ქურდულ სამყაროსთან დაკავშირებული მუხლის გაუქმების მოთხოვნით ორი პატიმარი შიმშილობს

პატიმრები ქურდულ სამყაროსთან დაკავშირებული 223-ე მუხლის გაუქმების მოთხოვნით შიმშილობენ. "ინტერპრესნიუსს" დღეს სასჯელაღსრულების მე-6 დაწესებულებიდან , ე.წ. კრიტიდან მოშიმშილე პატიმარი დათო ორჟონია დაუკავშირდა, რომლის განცხადებით, მასთან ერთად კიდევ ერთი პატიმარი ნუკრი ბელქანიაც შიმშილობს.

მისი თქმით, მათი პირველი მოთხოვნა სწორედ ქურდულ სამყაროსთან დაკავშირებული 223-ე მუხლის გაუქმებაა.

"მშობელს შეიძლება ჰყავდეს შვილი მოსკოვში და რომ დაელაპარაკოს, ამის გამო შეუძლიათ დაიჭირონ. უაზრო მუხლია, ამიტომ მის გაუქმებას ვითხოვთ. ამ მუხლის გაუქმებას ჩვენ კი არა ნახევარი საქართველო ითხოვს", - აცხადებს პატიმარი.

გარდა ამისა, მოშიმშილე პატიმრები ასევე ითხოვენ ე.წ. არაღიარებული საქმეების გადახედვასა და შეკრებითობის პრინციპის სწორად გამოყენებას, რადგან მათივე თქმით, ზოგს ნაკლებს აკლებენ, ზოგს - მეტს.

რაც შეეხება ე.წ. არაღიარებულ საქმეებს, როგორც ორჟონია აცხადებს, ხალხს დანაშაული არ უღიარებით და ტყუილად, შეკერილი საქმეების გამო სხედან ციხეებში.

მისი ინფორმაციით, ისინი უკვე მეშვიდე დღეა შიმშილობენ. "არც მე და არც ნუკრი, არც ერთი არ შევწყვეტთ შიმშილობას, თუ კონკრეტულ პასუხს არ მივიღებთ ჩვენს მოთხოვნებზე", - აღნიშნა პატიმარმა.

"ინტერპრესნიუსი"