ნოდარ ხადური - მივიღეთ პირობა, რომ სავალუტო ფონდი საქართველოსთან მიმართებაში გამოქვეყნებულ პროგნოზს გადახედავს

საერთაშორისო სავალუტო ფონდისგან მივიღეთ პირობა, რომ საქართველოსთან მიმართებაში გამოქვეყნებულ პროგნოზს გადახედავს, - ამის შესახებ საქართველოს ფინანსთა მინისტრმა ნოდარ ხადურმა საერთაშორისო სავალუტო ფონდის აღმასრულებელ დირექტორთან, მენო შნელთან შეხვედრის შემდეგ განაცხადა. მისი თქმით, მენო შნელი ამ პროგნოზით თავადაც გაკვირვებულია.

საერთაშორისო სავალუტო ფონდმა საქართველოს ეკონომიკის ზრდის პროგნოზი 2,5%-მდე შეუმცირა.

"საერთაშორისო სავალუტო ფონდის აღმასრულებელ დირექტორთან, მენო შნელთან შეხვედრაზე ვისაუბრეთ საქართველოს ეკონომიკაში არსებულ მდგომარეობაზე, იმ პროგნოზებზე, რომელიც გამოაქვეყნა საერთაშორისო სავალუტო ფონდმა. როგორც გაირკვა, იგი თავადაც გაკვირვებულია ამგვარი პროგნოზით და მივიღეთ პირობა, რომ აღნიშნული შეფასება გადაიხედება", - განაცხადა ხადურმა.

მენო შნელის თქმით კი, შეხვედრაზე საუბარი შეეხო საქართველოში ეკონომიკურ აღმავლობასა და განვითარების პერსპექტივებს.

"მიმაჩნია, რომ კარგია საქართველოს დელეგაციის ჩამოსვლა წლიურ შეხვედრაზე. ეს საუკეთესო საშუალებაა საერთაშორისო ასპარეზზე შეხვდე პარტნიორებს. დღეს ძალიან ბევრი ვისაუბრეთ ეკონომიკური აღმავლობისა და განვითარების პერსპექტივაზე, მათ შორის საქართველოში. ვფიქრობ, საქართველოს დელეგაციას პოზიტიური შეხვედრები ჰქონდა საერთაშორისო სავალუტო ფონდის ეკონომისტებთან, ასევე, ჰოლანდია-ბელგიის ჯგუფის ხელმძღვანელებთან, რომლებიც ფონდში საქართველოს წარმოადგენენ", - განაცხადა მენო შნელმა.

აშშ-ში ვიზიტის ფარგლებში ფინანსთა მინისტრმა შეხვედრები გამართა ევროპის რეკონსტრუქციისა და განვითარების ბანკის აღმასრულებელ დირექტორთან თურქეთში, აღმოსავლეთ ევროპის, კავკასიისა და ცენტრალური აზიის ქვეყნებში ოლივიე და კამთან და ევროპის საინვესტიციო ბანკის ვიცე-პრეზიდენტ ვილჰელმ მოლტერერთან.

"რაც შეეხება შეხვედრებს ჩვენს მთავარ ინვესტორებთან - ევროპის რეკონსტრუქციისა და განვითარების ბანკის აღმასრულებელ დირექტორთან ვისაუბრეთ ბანკის მიერ განხორციელებულ პროექტებზე. ისინი აპირებენ გაააქტიურონ თანამშრომლობა საქართველოსთან. ნოემბერში ბანკისგან ველოდებით საინტერესო სიურპრიზს, რომლის გაჟღერების უფლებაც ჯერ არ მაქვს. ევროპის საინვესტიციო ბანკის ვიცე-პრეზიდენთან შეხვედრაზე განვიხილეთ ბანკის უახლოესი გეგმები საქართველოში. როგორც იცით, ბანკი აქტიურადაა ჩართული ინფრასტრუქტურული პროექტების განხორციელებაში. ბანკი გეგმავს ინვესტირებას კერძო სექტორში. აგრეთვე, აპირებენ კერძო-საჯარო თანამშრომლობის ე.წ. PP პროექტებში ჩართვას. სწორედ აღნიშნული ტიპის შეხვედრები მაძლევს რწმენას და გარანტიას, რომ მომავალ წელს საქართველოში ინვესტიციების რაოდენობა გაიზრდება", - განაცხადა ნოდარ ხადურმა.

ვილჰელმ მორტერერის განცხადებით კი, საქართველო ევროპის საინვესტიციო ბანკისთვის ერთ-ერთი ძირითადი პარტნიორია აღმოსავლეთ პარტნიორობის რეგიონში.

"პოზიტიური გამოცდილება გვაქვს ინფრასტრუქტურულ პროექტებში თანამშრომლობის კუთხით. აგრეთვე გვაინტერესებს ისეთი პროექტები, როგორიცაა წყლის რესურსები, მყარი ნარჩენების მართვა, კერძო სექტორის მხარდაჭერა. გვინდა ხელი შევუწყოთ საშუალო და მცირე ბიზნესს, რათა ქვეყნის ეკონომიკა განვითარდეს. ჩვენი სურვილია, გავაუმჯობესოთ საქმიანობა საქართველოში", - განაცხადა მოლტერერმა.

ასევე, მინისტრმა მონაწილეობა მიიღო საერთაშორისო სავალუტო ფონდის ყოველწლიურ კონფერენციაში, რომელზეც მსოფლიო ეკონომიკაში მიმდინარე პროცესებთან ერთად, გარდამავალი ეკონომიკის მქონე ქვეყნებში არსებული მდგომარეობა განიხილებოდა.

"ინტერპრესნიუსი"