრეზიდენტთან აქტიური კავშირი პირდაპირ წამგებიანად ჩანს. თუმცა, თუკი ყრილობის ფაქტს, როგორც კონტექსტს, ისე ავიღებთ, "ნაციონალური მოძრაობა" ამით აჩვენებს, რომ ეს არის მდგრადი პარტია, სადაც თითოეულ ადამიანს თავისი ადგილი უჭირავს, დაწყებული მერაბიშვილით გაგრძელებული პრეზიდენტით. მაგრამ აქტიურ პროცესებში ის მონაწილეობას არ ღებულობს. ეს სრულიად გასაგებია, რადგან პარტია ცდილობს სიცოცხლისუნარიანობა მიიღოს. აქედან გამომდინარე, პრეზიდენტის ჩართვა და აქტიური სახით ჩვენება ამის ყველანაირ თეორიულ შანსსაც კი მოსპობს. თუკი ბაქრაძე პრეზიდენტთან ერთად დადგებოდა, რა თქმა უნდა, ბევრად უფრო წამგებიანი აღმოჩნდებოდა. პარტიის სიცოცხლისურნარიანობისთვის, ისეთ წევრებზე აქცენტებს არ აკეთებენ, რომლებიც პარტიისთვის განსაკუთრებით წამგებიანია".
თუმცა არის კიდევ ერთი ვერსია, რომელზეც არჩილ გამზარდია საუბრობს. საზოგადოებრივი კომუნიკაციების მართვის სპეციალისტი პრემიერის განცხადებებს იხსენებს, სადაც ივანიშვილი "ნაციონალური მოძრაობის" სიცოცხლისუნარიანობით დაინტერესებას გამოხატავს. გამზარდია ვარაუდობს, რომ პარტია - "ნაციონალური მოძრაობა - მინუს სააკაშვილი" შესაძლოა, პრემიერს აწყობდეს. ექსპერტი შესაძლო გარიგებაზე და გარკვეულ ინტერესთა დამთხვევაზე საუბრობს, რომლის თანახმად, თუკი სააკაშვილი აქტიური პროცესიდან ჩამოცილებული იქნება, შესაძლოა პრემიერი ივანიშვილი "ნაციონალური მოძრაობის" არსებობის წინააღმდეგი სულაც არ იყოს.
ანა მარშანია, ამბები.ge
