24
მაისიდღის ზოგადი ასტროლოგიური პროგნოზი
ტრავმის მიღება, რასაკვირველია, არ არის სასიამოვნო, მაგრამ ზოგჯერ ამ მოვლენას ისეთი კურიოზები და უცნაური შემთხვევები ახლავს თან, შეუძლებელია, მათი მოსმენისას არ გაგეღიმოს. თვით დაშავებულებიც კი ასეთ შემთხვევებს მოგვიანებით იუმორით იხსენებენ, ამიტომ ალბათ არც ერთი მათგანი არ გვიწყენს, როცა "ყველა სიახლის" მიერ შეკრებილ რამდენიმე ასეთ ამბავში საკუთარ თავს ამოიცნობს. სახალისო ამბები კი ძირითადად მთავარი გმირების მეგობრებმა და ახლობლებმა "გაამხილეს".
მანჩო: "ჩემი მეგობარი ახალ სახლში გადავიდა, საძინებლის კარი თურმე გორგოლაჭებიდან ამოვარდნილი ყოფილა. შესვლის დროს კარი გადმოვარდა და ზედ დაეცა. მას შემდეგ კარების მიმართ პანიკური შიში გაუჩნდა და თუ ვინმე ახლავს თან, კარის გაღებას მას სთხოვს.
იაკო: "ჩემს დას ცხვირი ლიფტში მოჰყვა. საავადმყოფოში რომ მივიყვანეთ, ექიმი არ იჯერებდა ლიფტის ამბავს. გაოცებული იყო, ასეთი პატარა ცხვირი აქვს და როგორ მოახერხა მისი ლიფტში მოყოლებაო"...
თორნიკე: "ჩვენს სოფელს მტაცებელი ცხოველები არ ეტანებიან, მაგრამ დიდი თოვლი იდო და ახლომდებარე ტყიდან სოფლის ჭალებში ორი მგელი ჩამოვიდა. ჭალა ჩემი სახლის ქვემოთაა და საღამოს პირზე მგლებმა რომ დაიყმუვლეს, ჩვენი ორი ძაღლიდან ვერც ერთს ვეღარ მოვკარით თვალი. მოგვიანებით საწოლის ქვეშ ვიპოვეთ შეყუჟულები. მე და ჩემი ძმა მონადირეები ვართ, ხშირად ვნადირობთ, ამიტომ მამაჩემმა მაგრად დაგვცინა, რა მონადირეები ხართ, მგლები ლამისაა სახლში შემოგვიცვივდნენ, თქვენ კი შინ იმალებითო. მისმა სიტყვებმა ჩვენს "მონადირულ თავმოყვარეობაზე" იმოქმედა და გადავწყვიტეთ, მგლებს ჩავსაფრებოდით. დილის ხუთ საათზე თოფებით შეიარაღებულები საშინელ სიბნელესა და ყინვაში გავედით. ჩასაფრებისთვის ორი ადგილი ამოვირჩიეთ და გავნაწილდით. მარტო რომ დავრჩი, სიბნელემ, ცოტა არ იყოს, დამაფრთხო და ხეზე ავძვერი. რამდენიმე წუთის შემდეგ, არ ვიცი როგორ, მაგრამ თოფის ლულაზე ენა მომიხვდა და ზედ მიმეყინა. ვეღარ ვაშორებდი, ვერც ჩემს ძმას ვეძახდი საშველად. ყინვა კი უმატებდა და უმატებდა. რამდენიმესაათიანი ამაო ლოდინის შემდეგ ჩემმა ძმამ ჩასაფრების ადგილი მიატოვა და მომაკითხა. როცა დაინახა, რა დღეში ვიყავი, იმის მაგივრად, რომ მომშველებოდა, ისტერიკული სიცილი აუვარდა. მერე თოფის ლულა სანთებელით შევათბეთ და ძლივს მოვაცილე ენა. ყინვისგან ისეთი დაშუშხული მქონდა, რამდენიმე კვირა ნორმალურად ვერ ვჭამდი".
ნოდარი: "ჩემი თანამშრომელი სანადიროდ წავიდა. ნაწვიმარი იყო და ნამიან ბალახზე ფეხი აუსრიალდა. მის ბედად, იქვე ზღარბი ყოფილა და ზედ დაეცა. საწყალი ზღარბი, რა თქმა უნდა, ამხელა მასის დაცემისგან იქვე მოკვდა, მაგრამ არც ჩემი მეგობარი აღმოჩნდა უკეთეს მდგომარეობაში. საკმაოდ დიდხანს იშუშებდა ზღარბის ეკლებისგან მიყენებულ ჭრილობებს".
ექიმი ლევან ბერიძე: "პენსიაზე გასვლამდე ბევრი კურიოზული შემთხვევა მქონია. მთლად კურიოზულს ვერც დავარქმევ, რადგან საქმე ადამიანის ჯანმრთელობასა და სიცოცხლეს ეხებოდა, თუმცა ზოგიერთი პაციენტი ისეთი უცნაური ტრავმით მოსულა და ისეთი უცნაური რამ შემთხვევია, ღიმილის გარეშე ვერ გაიხსენებ. ერთ-ერთმა ჩემმა პაციენტმა ქორწილში შემწვარი გოჭის პირიდან ბოლოკი გამოიღო და გოჭის პაროდიის გაკეთება სცადა. სწორედ ამ დროს მთლიანი ბოლოკი გადასცდა და კინაღამ დაიხრჩო...
მარი ონეზაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
