გამოკითხულთა ნაწილმა საპრეზიდენტო კანდიდატთან დაკავშირებით საკუთარი არჩევანი შესაძლოა, შეცვალოს

საკვლევ-საკონსულტაციო ცენტრის, "ფსიქოპროექტის" მიერ ჩატარებული კვლევის თანახმად, გამოკითხულთა გარკვეულმა რაოდენობამ საპრეზიდენტო კანდიდატთან დაკავშირებით საკუთარი არჩევანი შესაძლოა, შეცვალოს.

კითხვაზე - "არჩევნებამდე რამდენიმე კვირა დარჩა, რამდენად შესაძლებელია, რომ თქვენი არჩევანი შეიცვალოს?", 6% პასუხობს, რომ ეს სრულიად შესაძლებელია, 9% ფიქრობს, რომ შესაძლებელია, ასევე 9%-ს კი საკუთარი არჩევანის შეცვლა მეტ-ნაკლებად შესაძლებლად მიაჩნია.

ამასთან, გამოკითხულთა 26% ფიქრობს, რომ შეუძლებელია, არჩევნებამდე დარჩენილ პერიოდში საკუთარი არჩევანი შეცვალოს, 42% კი ფიქრობს, რომ ეს სრულიად შეუძლებელია. პასუხი არ ჰქონდა 6%-ს, კითხვაზე პასუხის გაცემაზე 2%-მა უარი თქვა.

საკვლევ-საკონსულტაციო ცენტრის, "ფსიქოპროექტის" მიერ ჩატარებულ კვლევებში გიორგი მარგველაშვილს 57.6% უჭერს მხარს დავით ბაქრაძეს - 11.8%, ნინო ბურჯანაძეს კი - 7.1%.

კვლევა კოალიცია "ქართული ოცნების" საარჩევნო შტაბის დაკვეთით ჩატარდა. საზოგადოებრივი აზრის გამოკითხვა 13-18 ოქტომბერს განხორციელდა. კვლევა 1607 რესპონდენტზე საქართველოს მასშტაბით შემთხვევითი შერჩევის სტანდარტული მეთოდით ჩატარდა. სტატისტიკური ცდომილების ზღვარი 3.5 %-ს შეადგენს.

"ინტერპრესნიუსი"