30
მაისიდღის ზოგადი ასტროლოგიური პროგნოზი
14 ოქტომბერს საფრანგეთში, პარიზისა და თბილისის ინტერპოლის ბიუროების ერთობლივი თანამშრომლობის შედეგად, საქართველოს სამართალდამცველი ორგანოების მიერ ძებნილი თავდაცვის ყოფილი მინისტრი დავით კეზერაშვილი დააკავეს. მანამდე ქართულ მხარეს მიღებული ჰქონდა გადაწყვეტილება მისი პასუხისგებაში მიცემის თაობაზე, თუმცა მასზე ინტერპოლის წითელი ცირკულარით ძებნა არ გამოცხადებულა. დავით კეზერაშვილს ბრალად ედება სახელმწიფო პოლიტიკური თანამდებობის პირის მიერ განსაკუთრებით დიდი ოდენობით ქრთამის აღება, ორგანიზებული ჯგუფის მიერ საბაჟო წესების დარღვევა, განსაკუთრებით დიდი ოდენობით ფულის გათეთრება და უკანონო შემოსავლების მიღება. "ყველა სიახლე" ყოფილ გენერალურ პროკურორ გია მეფარიშვილს ესაუბრა:
- თუ დავით კეზერაშვილზე საერთაშორისო ძებნა გამოცხადებული არ ყოფილა (რაც ძნელი დასაჯერებელია), ანუ წითელი ცირკულარით არ იძებნებოდა, მისი ძებნა-დაკავება საქართველოში ექსტრადიციის მიზნით, სხვა სამართლებრივი აქტის საფუძველზე შეიძლებოდა განხორციელებულიყო. კერძოდ, ლაპარაკია 1959 წლის 20 აპრილის კონვენციაზე - "ევროპული კონვენცია სს საქმეებზე ურთიერთდახმარების შესახებ", რომლის შესაბამისად, ფრანგული მხარე ვალდებული იყო ქართული მხარისთვის დახმარება აღმოეჩინა. ამავე დროს, აღნიშნული კონვენცია ითვალისწინებს უარის თქმასაც იმ შემთხვევაში, თუ - 1. თხოვნა შეეხება დანაშაულს, რომელსაც მოპასუხე მხარე მიიჩნევს პოლიტიკურ დანაშაულთან დაკავშირებულ დანაშაულად ან ფისკალურ დანაშაულად. 2. თუ მოპასუხე მხარე მიიჩნევს, რომ თხოვნის შესრულება ზიანს აყენებს მისი ქვეყნის სუვერენიტეტს, უშიშროებას ან სხვა ძირითად ინტერესებს. აღნიშნული აქტის შესაბამისად, მომთხოვნი მხარე უფლებამოსილია სპეციალურად მიუთითოს კონკრეტული პირის სს დევნის და დაპატიმრების საფუძველი. ასე რომ, ჩემი აზრით, ქართული მხარე კარგა ხანია მუშაობდა ფრანგ კოლეგებთან და შესაბამისად, ეს გადაწყვეტილება საფრანგეთის მხარემ საერთაშორისო სამართლისა და ფრანგული სს საპროცესო კანონმდებლობის შესაბამისად მიიღო. ჩატარდება შესაბამისი სასამართლო პროცესი და ექსმინისტრს დაცვისა და სააპელაციოში გასაჩივრების უფლება გარანტირებული ექნება. ასე რომ, ქართულ მხარეს მოუხდება ძალზე სერიოზული მუშაობა, ვინაიდან ფრანგული სასამართლო ძალიან მომთხოვნია ექსტრადიციის საკითხებზე, მით უფრო, როცა საქმე ეხება ყოფილი ხელისუფლების მაღალჩინოსანს. მიუხედავად იმისა, რომ იგი არაპოლიტიკური დანაშაულის ჩადენაშია მხილებული, ამ საქმეს მაინც სიფრთხილით მოეკიდებიან. ქართულმა მხარემ კეთილი უნდა ინებოს და სერიოზულად იმუშაოს მის ხელთ არსებულ მტკიცებულებებზე. ზოგადად, წითელი ცირკულარით ძებნა მხოლოდ იმ შემთხვევაში ცხადდება, როდესაც ადგილობრივი, რესპუბლიკური ძებნა უშედეგოა, მაგრამ ამას სჭირდება დიდი თანხა. იცოდით, რომ ერთი კაცის, თუნდაც იგივე ყოფილი მაღალჩინოსნების ძებნა წელიწადში 25 000 დოლარი ჯდება? სახელმწიფო ხშირად აკეთებს ეკონომიას ამ მიმართულებით, ანუ ოპერატიული წყაროებით ეძებენ კონკრეტულ პიროვნებას. მართალია, კეზერაშვილი ქართული მხარის მოთხოვნით დააკავეს, მაგრამ ეს იმას არ ნიშნავს, რომ მალევე მოხდება ექსტრადირება. ჯერ პარიზში უნდა გაიმართოს სასამართლო პროცედურა და ამის მერე გადაწყდება, გადმოსცემენ თუ არა საქართველოს. ასე რომ, აქ ყველაფერი ახლა იწყება.
- თქვენი აზრით, შეეცდება კეზერაშვილი პოლიტიკური ნიშნით დევნილობის დასაბუთებას?
- თუ პიროვნება პოლიტიკური საქმიანობისთვის არის ძებნილი, ან სინდისის პატიმარია, ეს სხვა საკითხია, მაგრამ კეზერაშვილი არ არის პოლიტიკური საქმიანობისთვის ძებნილი, მას კონკრეტული ქონების დატაცებებსა და თანამდებობის ბოროტად გამოყენებაში ედავებიან. რა პოლიტიკურ პატიმრობაზეა ლაპარაკი?
- ისრაელის სახელმწიფოს რა შეუძლია ამ შემთხვევაში, რა როლს ითამაშებს კეზერაშვილის საქმეში?
- მართალია, კეზერაშვილი ისრაელის მოქალაქეა და ამ სახელმწიფოს კანონმდებლობით არ შეიძლება ისრაელის მოქალაქის გადაცემა კომპეტენტური ორგანოების მოთხოვნით, თუ ის იმ ქვეყანაში იმყოფება, მაგრამ დავით კეზერაშვილი დაკავებულია მესამე სახელმწიფოში, ანუ საფრანგეთში. არ დაგვავიწყდეს, რომ ეს არის რთული პროცედურა, რომელიც ფრანგებს დეტალურად აქვთ აღწერილი ფრანგულ სს საპროცესო კანონმდებლობაში. კეზერაშვილი რომ ისრაელის ტერიტორიაზე დაეკავებინათ, მას ქართულ მხარეს არავითარ შემთხვევაში არ გადმოსცემდნენ. იგივე პრინციპი აქვს საქართველოს კონსტიტუციას. პროცესი ახლა დაიწყო და ქართულ მხარეს მოუწევს სერიოზული მუშაობა, ფრანგებთან ხუმრობა არ შეიძლება!
- დაახლოებით რა ვადაში დასრულდება ეს პროცესი?
- სულ ცოტა, ერთ თვეში, კანონმდებლობით განსაზღვრულ ვადაში მიიღებენ გადაწყვეტილებას. ამ ეტაპზე კეზერაშვილს ექნება აპელაციის შეტანის უფლება, რის შემდეგაც გაიმართება სასამართლო განხილვა და თუ ფრანგული სასამართლო არ მიიღებს ექსტრადიციის გადაწყვეტილებას, მას არ გადმოსცემენ ქართულ მხარეს, ამის ილუზია არავის ჰქონდეს.
თეა მესხი
ყოველკვირეული გაზეთი "ყველა სიახლე"
(გამოდის ოთხშაბათობით)
