26
მარტიდღის ზოგადი ასტროლოგიური პროგნოზი
რუსთავში მომხდარ ტრაგიკულ შემთხვევასთან დაკავშირებით კომპანია "რუსთავის წყალი" სპეციალურ განცხადებას ავრცელებს, რომელსაც უცვლელად გთავაზობთ:
"კომპანია "რუსთავის წყალი" მწუხარებას გამოხატავს რუსთავში მომხდარი ტრაგედიის გამო. გავრცელებული ინფორმაციით, რუსთავში მოხდა ტრაგიკული ფაქტი, დაიღუპა 7 წლის ბავშვი - ბექა ქამუშაძე, რომელიც 2013 წლის 14 ოქტომბერს ე.წ. ინტერნატის დასახლების მიმდებარედ - მინდორში, "რუსთავის წყლის" კუთვნილ ობიექტზე გარდაცვლილი იპოვეს. ბავშვის დაღუპვის მიზეზი ამ ეტაპზე გაურკვეველია.
მიმდინარე წლის 13 ოქტომბერს, აღნიშნულ ადგილას დაფიქსირდა ავარია, რის გამოც კომპანია "რუსთავის წყალი", იმავე დღიდან, ადგილზე აწარმოებდა სარეაბილიტაციო სამუშაოებს. სწორედ ამ მიზეზით ობიექტი ჯერ კიდევ არ იყო მიწით დაფარული, რადგან მაგისტრალური მილდენი, რომელიც წარმოადგენდა რთულ კვანძს, დამატებით საჭიროებდა შემოწმებას. აღნიშნულის გათვალისწინებით, კომპანიის ობიექტი და მისი მიმდებარე ტერიტორია გარშემორტყმული იყო სპეციალური უსაფრთხოების ლენტით.
"რუსთავის წყლის" ინფორმაციით, გამოძიება დაწყებულია. კომპანია მზადაა ითანამშრომლოს საგამოძიებო ორგანოებთან და ძიების პროცესში აღმოუჩინოს სათანადო დახმარება",-ნათქვამია განცხადებაში.
რუსთავში, გოგოლის ქუჩის მიმდებარე ტერიტორიაზე, წყლით სავსე ორმოში ბავშვი გარდაცვლილი იპოვეს. ადგილობრივი მოსახლეობის განცხადებით, ორმო კომპანია "რუსთავის წყალმა" 8 თვის წინ დაზიანებული მილის შეკეთების მიზნით ამოთხარა და ამოთხრილი მიატოვა. თხრილი წყლით იყო სავსე და ზაფხულობით ბავშვები ბანაობდნენ.
გარდაცვლილი ბექა ქამუშაძე გუშინ გვიან საღამოს, ძებნის შემდეგ წყლით სავსე თხრილში იპოვეს.
ამასთან, გარდაცვლილის მამა ბესიკ ქამუშაძე უბედურ შემთხვევას გამორიცხავს და აცხადებს, რომ ბავშვი სავარაუდოდ მოკლულია.
ბავშვის მამის განცხადებით, ბექას თავი აქვს სავარაუდოდ ქვაზე დარტყმული, მაშინ როცა თხრილში არც ერთი ქვა არ არის.
ბესიკ ქამუშაძე საქმის დროულ და საფუძვლიან გამოძიებას ითხოვს.
