20
ივლისიდღის ზოგადი ასტროლოგიური პროგნოზი
დასავლეთ საქართველოში ჭარბი ნალექისა და ძლიერი ქარის გამო რამდენიმე საგზაო მონაკვეთზე ავტოტრანსპორტის მოძრაობა მცირე დროით შეფერხდა.
როგორც "ინტერპრესნიუსს" საავტომობილო გზების დეპარტამენტიდან აცნობეს, სენაკი-ფოთი-სარფის ს/გზის კმ118-კმ119 მონაკვეთზე - სარფის ტერიტორიაზე, ძლიერი შტორმის შედეგად, დაზიანდა ნაპირსამაგრი ნაგებობისა და მიწის ვაკისის რამდენიმე უბანი.
ზღვის ტალღებმა წაიღო გზის შემოფარგვლის ბეტონის პარაპეტები, გამორეცხა მიწის ვაკისი და გზის დამცავი ქვაყრილი, ასევე გზის სავალ ნაწილზე გამოიტანა ინერტული მასალა.
დეპარტამენტის შესაბამისი სამსახურების მიერ ადგილზე მობილიზებული იყო შესაბამისი საგზაო ტექნიკა და გზის გაწმენდითი სამუშაოები მოძრაობის აკრძალვის გარეშე განხორციელდა.
დეპარტამენტის ინფორმაციით, საავტომობილო მოძრაობის პარალელურად, მიმდინარეობს სტიქიური მოვლენის შედეგების სალიკვიდაციო ღონისძიებების კვლევისა და პროექტირების პროცესი, რის შემდეგაც შესაბამისი აღდგენითი სამუშაოები ჩატარდება.
როგორც დეპარტამენტში განმარტავენ, კოკისპირული წვიმის შედეგად ბათუმი-ახალციხის ს/გზის 43-ე კმ-ზე, სოფელ ზვარეს მიმდებარე ტერიტორიაზე, ჩამოიშალა მიწა-კლდის მასა, რის გამოც მცირე დროის მანძილზე ავტოტრანსპორტის გადაადგილება შეფერხდა, თუმცა სამუშაოების შედეგად გზის აღნიშნული მონაკვეთი ნახევარ საათში გაიხსნა.
უამინდობის გამო შეფერხებები იყო გოდერძის უღელტეხილზეც, სადაც ძლიერი თოვისა და ქარბუქის გამო, მგზავრთა უსაფრთხოების დაცვის მიზნით, 20 ოქტომბერს ავტოტრანსპორტის მოძრაობა აიკრძალა.
საავტომობილო გზების დეპარტამენტის შესაბამისი სამსახურები გაწმენდით სამუშაოებს მთელი დღის განმავლობაში ატარებდნენ. საგზაო სამსახურებმა სახიფათო მონაკვეთიდან ავტოტრანსპორტი და მგზავრები უსაფრთხო ადგილზე გადაიყვანეს.
გაწმენდითი სამუშაოებისა და ამინდის გაუმჯობესების ფონზე, დღეს გოდერძის უღელტეხილზე გზა გახსნილია.
უხვი ნალექის შედეგად, მცირე ხნით შეფერხებული იყო ავტოტრანსპორტის მოძრაობა ზუგდიდი-ჯვარი-მესტია-ლასდილის ს/გზის 73 კმ-ზე. აღნიშნულ მონაკვეთზე კოკისპირული წვიმის შემდეგ, გზის სავალ ნაწილზე დიდი მოცულობის კლდოვანი მასა ჩამოიშალა და ავტოტრანსპორტის მოძრაობა რამდენიმე საათით შეაფერხა. გზის სავალი ნაწილი საგზაო სამსახურის მიერ მობილიზებულმა მძიმე ტექნიკამ გაწმინდა. ამჟამად აღნიშნულ მონაკვეთზე ავტოტრანსპორტის მოძრაობა თავისუფალია.
