გიორგი მარგველაშვილი - მთლად ამნეზიაც ნუ დაემართებათ და გაიხსენონ, რას აკეთებდნენ ერთი წლის წინ

კოალიცია "ქართული ოცნების" საპრეზიდენტო კანდიდატი, გიორგი მარგველაშვილი "ერთიან ნაციონალურ მოძრაობას" მოუწოდებს, ამნეზია ნუ დაემართებათ და გაიხსენონ, რას აკეთებდნენ ერთი წლის წინ, - ასე გამოეხმაურა მარგველაშვილი მარნეულში დავით ბაქრაძის პლაკატების ჩამოხევას.

როგორც მარგველაშვილმა დღეს ჟურნალისტებთან საუბრისას განაცხადა, თუ მსგავსი ფაქტი მოხდა, მიუღებელი და სამარცხვინოა.

"თუ ასეთ ფაქტს ჰქონდა ადგილი ,ეს არის მიუღებელი და სამარცხვინო. ეს ეწინააღმდეგება "ქართული ოცნების" მიზანს, რომ ეს არჩევნები იყოს შეფასებული ევროპული სტანდარტით. ასე უპრეცედენტოდ მშვიდად მიმდინარეობს ეს არჩევნები. ბევრს ალბათ ამნეზია აქვს. ჩვენ გვახსოვს დაპატიმრებები, დაყაჩაღებები, დემაგოგიური პროპაგანდა. როცა ეს ხალხი დღეს გველაპარაკება, რომ საერთაშორისო თანამეგობრობა უნდა ჩაერიოს იმაში, რომ სადღაც პლაკატი ჩამოუხევიათ, მე საერთაშორისო თანამეგრობის გარეშეც განვაცხადებ, რომ ვგმობ ყველა ასეთ ფაქტს, ეს არის ჩვენთვის მიუღებელი, მაგრამ მთლად ამნეზიაც ნუ დაემართებათ და გაიხსენონ, რას აკეთებდნენ ერთი წლის წინ", - აღნიშნა გიორგი მარგველაშვილმა.

"ინტერპრესნიუსი"